Ձեր վստահելի աղբյուրը

Panorama.am-ը շարունակում է անդրադարձը Եվրոպայում Ադրբեջանի նախագահի աշխատակազմի հերթական անհաջողությանը, որը փորձել էր «քողարկված» աշխատակիցներ Էյնուլա Ֆաթուլաևի ու Ռովշան Բագիրովի միջոցով Ստրասբուրգում ակտիվացնել «Եվրոպական տեղեկատվական-իրավապաշտպանական կենտրոն» (European Information Human Rights Center) կազմակերպության գործունեությունը:

Հիշեցնենք, որ այս արկածախնդրության մեջ ի սկզբանե ներգրավված են եղել նաև գերմանացի իրավապաշտպան Գարի Մյուրեյը և Թուրքիայի ազդեցության մի շարք գործակալներ:

Panorama.am-ի խմբագրության տրամադրության տակ հայտնված տեղեկությունները վկայում են, որ դեռևս Ստրասբուրգում պաշտոնական գրանցումից առաջ բաքվեցի տերերի օժանդակությամբ ու Ֆաթուլաևի անմիջական մասնակցությամբ նշված կազմակերպության գործունեության համար 2013 թվականի ապրիլին Ադրբեջանի նախագահի աշխատակազմի կողմից տրամադրվել է 100 հազար եվրո արժողությամբ դրամաշնորհ: Ֆինանսական միջոցները ստացվել են Ադրբեջանի նախագահին կից ոչ կառավարական կազմակերպությունների աջակցման պետական խորհրդի կողմից:

Ադրբեջանի նախագահի աշխատակազմի հասարակական-քաղաքական հարցերի բաժնի ղեկավար Ալի Հասանովի ենթակայության ներքո կազմակերպության անդամները հանձնարարություն են ստացել՝ հայտնաբերել ու տարածել եվրոպական երկրներում մարդու իրավունքների խախտումների իրական ու մտացածին փաստեր, ինչպես նաև եվրոպական երկրների (Շվեդիա, Գերմանիա, Նորվեգիա, Դանիա և այլն)՝ Ադրբեջանի քաղաքականությունը քննադատող գործիչների վերաբերյալ հավաքել փաստեր ու պատրաստել թղթապանակներ (կոմպրոմատ) ու փոխանցել Բաքվին:

EIHRC-ի համար նախատեսված ֆինանսական հոսքերի մի մասի համակարգողը եղել է Բաքվում Սորոսի հիմնադրամի ծրագրերի տնօրեն, առանձին շրջանակներում բավականին հայտնի Ռովշան Բագիրովը (ինչպես հետագայում պարզվեց, Ֆաթուլաևը վերջինիս հետ էլ չի կարողացել ֆինանսական միջոցները կիսել):

Ներկայումս մեր խմբագրության տրամադրության տակ է հայտնվել գերմանացի իրավապաշտպան Գարի Մյուրեյի և բաքվեցի «արքունական» իրավապաշտպան Էյնուլա Ֆաթուլաևի միջև վերջերս կայացած զրույցի ձայնագրությունից մի հատված: Խոսակցության թեման Գերմանիայի դեմ եղած պատվերի դիմաց չստացված գումարների հարցն է և նմանատիպ այլ հարցեր: Ձայնագրությունից պարզ է դառնում, որ Ադրբեջանի նախագահ Իլհամ Ալիևի կողմից հատկացված գումարներն Էյնուլա Ֆաթուլաևը հընթացս փոշիացրել է (միայն կազմակերպության կայքի պատրաստման համար դուրս է գրվել 11 000 եվրո), իսկ ստրասբուրգցի «գործընկերները», թեև ուշացմամբ, բայց գիտակցելով, որ ներգրավված են արկածախնդրության մեջ, հրաժարվում են ապառիկով աշխատել:

Այսպիսով, խմբագրությունում առկա փաստաթղթերից դատելով՝ կարելի է արձանագրել Եվրոպայում Բաքվի հերթական «հատուկ գործողության» տապալումը: Ինչպես նաև այն, որ Իլհամ Ալիևի աշխատակազմը ոչ միայն ինստիտուցիոնալապես ֆինանսավորել է եվրոպացի պաշտոնյաների նկատմամբ փաստերի հավաքումն ու թղթապանակների կազմումը, ապահովել է դրանց հրապարակումն ադրբեջանական լրատվամիջոցներում, այլև հովանավորել է Ստրասբուրգում հակառուսական ու հակասեմական ակցիաների անցկացումը, ֆինանսավորել է Ֆաթուլաևի անվամբ գրանցված «ընդդիմադիր» լրատվական կայք, որը Բաքվի հրահանգով պարբերաբար ցեխ է շպրտում Եվրոպայի ու Ռուսաստանի հասցեին:

Եվրոպայում Ադրբեջանի իրավապաշտպան գործունեության ու Էյնուլա Ֆաթուլաևի կողմից Իլհամ Ալիևի փողերը լվացելու այս պատմությանը մութ կողմերը բացահայտելու համար առաջիկա օրերին մեր նկարահանող խումբը կայցելի Ստրասբուրգ, որտեղ կփորձի հանդիպել European Information Human Rights Center կազմակերպության ղեկավարության հետ, մեկնաբանություններ ստանալ անձամբ Գարի Մյուրեյից:

Ֆաթուլաևի գրագրության բովանդակությանն ավելի մանրամասն կարելի է ծանոթանալ այս հղումով http://vs.ananun.am/?cat=357: Ավելի քան 15000 նամակներից կհրապարակենք առավել հետաքրքիրներն ու էականները, ինչպես նաև նախկինում «Իրական Ադրբեջան» թերթում հրապարակված հոդվածները:

Հիշեցնենք, որ Էյնուլա Ֆաթուլաևը «Occupy Frankfurt» շարժման առաջնորդ Թոմաս Պիլցի հետ 2013 թվականի մայիսին Ստրասբուրգում հիմնել էին 7 հոգուց բաղկացած EIHRC կազմակերպությունը, որը 2013 թվականի օգոստոսից մինչ 2014 թվականի հունիսը գործել է Ադրբեջանի նախագահի աշխատակազմի ենթակայության տակ: Համագործակցությունը դադարել է այն բանից հետո, երբ հատկացված գումարները յուրացվել են Ֆաթուլաևի կողմիցև հասցեատերերին չեն հասել:

Նախորդող հրապարակումներ`
Էյնուլլա Ֆաթուլլաևը, Իլհամ Ալիևի աշխատակազմը և նրանց «իրավապաշտպան» գործունեությունը Եվրոպայում
Էյնուլլա Ֆաթուլլաևի փոստային արկղի պարունակությունը հայտնվել է համացանցում