Ձեր վստահելի աղբյուրը

Օքսֆամ միջազգային բարեգործական կազմակերպությունը «Կանգնեցնենք խորացող անհավասարությունը» խորագրի ներքո միջազգային քարոզարշավ է մեկնարկել: Օքսֆամի հայաստանյան գրասենյակը, որը շուրջ 20 տարի իրականացնում է Հայաստանում մարդասիրական և զարգացման ծրագրեր, այսօր պաշտոնապես ազդարարեց այդ քարոզարշավի սկիզբը Հայաստանում:

Նշենք, որ Օքսֆամը պատրաստել է «Պայքար հավասարության համար. ժամանակն է վերջ տալ անհավասարության ծայրահեղ դրսևորումներին» վերնագրով հաշվետվություն, որում մանրամասն խոսվում է այն մասին, որ այսօր աշխարհի ամենահարուստ մարդկանց ունեցվածքն այնպիսի չափերի է հասնում, որ վերջիններս այն չեն կարող ծախսել իրենց ողջ կյանքի ընթացքում, այն դեպքում, երբ հարյուր միլիոնավոր մարդիկ ապրում են ծայրահեղ աղքատության մեջ՝ առանց հիմնական բժշկական օգնության կամ տարրական կրթության հնարավորության:

Հաշվետվության մեջ ասվում է, որ աշխարհի 85 ամենահարուստներն այնքան հարստություն ունեն, որքան երկրագնդի բնակչության կեսը, և նրանց ընդհանուր հարստությունը րոպեում գրեթե աճում է կես միլիոն դոլարով:

Այսօր ՄԱԿ-ի երևանյան գրասենյակում Օքսֆամի ներկայացուցիչները, ներկայացնելով հաշվետվության մանրամասները,  նշեցին, որ խորացող անհավասարությունը սպառնում է նաև Հայաստանին, որտեղ աղքատության մակարդակը 32.4 տոկոս է (980 հազար մարդ), որի 13.5 տոկոսը շատ աղքատներն են (408 հազար մարդ), 2.8 տոկոսը՝ ծայրահեղ աղքատները (մոտ 85 հազար մարդ):

Աղքատության հաղթահարման համար Հայաստանին անհրաժեշտ է 69.4 մլրդ դրամ՝ ի լրումն սոցիալական աջակցության համար արդեն իսկ հատկացված միջոցներին: Իսկ ծայրահեղ աղքատության վերացումը կպահանջի 2 մլրդ դրամ: Սա այն դեպքում, երբ որ սոցիալական աջակցությունը բարձր հասցեականությամբ կտրամադրվի միայն աղքատներին: Այնինչ` ՀՀ աշխատանքի և սոցիալական հարցերի նախարարության 2013-ի ամփոփ տվյալներով` աղքատ ընտանիքների թիվը 241.772 է, իսկ ընտանեկան և սոցիալական նպաստ է ստանում 102.570 ընտանիքի. այսինքն` միայն 42,4%-ը:

ՀՀ ԱՎԾ տվյալներով` 2012-ին ընտանեկան նպաստ ստացող տնային տնտեսությունների միայն 8,8%-ն է ունեցել անվճար բժշկական փաթեթից օտվելու իրավունք: Միջազգային փորձը ցույց է տալիս, որ նման բարձր հասցեականության բացակայության պայմաններում, աղքատության հաղթահարման համար պահանջվող նվազագույն ռեսուրսները հարկ է առնվազն կրկնապատկել:

Օքսֆամի հայաստանյան գրասնեյակի «Հաշվետու կառավարում» ծրագրի ղեկավար Լիլիթ Չիթչյանի խոսքերով` պատահական չէ, որ մեկնարկում է Օքսֆամ կազմակերպության միջազգային քարոզարշավն՝ ընդդեմ ողջ աշխարհում խորացող անհավասարության, քանի որ հրապարակված զեկույցում այնպիսի խոսուն փաստեր են ներկայացվել, որոնք լուրջ մտածելու տեղիք են տալիս:

Ըստ Լ.Չիթչյանի` քարոզարշավի շրջանակներում Օքսֆամը կոչ է անելու միանալու քարոզարշավին` համընդհանուր քննարկում ծավալելով ներկայիս ամենամեծ խոչընդոտի՝ աղքատության հաղթահարման շուրջ:

«Այս քարոզարաշավի նպատակն է մեկ անգամ ևս ներկայացնել աշխարհում խորացող անհավասարության մասին, որից անմասն չէ նաև Հայաստանը: Այսօր մեր երկրում անհավասարությունը լուրջ խնդիր է դարձել»,- ասաց Լ.Չիթչյանը:

«ՊրոՄեդիա-Գենդեր» ՀԿ նախագահ Թամարա Հովնաթանյանը, խոսելով անհավասարության, բևեռացման մասին, նշեց, որ թեև անընդհատ խոսվում է մեր ժամանակների ամենատագնապալից խնդիրներից մեկի՝ անհավասարության մասին, բայց քիչ բան է արվում այն վերացնելու ուղղությամբ:

Միջոցառմանը ներկա diabilityinfo.am կայքի խմբագիր Զարուհի Բաթոյանը, անդրադառնալով հաշմանդամություն ունեցող մարդկանց խնդիրներին, ընդգծեց, որ բոլոր այն ոլորտներում, որտեղ խնդիրներ կան, դրանցում հատկապես կրկնակի խոցելի են հաշմանդամություն ունեցող մարդիկ, իսկ կանայք` առավել ևս:

«Եթե կանայք ունեն խնդիր մեր երկրում, ապա հաշմանդամություն ունեցող կանայք կրկնակի խնդիրներ ունեն: Եթե աղքատ մարդիկ մեր երկրում խնդիրներ ունեն և բնակչության զգալի տոկոսն են կազմում, ապա հաշմանդամություն ունեցող մարդիկ այդ տոկոսի ամենամեծ մասն են կազմում, քանի որ չունեն կրթության, աշխատանքի հավասար հնարավորություններ, ինչպես նաև արժանապատիվ կյանքով ապրելու հնարավորություն: Դրա համար, եթե որևէ բան ենք նախաձեռնում, ապա յուրաքանչյուր ոլորտի մասնագետ պետք է հիշի, որ դրանցում պետք է նկատի ունենալ նաև հաշմանդամություն ունեցող մարդկանց: Ոչ թե պետք է առանձին ծրագրեր իրականացնել նրանց համար, այլ բոլոր ծրագրերը պետք է հասանելի դարձնել հաշմանդամություն ունեցողների համար»,- ասաց նա՝ հավելելով, որ անգամ այս միջոցառմանը մեծ դժվարությամբ է հասել, քանի որ հարմարեցված տրանսպորտ չկա, միակ հարմարեցված տաքսին չի աշխատել, իսկ ճանապարհներն էլ մատչելի չեն հաշմանդամություն ունեցողների համար:

«Միջոցառման մասնակցելու համար Կորյուն փողոցից մինչև ՄԱԿ-ի հայաստանյան գրասենյակ հասել եմ սայլակով, իհարկե ինձ օգնել են նաև ընկերներս»,- ասաց նա:

Օքսֆամի հայաստանյան գրասենյակը քարոզարշավի շրջանակներում հայտարարել է «Միասին՝ հանուն հավասարության» լուսանկարների մրցույթ, որի նպատակն է հանրության ուշադրությունը հրավիրել մեր կյանքը շրջապատող անարդարության տարբեր դրսևորումների և առաջին հերթին աղքատության վրա