«Օրինաց երկրի» բնույթն էր այդպիսին, ես երբեք չեմ վստահել այդ կուսակցությանը. ՀՀԿ-ական պատգամավոր
«Ինձ համար «Օրինաց երկիր» կուսակցության նման դիրքորոշումն անակնկալ չէր, այդ կուսակցության բնույթն է այդպիսին, նման քայլը այդ կուսակցության բնավորությանը շատ հարիր է: Նման բան ի վերջո, առաջին անգամ չէ, որ լինում է», Panorama.am-ի թղթակցի հետ զրույցում մեկնաբանելով նախօրեին ՕԵԿ քաղաքական խորհրդի որոշումը, հայտարարեց ԱԺ Հանրապետական խմբակցության պատգամավոր Համլետ Հարությունյանը:
Դիտարկմանը, թե տարիներ շարունակ, որպես կոալիցիոն գործընկեր «Օրինաց երկիրը» Հանրապետականի համար վստահելի գործընկեր է եղել, Հարությունյանը հակադարձեց. «Իմ համար կոնկրետ Հարությունյան Համլետի համար վստահելի գործընկեր չէր: Գիտեք, կան անհատական կարծիքներ և կա կուսակցության ու նախագահի դիրքորոշում: Ես, որպես քաղաքական գործիչ, «Օրինաց երկիր»-ին երբեք չեմ վստահել և չեմ համարել հուսալի գործընկեր: Թերթեք իմ հարցազրույցները, կտեսնեք, ժամանակին ես քննադատել եմ նրանց ու հիմա էլ իմ կարծիքը չեմ փոխել»:
Նրա խոսքով, դասական քաղաքականություն Հայաստանում չի իրականացվում, և քաղաքական գործընթացները կապված են անհատի բնույթի հետ: Հարցին, թե այս պարագայում նկատի ունի ՕԵԿ նախագահ Արթուր Բաղդասարյանի բնո՞ւյթը, Հարությունյանը արձագանքեց. «Իհարկե»:
Ճշգրտմանը, թե դավաճանությա՞ն է նման ՕԵԿ-ի վարքագիծը, ՀՀԿ-ական պատգամավորը արձագանքեց. «Չէ, ՕԵԿ-ի տեսակարար կշիռը թույլ չի տալիս, որ ասեմ Հանրապետականին դավաճանել է: Ես նկատի ունեմ այն, որ այսքան տարի մեր կողքին լինելով, նա որոշեց հեռանալ: Իմ համար կոնկրետ զարմանալի չէր նման քայլը»:
Խորհրդարանական մեծամասնության ներկայացուցիչը կարծում է, որ այս քայլով «Օրինաց երկիր»-ը պատրաստվում է խորհրդարանական, այնուհետև` նախագահական ընտրություններին:
Ինչ վերաբերում է «Օրինաց երկիր»-ը լքած երեք նախարարներին, Համլետ Հարությունյանը նկատեց. «Բայց նրանք ի՞նչ կապ ունեին «Օրինաց երկիր» կուսակցության հետ: Գիտեք, մի քիչ անլուրջ է կուսակցական լինելը, դուրս գալը: Զարմանալի բան է` մեր երկրում ինչքան հեշտությամբ մտնում են, նույնքան հեշտությամբ էլ դուրս են գալիս: Ինձ համար, օրինակ, որպես քաղաքական գործչի, ընդունելի չէ նման քայլը»:
Հարցին, թե ընդդիմադիր դաշտը գրկաբաց կընդունի՞ ՕԵԿ-ին իր շարքերը, Հարությունյանը պատասխանեց, որ չի կարծում, թե «գլխապատառ կընդունեն» և միևնույն ժամանակ հավելեց. «Բայց մյուս կողմից էլ պետք է նկատի ունենալ այն, որ ընդդիմությունը բազմաշերտ է` թող չորսը չլինեն, հինգը լինեն. Դա իրենց համար իմիջ է, ոչ թե տեսակարար կշիռ այդ իմաստով կարծում եմ, որ կընդունեն»:
Նախորդող հրապարակում`
ՕԵԿ-ը փաստում է, որ կոալիցիոն ձևաչափը իրականության մեջ գործել է ոչ արդյունավետ
Լրահոս
Տեսանյութեր
Անահիտ աստվածուհու արձանը կցուցադրվի Հայաստանի պատմության թանգարանում պահվող բացառիկ նմուշների հետ