Ձեր վստահելի աղբյուրը

«Մենք արդեն հույս չունենք, որ լավ է լինելու: Առաջիկա պատերազմում պարտվելու ենք: Մրցակցություն չկա երկրում: Դուք երևի այսպես եք աշխատում՝ զանգում եք, ասում՝ մի քիչ շտրաֆ կանենք, կանցնի, կգնա: Հիմա հասկանո՞ւմ եք, ինչո՞ւ են բոլոր բիզնեսմեններն ուզում պատգամավոր դառնալ, քանի որ հասկացել են՝ եթե ունես քաղաքական իշխանություն, ունես նաև՝ տնտեսական: Մարում է արդեն հանրապետությունը»,-այսօր Ազգային ժողովում Տնտեսական մրցակցության պաշտպանության պետական հանձնաժողովի 2015 թվականի գործունեության ծրագրի քննարկման ժամանակ նման վատատեսական հայտարարություն արեց ԱԺ պատգամավոր Հրանտ Բագրատյանը՝ դիմելով դահլիճում նստած հանձնաժողով նախագահ Արտակ Շաբոյանին:

ՏՄՊՊ հանձնաժողովի նախագահի ներկայացրած ծրագիրը, Բագրատյանի բնորոշմամբ, «25 էջանոց ողորմելի փաստաթուղթ է»:

«Մարդուն հարց ես տալիս՝ այ ընկեր, ձեզ վերանշանակել են, վերջին տարիներին, ձեր գործունեության ընթացքում մրցակցությունն ավելացե՞լ է, թե՞ չէ: Նստեիք, մի քանի գիտնական հրավիրեք, մի հատ ինդեքս էլ Հայաստանի համար հաշվեիք, ոնց որ հաշվում է World Economic Forum-ը աշխարհի համար: Ուր է ձեր հարցումը, թեկուզ էստեղ նստած բիզնեսմենների շրջանում հարցում անեիք»,- հայտարարեց Բագրատյանը:

Նրա խոսքով, տարօրինակ է, որ ակտիվ հարկ վճարողները Հայաստանում երեք անգամ պակասել են, իսկ Շաբոյանը վերանշանակվել է: Դա նրա պնդմամբ, չի նշանակում մրցակցությունն ավելացնել:

«Երեկ ձեզ հարց եմ տալիս, ասում եմ՝ ինչո՞ւ է երկրի գլոբալ մրցունակության ցուցանիշը պակասում: Մարդն ասում է՝ ձեր տվյալները ճիշտ չեն: Ճիշտը դու չես, այ ընկեր, ըսենց բան մեկ էլ չգաք, պառլամենտում չասեք: Հիմա ընթերցում եմ տվյալները, World Economic Forum: 2012-13թթ Հայաստան՝ 82-րդ տեղ, 2013-14թթ Հայաստան՝ 79 տեղ, 2014-15թթ Հայաստան 85 տեղ: Վրաստան, համապատասխանաբար, 77, 72, 65 տեղ: Ադրբեջան, համապատասխանաբար, 46, 39, 38: Ներողություն խնդրեք, որ չգիտեք: Ձեզ հարց տրվեց երկհատորյակի մասին: Ասեցիք՝ սխալ է: Իյա, ձեր մարդիկ են գրել, գոնե թերթած կա՞ք, նույնիսկ չգիտեիք, որ դա երկհատորյակ է: Եվ ձեզ մենք հաստատում ենք, որ ի՞նչ անենք»,- ասաց պատգամավորը՝ կասկածներ հայտնելով, որ Շաբոյանը այս ամենը որպես տնտեսագետ կհասկանա:

Անդրադառնալով Շաբոյանի այն հայտարարություններին, թե Հայաստանում ռեսուրսները սահմանափակ են, Բագրատյանը հայտարարեց. «Քանի անգամ այստեղ ասացիք՝ մեր ռեսուրսները սահմանափակ են: Այ ընկեր, տնտեսագիտության մեջ ռեսուրսները միշտ սահմանափակ են, տնտեսագիտության թեկնածու եք, ես ձեզ ստուգարք չէի նշանակի: Անսահմանափակ ռեսուրս չի լինում, հասկանո՞ւմ եք: Բա էստեղ կանգնել եք դուք, էդ բոլորն ասում եք: Ի՞նչ գործ ունեք դուք մրցակցային հանձնաժողովում, դուք ոչ պլան ունեք, ոչ ծրագիր»: