Facebook-ի տհաճ անակնկալը
Facebook-ը շատերի համար տհաճ անակնկալ է պատրաստել: Առաջիկա օրերին սոցիալական ցանցը կթարմացնի իր հիմնական iOS և Android բջջային հավելվածները, որոնցից կվերանա հաղորդագրություններով կիսվելու ֆունկցիան: Այս մասին, ի դեպ, Ցուկերբերգը զգուշացրել էր դեռևս նոյեմբերին:
«Hitech.vesti.ru»-ն գրում է, որ այսուհետ օգտատերերը կկարողանան շփվել հատուկ նամակագրության համար ստեղծված Facebook Messenger-ում, այս հավելվածի հետ ընկերությունը մեծ հույսեր է կապում: Իսկ այն մասին, որ օգտատերերն այսուհետ պետք է երկու հավելված օգտագործեն մեկի փոխարեն, նրան կզգուշացնի հատուկ հաղորդագրությունը, որից հետո չաթը ուղղակի կդադարի աշխատել:
Սոցցանցի ներկայացուցիչները այս փոփոխությունը բացատրել են հետևյալ կերպ, նախ՝ վիճակագրությունը ցույց է տալիս, որ օգտատերերը Messenger-ում 20 տոկոսով ավելի հաճախ են պատասխանում հաղորդագրություններին, քան հիմնական հավելվածում: Բացի այս, ընդամենը մեկ բջջային չաթի օգտագործելը երկուսի փոխարեն հնարավորություն կտա ընկերությանը դարձնել երկու հավելվածների աշխատանքը ավելի արագ և որակյալ: Թեև հասկանալի է, որ օգտատերերից շատերի սրտով դա չի լինի, քանի որ շատերը չեն սիրում նման փոփոխություններ:
Աղբյուրը նշում է, որ առայժմ փոփոխությունը կվերաբերի միայն iPhone և Android-սմարթֆոններ ունեցողներին: Իսկ մնացած բոլորի համար Facebook-ի բջջային հավելվածը դեռ կմնա նույնը: