Ձեր վստահելի աղբյուրը

IREX միջազգային կազմակերպությունը հրապարակել է «Մամուլի կայունություն ինդեքս- 2015» զեկույցը, որտեղ Հայաստանը դրական դինամիկայով մոտենում է կայունության մակարդակին: Զեկույցում դիտարկված են երկրների մեդիա ոլորտները, վերջին մեկ տարում դրանցում արձանագրված դրական և բացասական փոփոխությունները:

Զեկույցը կազմվում է 5 ոլորտների` «խոսքի ազատություն» , «պրոֆեսիոնալ լրագրություն», «լուրերի բազմազանություն», «բիզնես մենեջմենթ» և «օժանդակ կառույցներ» տրված գնահատականների հիման վրա` ընդհանուր միջինացված արդյունքով` 1-4 միավորների սահմաներում: 0-1 միջակայքում հայտնված երկրները զեկույցում բնորոշվում են որպես անկայուն մամուլ ունեցող երկրներ, 1-2 միջակայքում` կայունության խառը աստիճան ունեցող երկրներն են, 2-3 միջակայքում գրեթե կայուն երկրներն են, իսկ արդեն 3-4 միջակայքում դասակարգված են կայուն մամուլ ունեցող երկրները:

Զեկույցում Հայաստանի միջինացված արդյունքը 2.34 է, ինչը նշանակում է, որ Հայաստանը իր ստացած ընդհանուր գնահատականներով համաձայն զեկույցի, մոտենում է կայունության մակարդակին: Զեկույցում Հայաստանի հետ նույն մակարդակում են գտնվում նաև Վրաստանը` 2.51 և Մոլդովան` 2.38 միավորներով: Ըստ զեկույցի` այս արդյունքները վկայում են այն մասին, որ երկրները առավելապես կատարել են մեդիա կայունության ապահովման տեսանկյունից իրենց առջև դրված խնդիրները: 

Անկայուն և խառը կայունություն ունեցող երկրների շարքում են հայտնվել Ադրբեջանը`1.32 միավորով, Ռուսաստանը` 1.46, Բելառուսը` 1.22, Ղազախաստանը` 1.93, Տաջիկստանը` 1.56, Թուրքմենստանը` 0.24 և Ուզբեկստանը` 0.79 ցածր միավորներով:
Ընդհանուր դիտարկումների համաձայն` մեդիա կայունության տեսանկյունից Հայաստանում նախորդ մեկ տարում էական ազդեցություն ունեցող բացասական տեղաշարժեր չեն գրանցվել, չկան տեղական և միջազգային մամուլին հասանելիությունը սահմանափակող օրենսդրական խոչընդոտներ, չեն արձանագրվել լրագրողների նկատմամբ վտանգավորության աստիճան ենթադրող հարձակումներ, խոսքի ազատության սահմանափակման էական դեպքեր, նկատելի է լրագրողական պրոֆեսիոնալության աճ: Առկա խնդիրների մասով, որոնք դեռ լուծում են պահանջում,զեկույցում նշվում է ցույցերի և հանրահավաքների ժամանակ առանձին դեպքերում լրագրողների աշխատանքի խոչընդոտումը, քաղաքական այս կամ իրադարձությունների լուսաբանման հետ կապված խնդիրներ, պետական որոշ հաստատություններից տեղեկատվության ստացման դժվարություններ, հեռուստատեսության թվայնացման հետ կապված որոշ խնդիրներ:

Ընդհանուր դրական դինամիկայի համատեքստում Հայաստանի մասով զեկույցում արձանագրված է, որ առկա է իրադարձությունների համակողմանի լուսաբանում, ընթերցողները հնարավորություն ունեն լուրերի բազմազանության համադրման արդյունքում ստանալ այս կամ իրադարձության առավել ընդհանուր, օբյեկտիվ նկարագիրը, նկատվում է համացանցի հասանելիության մեծացում, եթերաժամանակի տրամադրում նաև ընդդիմադիր քաղաքական գործիչներին, ինչը, ըստ զեկույցում հնչեցված գնահատականների, վերջին տարիներին արձանագրված կարևոր առաջընթաց է: