«Եթե որոշ լիդերներ գնան այդ օրը Թուրքիա, չի նշանակի, թե ցեղասպանություն չի եղել». Ալեքսանդր Իսկանդարյան
«Չեմ կարծում, որ սա ապրիլի քսանչորսի արդյունքն է: Ես հետևում եմ իրադարձություններին, և վաղուց է իրավիճակը այսպիսին, այն տրամաբանություն ունի: Նախ այն միայն դիպուկահարների կրակոցներ էր ղարաբաղյան սահմանին, հետո տեղափոխվեց նաև հայկական սահման, հետո՝ նախիջևանյան, հետո դիվերսիաների վերածվեցին, հետո հայերը խիստ կտրուկ պատասխան տվեցին, հետո ուղղաթիռը խոցվեց: Սա տրամաբանորեն գնացող երևույթ է: Բայց սա ապրիլի քսանչորսի համար պլանավորված չէր և ապրիլի քսանչորսին չի ավատրվի, չնայած որոշակի ազդեցություն ունի»,- լրագրողների հետ հանդիպման ժամանակ ասաց քաղաքագետ Ալեքսանդր Իսկանդարյանը՝ անդրադառնալով հայ-ադրբեջանական սահմանին լարվածության հարցին:
«Միջնորդներն ասում են՝ միայն խաղաղ պայմաններում բանակցություններ կտանեն, իսկ այդպես կարող է երկար բանակցություններ լինեն: Սեղանին դրված են Մադրիդյան սկզբունքները, որոնցով Ադրբեջանը կկորցնի՝ իրենը համարող տարածքներ: Պետք է այլ կերպ գործել, հրավիրել միջազգային հանրության ուշադրությունը:Ադրբեջանի պահվածքը պատահական չէ, դա միջոց է, որպեսզի ազդեն միջազգային հանրության վրա: Ցույց են տալիս, թե ի՞նչ ստատուս քվո, տեսեք ի՞նչ է կատարվում: Սա միջոց է՝ ադրբեջանական հանրությանը ցույց տալ, որ ներքին խնդիրները բխում են հայ-ադրբեջանական հակամարտությունից: Ալիևի վերջին ելույթը նայեք, ես կծիծաղեի, եթե իրավիճակն այդքան տխուր չլիներ: Նա խոսում էր Ադրբեջանի նվաճումների մասին»,- ասաց քաղաքագետը:
Ըստ նրա՝ հայերը ևս փորձում են ազդել դրության վրա, բայց չի ստացվում: Քաղաքագետը հայտնեց իր վախն այն մասին, որ հայկական կողմի մոտ չի էլ ստացվի ազդել իրադրության վրա:
«Ի տարբերություն հայերի՝ նրանց հաջողվում է պահել զինվորների դիերը: Հասարակ ադրբեջանցին իմանում է այդ մահերի մասին՝ իբրև դժբախտ պատահարներ, մեր պարագայում այդպես չէ: Մեզ մոտ հնարավոր չէ պահել մահացածներին»,- նկատեց Իսկանդարյանը:
Անդրադառնալով ապրիլի քսանչորսին Թուրքիայի ձեռնարկած միջոցառումներին՝ քաղաքագետն ասաց. «Վերջերս Թուրքիան փորձում է շեղել միջազգային հանրության ուշադրությունը, սակայն Գալիպոլիի ճակատամարտը այնպիսի մասշտաբի իրադարձություն չէ, ինչպիսին հայոց ցեղասպանությունն է: Բացի այդ, եթե որոշ լիդերներ գնան այդ օրը Թուրքիա, չի նշանակի, թե ցեղասպանություն չի եղել»:
«Կապրենք մինչև ապրիլի քսանչորսը և կտեսնենք: Հայաստանը որոշակի քայլեր է կատարում բոլոր այն հարթակներում, որտեղ կարող է: Աշխատում են լոբբիստական խմբեր, ընդ որում, բոլորը տարբեր կերպ են աշխատում: Այսօր որոշակի գործընթաց է սկսվել, որը կշարունակվի, բայց չեմ կարծում, թե արմատապես կփոխի իրավիճակը: Սակայն այն, անշուշտ որոշակի արդյունքներ կունենա ճանաչման գործընթացում»,- կարծիք հայտնեց քաղաքագետը:
Իսկանդարյանը, սակայն, նկատեց, որ այդ գործընթացը վաղուց է սկսվել և ապրիլի քսանչորսին չի ավարտվի, պարզապես որոշակի ազդեցություն կունենա ընդհանուր գործընթացի վրա: Ըստ քաղաքագետի՝ լոբբիստական խմբերի աշխատանքները պարզապես ևս մեկ անգամ որոշակի ներդրում կունենան ցեղասպանության ճանաչման հարցում:
Այնուամենայնիվ, Իսկանդարյանը նկատեց. «Կարելի է և անհրաժեշտ է շարունակել աշխատել ապրիլի քսանչորսի միջոցառումների անցկացման ուղղությամբ»: