Ձեր վստահելի աղբյուրը

«Սա սկիզբն է շատ փոփոխությունների, վերջին 15 տարում այսքան ոգևորված չենք եղել»,- այս մասին այսօր լրագրողների հետ հանդիպման ժամանակ ասաց ռեժիսոր Սուրեն Շահվերդյանը՝ անդրադառնալով էլեկտրաէներգիայի սակագնի թանկացման դեմ Բաղրամյան պողոտայում օրեր շարունակ ընթացող բողոքի ակցիան:

«Ես որևէ լիդերի չեմ հավատացել և այսօր էլ չեմ հավատում, բայց այս սոցիալական համախմբումը ողջունում եմ»,- նշեց ռեժիսորը՝ հավելելով, որ Բաղրամյանում, երբ որևէ մեկն ուզում է լիդեր լինել, նրան անմիջապես «գահընկեց» են անում.«Սրանից լավ հոտ է գալիս»:

Ս.Շահվերդյանն անդրադառնալով «Ոչ թալանին» նախաձեռնության անդամների՝ Բաղրամյան պողոտայից հեռանալուն, ասաց, որ նորմալ է ընդունում այդ բաժանումը, քանի որ տղաները հասկացան ՝ ամբողջ պատասխանատվությունն իրենց վրա է ընկնում և չեն ցանկանում պատասխան տալ այդ մարդկանց համար:

«Վտանգավոր պահ էր, իսկ իրենք երիտասարդ են: Այդ վտանգավոր պահին ես առաջին գծում եմ եղել և զգացել եմ, որ լարված իրավիճակ էր: Լավ տղաներ են, ես զգում եմ, որ նրանք ազնիվ են, ֆանատներ են և ինչ-որ կերպ չեն ուղղորդվում, ուղղակի այդ պահին այդպես եղավ»,- նշեց ռեժիսորը:

Նա նաև ասաց, որ հպարտանում է այն երիտասարդներով, ովքեր գտնվում են Բաղրամյան պողոտայում. «Այնպիսի տղաներ կան, որոնցից մեր քաղաքական որոշ լիդերներ պետք է օրինակ վերցնեն»:

Ս.Շահվերդյանն անդրադարձավ նաև ոստիկանների պահվածքին:

«Այն դինոզավրերը չէ, որոնք հետևում կանգնած սպասում են, որպեսզի մարդկանց ջարդեն, մնացած ոստիկաններն իսկապես ըմռնումով են մոտենում, ներքին սիմպատիա ունեն բոլորի նկատմամբ: Ի վերջո այս թանկացումը նաև իրենց գրպանին էլ է կպնում»,- ասաց նա:

Ինչ վերաբերում է ոստիկանապետին, Ս.Շահվերդյանն նշեց, որ նա տիրապետում է իրավիճակին և թույլ չի տալիս, որ Բաղրամյանում բախումներ լինեն:

«Նույնիսկ մեկ-մեկ ինձ թվում է, թե ոստիկանապետը կարող է 180 աստիճան թեքվել և ասել՝ ժողովուրդ, ես Ձեզ հետ եմ: Այն օրը ցուցարարները մի պահ անկառավարելի էին, իսկապես հրահրողներ կային, բայց ոստիկանությունն այդ պահին իսկապես պրոֆեսիոնալ գործեց և բախումներ չեղան, ոստիկանապետն էլ կարողացավ լարվածությունը թուլացնել: Ի վերջո բախում ոչ մեկիս պետք չէ: Այս հարցը կարելի է լուծել միայն ու միայն խաղաղ ճանապարհով»,- ընդգծեց Սուրեն Շահվերդյանը և հավելեց. «Վստահ եմ, որ մեր ոստիկանությունը խոհեմ կգտնվի և կփորձի բալանսը պահել, որպեսզի ահավոր բաներ տեղի չունենան»:

Նախորդող հրապարակում՝
Այս բողոքից հետո այլևս նիրհ չի լինելու. Արվեստագետները` ակցիայի մասին