Հերմինե Նաղդալյան․ Ադրբեջանը զգում է ԼՂ հակամարտության մոտալուտ «լուծման» վտանգն իր համար
Ստրասբուրգում Panorama.am-ի թղթակիցը հարցազրույց է անցկացրել Ազգային ժողովի փոխնախագահ, Եվրոպայի խորհրդի խորհրդարանական վեհաժողովում ՀՀ պատվիրակության ղեկավար Հերմինե Նաղդալյանի հետ՝ կապված ԵԽԽՎ բյուրոյի որոշման հետ, որով նախատեսվում է զեկույց պատրաստել Լեռնային Ղարաբաղի հակամարտության թեմայով։ Բյուրոյի առաջարկով զեկույցը վերնագրվել է «Լեռնային Ղարաբաղում և Ադրբեջանի մյուս գրավյալ տարածքներում բռնությունների աճ»։
-Տիկին Նաղդալյան, որպես ԵԽԽՎ-ում ՀՀ պատվիրակության ղեկավար, ինչ եք մտածում ԵԽԽՎ-ում Լեռնային Ղարաբաղի վերաբերյալ զեկույցի պատրաստման վերաբերյալ:
-Լեռնային Ղարաբաղի խնդրի քաղաքականացումը միջազգային այսպիսի կառույցում, ինչպիսին Եվրոպայի խորհուրդն է, այս թեման օրակարգում պահելը բոլոր ժամանակներում եղել է Ադրբեջանի պատվիրակության նպատակը։ Տարբեր ժամանակներում տարբեր ձև են փորձել իրագործել այն։ Ժամանակին ևս գրվեց զեկույց, որը որևէ առաջընթաց չէր էլ կարող արձանագրել հենց միայն պատճառով, որ ԵԽ-ն իր ազդեցության մեխանիզմներով և մանդատով այն կազմակերպությունը չէ, որ կարող է ազդել ռեալ գործընթացի վրա։ Միջազգային հանրությունը որոշել է, որ խնդրով զբաղվում է ԵԱՀԿ Մինսկի խումբը, որն այն ֆորմատն է, որը կոչված է և լիազորված է զբաղվել ԼՂ հակամարտության կարգավորմամբ։
Տարբեր ժամանակներում Ադրբեջանի գործողություններն ակտիվանում են և հիմա մենք գտնվում ենք ակտիվացման և սրացման փուլում, որը ես բացատրում եմ նրանով, որ Մինսկի խմբի ձևաչափում Ադրբեջանը լուրջ խնդիրներ ունի։ 2 տարուց ավել Ադրբեջանը փորձում է ռմբակոծել Մինսկի խմբի ձևաչափը և միջազգային բոլոր ատյաններում զբաղված է վատաբանելով Մինսկի խմբի ձևաչափը։
Ադրբեջանցիների ներկա պահի ակտիվացումը բացատրվում է բացառապես նրանով, որ Մինսկի խումբը սեղանին դրել է առաջարկներ, որոնք մաքսիմալ անընդունելի են Ադրբեջանի համար։ Եթե Հայաստանի համար դրանցում կան տարբեր երանգավորումով սկզբունքներ, որոնք մի փոքր ավելի, մի փոքր քիչ մեզ համար ընդունելի են, ապա Ադրբեջանի պահվածքը ցույց է տալիս մի բան, որ Մինսկի խմբի կողմից սեղանին առկա սկզբունքները բացառապես անընդունելի են իր համար։
Մենք կարող ենք արձանագրել, որ Մինսկի խումբը հակամարտության կարգավորման ուղղությամբ որոշակի առաջընթաց, կամ լուծման շրջանակներ է նշել և Ադրբեջանը, զգալով խնդրի լուծման՝ իր համար անընդունելի տարբերակը, փորձում է տարբեր ձևաչափերով աշխատանքներ կազմակերպել՝ Մինսկի խմբի գործընթացի մեջ այլ տերմինաբանությամբ ներխուժելու համար։
Այսօր ԵԽ-ում առկա իրավիճակը բացատրվում է նրանով, որ Ադրբեջանը զգում է ԼՂ հակամարտության մոտալուտ լուծման վտանգն իրենց համար։
-Տիկին Նաղդալյան, ներկա դրությամբ, եթե ԵԽԽՎ քաղաքական կոմիտեն պատրաստելու է զեկույց Լեռնային Ղարաբաղի վերաբերյալ, ինչպիսին է լինելու հայկական պատվիրակության մասնակցությունը զեկույցի պատրաստմանը։
-Բյուրոն միացրեց 2 բանաձևերի նախագծերը և ուղարկեց քաղաքական կոմիտե և խորհրդատվություն է տվել զեկույցի վերնագրի հետ կապված։ Սակայն զեկույցի վերնագրի, նպատակահարմարության հետ կապված որոշումը դեռևս վերջնական չէ։
Այսօր ևս քաղաքական կոմիտեում քննարկման ժամանակ մենք հայտնել ենք, որ ունենք նկատառումներ, մտահոգություններ և սա պետք է քննարկման առարկա դառնա։ Այսօր, չնայած քաղաքական կոմիտեի օրակարգում էր զեկուցողների ընտրության կետը, բայց հանձնաժողովը որոշում կայացրեց հետաձգել այն և վերադառնալ հարցին վաղը։
Վաղը քննարկումից հետո կտեսնենք, թե որքանով են մեր փաստարկները լսելի, որքան է հավանականությունը, որ իսկապես կունենանք բալանսավորված զեկույց, որ զեկույցի նպատակը կլինի տարածաշրջանում խաղաղության և կայունության պահպանումը, բանակցային գործընթացին աջակցումը և ոչ թե խանգարումը։ Այս ամենից հետո կհետևի, թե հայկական պատվիրակությունը ինչպես, ինչ ծավալով, ինչ մոտեցումներով կաշխատի զեկուցողների, կոմիտեի հետ։
Հարակից հրապարակումներ`
Ադրբեջանական խավիարը գրավել է ԵԽԽՎ-ն. կառույցը զեկույց է պատրաստելու ԼՂ վերաբերյալ
«Ինչո՞ւ է Ադրբեջանը ցանկանում ձերբազատվել ԵԱՀԿ ՄԽ-ից. պատասխանը պարզ է՝ Ադրբեջանը պատրաստվում է պատերազմի»
ԵԽԽՎ-ում հայկական պատվիրակությունը անհամաձայնություն հայտնեց Լեռնային Ղարաբաղի վերաբերյալ զեկույց պատրաստելուն