Քաղծառայության բարեփոխումները՝ միջազգային համաժողովում
Այսօր Երևանում կայացել է «Քաղաքացիական ծառայության արդյունավետության բարձրացում. ընդհանուր գնահատման համակարգ և շարունակական կրթություն» խորագրով համաժողովը: Այն կազմակերպվել է ԵՄ Արևելյան գործընկերության Հանրային կառավարման բարեփոխումներ (ԱրԳ ՀԿԲ) պանելի ներքո՝ ՀՀ քաղաքացիական ծառայության խորհրդի և ԵՄ արտաքին գործերի եվրոպական ծառայության համագործակցությամբ:
ՀՀ քաղաքացիական ծառայության խորհրդի նախագահի մամուլի ծառայությունից տեղեկացնում են, որՀամաժողովն ուղղված է եղել ԱրԳ երկրներում քաղաքացիական ծառայության արդյունավետության բարձրացման նպատակով եվրոպական երկրների հանրային կառավարման ինստիտուտներում լայնորեն կիրառվող Ընդհանուր գնահատման համակարգ (Common Assessment Framework/CAF) ինքնագնահատման մոդելի մեթոդաբանության տեղայնացման հնարավորություններին և որակի կառավարման ժամանակակից մեխանիզմների կիրառման եվրոպական փորձին ծանոթանալուն: Քննարկման առարկա է դարձել նաև շարունակական կրթությունը քաղաքացիական ծառայողների մոտիվացման, նրանց կոմպետենտության և պրոֆեսիոնալիզմի մակարդակի բարձրացման արդյունավետ գործիք դարձնելու, ինչպես նաև վերապատրաստման մեթոդների արդիականացման խնդիրը:
Համաժողովին մասնակցել են ԱրԳ 5 երկրի՝ Հայաստանի, Վրաստանի, Ուկրաինայի, Մոլդովայի, Բելառուսի, ինչպես նաև ԵՄ անդամ երկրների քաղաքացիական ծառայության համակարգող մարմինների պատվիրակները (նշենք, որ համաժողովին մասնակցելու հրավեր է ուղարկվել նաև Ադրբեջանի քաղաքացիական ծառայության հանձնաժողով, սակայն հրավերը լռելյայն մերժվել է): Նրանք ներկայացրել են արդյունավետության գնահատման և պետական ծառայողների ուսուցման ուղղություններով իրենց երկրներում իրականացվող բարեփոխումների ընթացքը: Համաժողովին մասնակցում էին նաև ներկայացուցիչներ միջազգային, տեղական հասարակական կազմակերպություններից, գիտական հաստատություններիցն:
Համաժողովի բացման իր խոսքում ՀՀ ՔԾԽ նախագահ Մանվել Բադալյանը նշել է, որ պետության կողմից մատուցվող ծառայությունների որակի բարձրացումը պետք է առաջնահերթորեն խարսխված լինի քաղաքացիների պահանջների ժամանակին և ամբողջությամբ բավարարման վրա` նրանց կարիքների և ակնկալիքների անընդհատ վերլուծության, ծառայողների մասնագիտական գիտելիքների, հմտությունների ու կարողությունների հետևողական կատարելագործման միջոցով: Եվ պետակա մարմինների աշխատանքի արդյունավետության բարձրացման առումով անհրաժեշտ է հիմնվել քաղաքացիական ծառայողների շարունակական ուսուցման ապահովման գաղափարի վրա: Խորհրդի նախագահը տեղեկացրել է նաև, որ ՀՀ ՔԾԽ-ն սույն թվականի մայիսի սկզբին դարձել է Մաաստրիխտում տեղակայված Եվրոպայի հանրային կառավարման ինստիտուտի CAF ռեսուրս կենտրոնի Հայաստանի ազգային թղթակիցը, ինչը նոր նախադրյալներ է ստեղծում պետական ծառայության որակի գնահատման ժամանակակից տեխնոլոգիաները Հայաստանում տեղայնացնելու համար:
Համաժողովի մասնակիցներին ողջունել են նաև ՀՀ արտաքին գործերի փոխնախարար Կարեն Նազարյանը, Հայաստանում ԵՄ պատվիրակության ներկայացուցիչ Խոսե Մարիա Մեդինա Նավարոն և այլոք: Պարոն Նազարյանը հատկանշական է համարել, որ համաժողովն անցկացվում է Ռիգայում կայցած ԱրԳ գագաթաժողովից հետո, ինչը ևս մեկ անգամ հավաստում է հանրային կառավարման ոլորտում եվրոպական չափորոշիչներին համապատասխան բարեփոխումներ իրականացնելու Հայաստանի վճռականությունը: Պարոն Նավարոն հավելել է, որ Հայաստանում քաղաքացիական ծառայության բարեփոխումները եվրոպական քաղաքականության կարևորագույն ուղղություններից է, որն ուղղված է Կառավարության և քաղաքացիների միջև վստահության մակարդակի բարձրացմանը, փոխգործակցությանը:
Լրահոս
Տեսանյութեր
Սա քաղաքական գործընթաց է, անթույլատրելի քաղաքական որոշումներ. Թաթոյանը՝ սահմանազատման մասին