Սփյուռքահայ հյուր երեխաները քնում են հատակին, իսկ Սփյուռքի նախարարությունը տեղում չէ
Ավելի վաղ Panorama.am-ը արդեն տեղեկացրել էր այն խայտառակ պայմանների մասին, որոնցում սփյուռքահայ երեխաներին պարտադրում է բնակվել Սփյուռքի նախարարությունը այն մեկ ամսվա ընթացքում, ինչ նրանք հայրենիքում են և մասնակցում են սփյուռքահայ երեխաների համար հայոց լեզվի և գրականության արագացված դասընթացներին: Հիշեցնենք, «Շիրակ» հյուրանոցի համարներից մեկում արդեն 7 երեխա է բնակվում և 8-րդին պարտադրում են միանալ նրանց և երկու շաբաթ ապրել այդ նույն սենյակում` քնելով հատակին փռած ներքնակի վրա: Ինչին, բնական է, ծնողը դեմ է:
Panorama.am-ը փորձեց «Շիրակ» հյուրանոցի ադմինիստրացիայից ճշտել, թե ինչպես է պատահել, որ երեխաներին տեղավորում են իրար գլխի վրա լցված կամ ինչ է նշանակում հատակին ներքնակ փռել, սակայն հյուրանոցից մեզ փոխանցեցին, որ այդ հարցերոը կարող ենք պարզել կազմակերպիչների հետ, որոնք էլ վճարել են և ամրագրել են այդ համարները: Հետաքրքրվեցինք` երբ նախարարությունից ամրագրել են սենյակներ երեխաների համար, տեղեկացված են եղել, որ 7-8 երեխա մեկ համարում պետք է բնակվի՞:
«Գիտեք, այդ բոլոր հարցերը ավելի լավ կլինի ուղղեք իրենց»,- եղավ պատասխանը:
Հակադարձեցինք` եթե նախարարությունից պարտադրեն հյուրանոցի միջանցքներից մեկում կամ զուգարանում ներքնակ փռել, որովհետև խիստ անհրաժեշտ է բոլոր երեխաներին տեղավորել, անելո՞ւ եք:
«Իրենց հետ խոսացեք»,- միայն ասաց աշխատակցուհին:
Հաջորդ հարցը` նորմալ է արդյոք, որ հյուրանոցայաին համարի դուռը ապակուց է, որի վրա փալաս է փռած, իսկ սենյակում էլ մի հատ միանման մահճակալ չկա, մնացած երեխաներն էլ, ում բախտ չի վիճակվել մարդավարի անկողին ունենալ, ստիպված են քնել հատակին փռած ներքնակների վրա, տիկինը փոքր ինչ լռեց, այնուհետ ասաց. «Նորմալ է գուցե իրենց համար, եթե իրենք դա են պատվիրել»:
Ինչ վերաբերում է այն հարցին, թե որքան գումարով է այդ համարը մեկ ամսվա համար ամրագրել Սփյուռքի նախարարությունը, աշխատակիցն ասաց, որ չի կարող այդ մասին ասել:
Ամեն դեպքում մեր հարցադրմանը` 7 հոգանոց համար ունե՞ք տիկինը նախ լռեց, հետո էլ ասաց, թե միայն այդ մեկն է, բայց քանի որ անձամբ ենք տեսել այդ այսպես կոչված համարը, ապա կարող ենք պնդել, որ դա ոչ թե համար է, այլ ինչ-որ սենյակ, որտեղ պահվում են ավելորդ իրերը:
Ի դեպ, «Շիրակ» հյուրանոցի պաշտոնական էջ այցելելով էլ պարզեցինք, որ հյուրանոցն իսկապես չունի 7 հոգանոց համար: Ավելին` բոլոր համարները երկտեղանոց են, որոնք թույլ են տալիս ավելացնել մեկ կամ երկու մահճակալ և գոյություն ունի նաև Apartment տեսակի համար, որը ավելի քան համոզված ենք, որ 7 տեղանոց չէ և հաստատ այն փնթի համարը չէ, որ տեսել ենք, քանի որ գինը` 130 հազար դրամ մեկ գիշերվա համար, նման պայմաններ հաստատ չէր հանդուրժի: Սակայն հյուրանոցից գերադասեցին լռել, թե այդ ինչեպս ստացվեց, որ 7-8 հոգու համար նախատեսված համար չունեցող հյուրանոցում նման հարմարություններ ստեղծվեցին, որտեղ էլ պարտադրված ապրում են եվրոպական երկրներից ժամանած սփյուռքահայ երեխաները:
Ինչ վերաբերում է այս ամբողջ շիլա-շփոթի պատասխանատու Սփյուռքի նախարարությանը, ապա նախարարությունից մեզ պատասխանեցին (ժամը 15.38 -ին), որ մեզ ոչ ոք պատասխանել չի կարող, քանի որ բոլորով գնում են ինչ-որ միջոցառման և լսափողը ցած դրեցին` առանց հասկանալու, թե ինչումն է խնդիրը:
Թեև համոզված ենք, որ հասկանային էլ դույզ-ինչ նորմալ պատասխան չէին էլ տալու… ի՞նչ պատասխան, եթե նման պայմաններ են պարտադրվում երեխաներին: Իսկ թե որքան գումար է հատկացվում երեխաների բնակվելու և սնվելու համար այդ ծրագրի շրջանակում` սա արդեն այլ հարց է, որը նույնպես քննարկման առարկա պետք է դառնա:
Հարակից հրապարակում`
Ո՞վ է մեղավոր սփյուռքահայ երեխաների այս պայմաններում բնակվելու համար (Լուսանկարներ)