Ձեր վստահելի աղբյուրը

Վատիկանի եւ Եվրոպական խորհրդարանի կողմից 1915 թվականի վայրագությունների ճանաչմանը զուգահեռ թուրքական առաջնորդներն առավել ռազմատենչ տրամադրություններ են դրսեւորում, գրում է Haaretz-ի վերլուծաբան Ցվի Բարելը:

Հեղինակը նշում է, որ Hurriyet Daily News-ի իր սյունակում մեկնաբան Բուրակ Բեքդիլը «լավ լուր» է խոստացել իր ընթերցողներին` թվարկելով «իր իսկ աղբյուրների» կողմից ներկայացված քայլերը, որոնք ձեռնարկվելու են «Թուրքիայի կողմից՝ ի պատասխան Վատիկանի թիկունքից հասցված հարվածի. Վատիկանի պաշտպանական ոլորտի ընկերություններին թույլ չի տրվելու մասնակցելու թուրքական շահութաբեր տենդերների, ներառյալ՝ հրթիռային համակարգերի եւ կործանիչների գործարքներին: Թուրքական կառավարության հանդեպ բարյացակամ դիրքորոշում ունեցող հասարակական կազմակերպությունները զանգվածային բոյկոտ են սկսելու Վատիկանում արտադրվող սպասքի եւ սպառողական այլ ապրանքների դեմ: Տնտեսագետները կանխատեսում են, որ ամենաշատ տուժելու է մեքենաշինության ոլորտը: Թուրքական տուրիստական գործակալությունները դադարեցնելու են ամեն տարի սուրբ քաղաք կազմակերպվող միլիոնավոր զբոսաշրջիկների այցելությունները` եկամուտից զրկելով նաեւ Վատիկանի հյուրանոցային ոլորտին: Թուրքիան քայլեր է ձեռնարկելու Վատիկանի` Միավորված Ազգերի կազմակերպության Անվտանգության խորհրդի անդամ դառնալու հայտն արգելափակելու ուղղությամբ: Միաժամանակ, Վատիկանի համար նախատեսված 52 մլն ԱՄՆ դոլարի թուրքական վարկը կասեցվելու է, մինչեւ Հռոմի պապը ներողություն չխնդրի Թուրքիայից: Լուրեր են շրջանառվում նաեւ, որ վարչապետ Ահմեդ Դավութօղլուն կաբինետի ներքին շրջանակին հայտնել է, որ Սիրիայի նախագահ Բաշար Ասադի պես հաշված են նաեւ Հռոմի պապի՝ որպես համաշխարհային Կաթոլիկ եկեղեցու ղեկավարի օրերը»:

Անդրադառնալով Հայոց ցեղասպանության վերաբերյալ Հռոմի Պապի հայտարարությանը եւ Եվրոպական խորհրդարանի բանաձեւին՝ հեղինակը նշում է, որ այս ուրբաթ՝ ապրիլի 24-ին, Թուրքիան շունչը պահած սպասելու է նախագահ Բարաք Օբամայի ելույթին: Արդյոք ԱՄՆ նախագահը այդ կոտորածը ճանաչելու է որպես ցեղասպանություն, թե կրկին հանդես է գալու դիվանագիտական ձեւակերպմամբ՝ կիրառելով վտանգավոր եզրույթ՝ առանց ճանաչման սահմանը հատելու, որպեսզի խուսափի Վաշինգտոնի եւ Անկարայի միջեւ հարաբերությունների հերթական ճեղքումից:

Մինչդեռ, Էրդողանը կրակ է բացում բոլոր ուղղություններով: Նախքան Եվրոպական խորհրդարանի կողմից բանաձեւի ընդունումը, նա ասել էր, որ «Հայոց ցեղասպանության վերաբերյալ կայացված ցանկացած որոշում մի ականջով կմտնի, մյուսով դուրս կգա»:

Մի քանի օր անց նա հիշեցրեց, որ Թուրքիան կարող է արտաքսել իր սահմաններում բնակվող տասնյա հազարավոր հայերի, քանի որ նրանք Թուրքիայի քաղաքացի չեն: Ի տարբերություն անցյալ տարի Էրդողանի կողմից արված ցավակցական հայտարարության՝ այս տարի կայանալիք խորհրդարանական ընտրությունների համատեքստում Էրդողանը փոխել է իր խոսելաոճը՝ որդեգրելով առավել ազգայնական դիրքորոշում, որն ակնկավում է՝ իր շուրջ կմիավորի Թուրքիայի աճ թեւը: Միաժամանակ Թուրքիայի 70-100 հազար կազմող հայկական համայնքը վախենում է, որ սփյուռքի ռազմատենչությունը կարող է իրենց դեմ բռնություն հրահրել: Վերջին շրջանում Ստամբուլի հայկական եկեղեցու պատերին հակահայկական գրառումներ են հայտնվել: Իսկ Իսրայե՞լը: Արդյո՞ք սա կլինի այն տարին, երբ վարչապետը կմիանա Հռոմի պապին եւ Եվրոպական խորհրդարանին, թե նա կպահպանի «ցեղասպանություն» եւ «հոլոքոստ» բառերի նկատմամբ հրեական մենաշնորհը: