«Հրել է, ձեռքը բերանից դուրս է եկել, արջը փախել, ընկել է ձորը». Ինչպես է արջը հարձակվել կնոջ վրա
«Մի քիչ հեռու էի: Ձայներ լսեցի, մինչև հասա, Ժողովուրդը գոռոցով հեռացրել էր արջին: Կինս հրել է, ձեռքը բերանից դուրս է եկել, արջը պոկվել է ու փախնելով ընկել ձորը, բայց չի սատկել»,- Վայոց ձորի մարզի Ռինդ գյուղի բնակչուհի Սիրանուշ Վարդանյանի ամուսինը` Վարդան Ավետիսյանը կնոջ վրա արջի հարձակումից այսքանն է պատմում:
Գնացել էին դաշտ, երբ մի փոքր հեռացել է նրանից, հսկա արջը հարձակվել է կնոջ վրա ու վնասել նրան:
«Դեպքից հինգ րոպե հետո ես հասել եմ տեղ, այդ դաշտային պայմաններում առաջին օգնություն են ցույց տվել կանայք: Տեղափոխել ենք Եղեգնաձորի հիվանդանոց, այնտեղից է Արտաշատ, որտեղ ձեռքը վիրահատեցին: Վիճակը կայուն է: Հիմա դեղեր են նշանակել, սրսկում են, վերքն են մշակում»,- Panorama.am-ի թղթակցի հետ զրույցում ասաց կնոջ ամուսինը:
Ռինդի գյուղապետ Հուսիկ Սահակյանի խոսքով, այս սեզոնին գյուղացիներն այդ տարածքում բանջար են հավաքում:
Panorama.am-ին նա ներկայացրեց դեպքի մանրամասները. «Առանձնանում են, սկսում են քաղել: Այդ ժամանակ արջը հարձակվում է կնոջ վրա, ինքն էլ պաշտպանվում է: Որ նստում է, ձեռքը դեմ է տալիս, արջը բերանով կոտրում է ոսկորները, նաև կողերն է ծակում: Ժողովուրդը հավաքվել է, գոռացել, արջը փախել է»:
Հուսիկ Սահակյանը նշեց, որ նման դեպքեր էլի են եղել, տարածքում արջերը շատ են:
«Նախորդ տարի մի երեխայի վրա էր հարձակվել, ոտքի փափուկ մասից էր բռնել, շատ չէր վնասել: Բացի այդ, մեր անտառային արոտի ժամանակ անասուններն այդ տարածքում են արածացնում, գրեթե ամեն օր հարձակումներ են լինում: Չկա մի տարի, որ գոնե մի քանի անասուն չվնասվի: Հեսա մրգերը հասան, միշտ կոտրում են, վնասում են այգիները: Գրեթե գյուղ են մտնում, բայց նման դեպքեր դեռ չեն գրանցվել»,- ասաց գյուղապետը: