Ձեր վստահելի աղբյուրը

Տարիներ շարունակ ողջ աշխարհից զբոսաշրջիկներ գրաված Ֆրանսիայի մայրաքաղաք Փարիզը Սեն գետի վրա է տեղակայված` Ֆրանսիայի հյուսիսում՝ Իլ-դը-Ֆրանս երկրամասի սրտում։ Հայերը, հիմնականում վաճառականներ,  Փարիզում բնակություն են հաստատել 15-րդ դարից։ 1672 թվականին Պասկալ (Հարություն) անունով մի հայ Սեն ժերմեն թաղամասում բացել է Ֆրանսիայում առաջին սրճարանը։ Մինչև 18-րդ դարի վերջը Փարիզում հայերը փոքրաթիվ ու չկազմակերպված մի համայնք էին։ 1798 թվականին Փարիզում հիմնադրված Արևելյան կենդանի լեզուների դպրոցում կազմակերպվել է հայագիտական ամբիոն, որի առաջին վարիչը մինչև 1827- թվական Հակոբ-Շահան Ջրպետյանն էր։ 

Փարիզն իր վարչական սահմաններում ունի 2 300 000 բնակչություն։ Փարիզն իր արվարձաններով Եվրոպայի ամենախիտ բնակեցված կենտրոններից մեկն է՝ շուրջ 12 միլիոն բնակչությամբ:























Ամեն տարի այստեղ են գալիս մոտ 30.000.000 զբոսաշրջիկներ: Փարիզի առաջին բնակիչները հայտնվել են մոտավորապես մ.թ.ա. 4000թ. ։ Բնակչությունը 2.153.600 մարդ է (2005 թվականի տվյալներով): Տարածքը` 105.4 քառ. կմ, միջին բարձրությունը՝ 33 մ: Այսօր Փարիզը բաժանված է 20 շրջանների։

















2008 թվականին Փարիզում ապրում էին մոտ 330 000 արտերկրացիներ, ինչը կազմում է բնակչության 14, 9%-ը։ Նրանցից 30%-ը Եվրամիության երկրներից են, ևս 20%-ը ներգաղթածներ են Ալժիրից, Մարոկոյից և Թունիսից։

Փարիզում կան  հսկայական քանակով տեսարժան վայրեր. ոչ միայն ճարտարապետական կոթողներ, այլ նաև փողոցներ, կամուրջներ, հրապարակներ և այլն։






















Փարիզում կան մոտ 1800 պատմական վայրեր և 130 թանգարաններ, որոնցից 14 պատկանում են քաղաքին, և մուտքը այնտեղ անվճար է։



Փարիզում  հայտնի է  «Փարիզյան Աստվածամոր տաճարը»` իր ճարտարապետական ողջ հմայքով: Լինել Փարիզում ու չայցելել Լուվր, աններելի է, այստեղ կա ավելի քան 300 արվեստի գործ: 


 

Ամենանշանավոր տեսարժան վայրերից մեկն է մետաղյա Էյֆելյան աշտարակը, որը կառուցվել է ճարտարագետ Գուստավ Էյֆելի նախագծով։ Աշտարակը նախատեսվում էր որպես ժամանակավոր կառույց, որը պետք է լիներ Համաշխարհային ցուցահանդեսի մուտքը 1889 թ.։ Այն ոչ միայն մնաց կանգուն, այլև  քաղաքի խորհրդանիշն է։

Ֆրանսիական խոհանոցը համարվում է աշխարհում լավագույններից մեկը: Հատկապես հայտնի են կրուասանները, երկար ֆրանսիական հացը, շոկոլադե հացիկները, բուրգունդական խխունջները, լիոնական նրբերշիկները, սոխով ապուրը: Այս ամենին ավելացրեք տարատեսակ սոուսները` ավելի քան երեք հազար բաղադրատոմսերով ու բազմապիսի համեմունքները: Ընդ որում` երկրի ամեն շրջանն ունի իր խոհարարական ավանդույթները, որոնք հաճախ նման չեն հարևան շրջանի խոհանոցին:

Առանձին ուշադրության են արժանի ֆրանսիական գինիները: Ֆրանսիան արտադրում է կարմիր և սպիտակ ընտիր գինիների հազարավոր տեսակներ: Գինեգործական հարուստ մշակույթ ունեցող երկիրն աշխարհին տվել է կոնյակ ու շամպայն:

Ֆրանսիացիների մեծամասնությունը համոզված է, որ ցանկացած կիրթ օտարերկրացի պիտի կարողանա գոնե տարրական մակարդակով խոսի ֆրանսերեն: Այդ պատճառով էլ, ինչպես խորհուրդ են տալիս զբոսաշրջիկները, խորհուրդ չի տրվում խոսել անգլերեն: Տուրիստական կայքերը գրում են, որ Օդանավակայանում, տրանսպորտում, հասարակական բանուկ վայրերում պետք է զգույշ լինել գրպանահատներից: Խորհուրդ է տրվում և թանկարժեք զարդերը թողնել հյուրանոցում:

Լուսանկարները` Լիլիան Գալստյանի