Ո՞վ է մեղավոր սփյուռքահայ երեխաների այս պայմաններում բնակվելու համար (Լուսանկարներ)
«Բարի գալուստ Հայաստան». ահա այսպիսի բառերով կարելի է դիմավորել բոլոր նրանց, ում բախտ է վիճակվել Սփյուռքի նախարարության կազմակերպած սփյուռքահայ երեխաների համար հայոց լեզվի և գրականության արագացված ուսուցման ծրագրին մասնակցել ու հատկապես բնակվել «Շիրակ» հյուրանոցի…չէ, այսուհետ` «Շիրակ» հոսթելում:
Panorama.am-ին ահազանգած սփյուռքահայ պատանու ծնողը, ով երեխայի հետ Հայաստան է ժամանել ծրագրի մեկնարկից երկու շաբաթ անց, երեխային տեսնելով այն պայմաններում, որտեղ նա պետք է ապրի մինչև ծրագրի ավարտը, այսինքն ևս երկու շաբաթ, ուղղակի սարսափահար է եղել:
Եվ իրոք` պայմանները, մեղմ ասած, հաստատ չեն տրամադրում, որ ինչ-որ մեկը այդտեղ բնակվելով լավ տպավորություններով հեռանա հայրենիքից, հետն էլ ինչ-որ բան սովորի, քանի որ անգամ տարրական լուսավորությունը խնդիր է այս «համարում». չգիտես ինչու համարի դուռը ապակուց է, որի վրա ուղղակի կարմիր գույնի աստառ է փռած, որպեսզի միջանցքից այսպես կոչված համարի ներսը չերևա, հատակին չորսից ավելի ներքնակներ են փռած, որոնց վրա քնում են եվրոպական երկրներից ժամանած երեխաներ և այդ պատկերը տեսնելուն պես անմիջապես հիշում ես հին հայկական ընտանիքները, որտեղ գյուղից եկած հյուրերին տեղավորում են անմիջապես հատակին: Պահարանում տեղ չկա, ինչը զարմանալի չէ, քանի որ արդեն այդ «համարում» յոթ երեխա է բնակվում (մեկին էլ ուզում են տեղավորել, բայց ծնողը դեմ է) և երեխաների հագուստը կախած է այստեղ-այնտեղ, կոշիկներն էլ ամբողջ սենյակով մեկ:
Նույնիսկ սեղան չկա, որի վրա երեխաները պետք է պարապեն իրենց դասերը` ի վերջո, նրանք ժամանել են Հայաստան ոչ թե հյուրանոցային ու տուրիստական հանգիստ վայելելու, այլ սովորելու:
«Հուլիսի 4-ից այս պայմաններում երեխաներ են ապրում, հիմա էլ պետք է իմ երեխան այստեղ ապրի՞: Ես համոզված եմ, որ մյուս ծնողներն էլ , որ տեսնեին այս պայմանները, իրենք էլ կբողոքեին ու ինձ պես չէին ցանկանա, որ երեխան այստեղ դեռ երկու շաբաթ էլ բնակվի»,- Panorama.am-ին ասաց երեխայի ծնողը:
Նրա խոսքով, ծրագրին մասնակցության հայտ ներկայացրած երեխաների ծնողներին հավաստիացրել են, որ հյուրանոցային պայմանները համապատասխանելու են եվրոպական չափանիշներին, երեխան ոչ մի խնդիր չի ունենա:
«Ես իհարկե չեմ ասում, որ երեխան մնար 5 աստղանի հյուրանոցում, բայց այս պայմաններո՞ւմ: Դուք պատկերացնում եք, թե մի սենյակում, որտեղ 7 երեխա է ապրում ու իմ երեխաս էլ հետները փաստորեն 8 երեխա, առավոտյան լողարան մտնելու ի՞նչ հերթ է գոյանում: Կամ ինչո՞ւ այս պայմաններում մնա` չեմ հասկանում: Եթե պետք էր գումար ավելացնեինք, բայց նորմալ պայմաններ ապահովեին, ես նայելով այս պայմաններին նույնիսկ վախենում եմ ենթադրեմ, թե ովքեր են մնում այստեղ ու դեռ ինձ էլ ասում են` եթե չես ուզում ներքնակի վրա երեխան քնի, կարող է բազմոցի վրա քնել: Այսինքն` ով ասես նստում-ելնում է, երեխաս էլ վրան քնի՞»,- վրդովված պատմեց տիկինը:
Մյուս կողմից նա շատ գոհ էր այն մեկօրյա հանգստից, որ նույն նախարարությունը ծրագրի շրջանակում կազմակերպել էր Աղվերանի 5-աստղանի հյուրանոցներից մեկում, որտեղ երեխաները մասնակցել են օլիմպիադայի` բարձր մակարդակ, բարձր սպասարկում և նաև գոհ էր ուսուցումից ու դասախոսական կազմից, որ անցկացնում են դասընթացները.
«Այդ ամենը հոյակապ է, երեխաները գոհ են, մշակութային ծրագիրն էլ, կարծես , վատը չէ… բայց այս պայմանները` սրանք սարսափելի են ու փչացնում են ամբողջ դրական տպավորությունը: Այնպես, որ ես նույնիսկ մտածում եմ հիմա ինքս գումար ավելացնեմ և համար վարձեմ երեխայիս բնակվելու համար»,- նշեց տիկինը:
Պայմանները տեսնելուց հետո անմիջապես հարց է ծագում` ո՞վ է մեղավոր ու պատասխանատու նման իրավիճակի համար:
Նախարարությունը, որ համարները ամրագրելուց չի հետաքրքրվել, թե ինչ պայմաններում են երեխաները բնակվելու, թե «Շիրակ» հյուրանոցի ադմինիստրացիան, որ տուրիստական այս թեժ սեզոնին պարզապես տեղավորել է բոլորին մեկ համարում ` հստակ գիտենալով, որ սփյուռքահայ երեխաներ են, հո չե՞ն բողոքի: Հարցեր, որոնք պատասխանների են սպասում: