«Business Insider». Բացառիկ տեսանյութեր Հայոց Ցեղասպանությունից փրկվածների մասին
Այսօր Բոլոնիայում կայանալիք «Cinema Ritrovato» (Վերականգնված կինո) 29-րդ փառատոնի շրջանակներում կցուցադրվեն 1915թ-ի Հայոց Ցեղասպանությունից փրկվածների եզակի շարժական նկարներ: Այս մասին հաղորդում է «Business Insider»-ը:
Պարբերականը հաղորդում է, որ ԱՄՆ-ի Կոնգրեսի գրադարանում հայտնաբերվել են Հայոց ցեղասպանությունից փրկված հայերի բացառիկ տեսանյութեր, որոնցում պատկերված է, թե ինչպես են հայ փախստականներն ու որբ երեխաները տեղահանվում, այնուհետև՝ նավակներով հեռանում Թուրքիայից:
Տեսանյութերը բացառիկ են, քանի որ նախկինում համարվում էր, որ ցեղասպանության տարիներին Եղեռնից փախուստի դիմած հայերը պատկերված են եղել միայն լուսանկարներում: Այսպիսով, Կոնգրեսի գրադարանում հայտնաբերված տեսանյութերը հայերին ցեղասպանության տարիներին պատկերող առաջին հայտնի տեսագրություններն են:
Տեսանյութերը հաստատվել և վերականգնվել են մասնագետների կողմից և փառատոնի ժամանակ ցուցադրվելու են «Հայաստան՝ մարդասիրության բնօրրան» ընդհանուր վերնագրով:
Փառատոնի պատասխանատու Մերիան Լվինսքին, որի օգնությամբ բացահայտվել են այդ բացառիկ տեսանյութերը, պատմում է, որ տեսանյութերը նկարահանվել են 1923 թվականին Թուրքիայի տարածքում. «Ես նկատեցի, որ տեսագրությունների վրա Ստամբուլի հայտնի վայրերն են պատկերված: Դա Ստամբուլն է, և այնտեղ պատկերված է մանկատունը, որում պատերազմից հետո բրիտանացիները հայ որբ երեխաներին էին խնամում, մինչև Ստամբուլից նրանց տեղափոխելը»:
Լվինսքին պատմում է, որ տեսանյութերի բացահայտումն ուղղակի հրաշք էր: Մինչ Կոնգրեսի գրադարանում հայտնվելը, տեսանյութը պահվել է Օրեգոնի պատմական հասարակության պահոցում: Դրա հեղինակի անունը դեռևս անհայտ է մնում:
«Այս տեսանյութերի ցուցադրությունը մեզ համար հարգանքի տուրքի մատուցում է, մենք դրանք դիտարկում ենք որպես պատմական իրողություն: Ներկայումս մենք բանակցություններ ենք վարում Ստամբուլի կինոյի փառատոնի կազմակերպիչների հետ: Նրանք արտառոց մարդիկ են և հնարավոր է՝ այդ տեսանյութերը ցուցադրենք նաև Ստամբուլում», -ասում է Մերիան Լվինսքին:
Պարբերականի հաղորդմամբ`Բոլոնիայի 29-րդ կինոփառատոնի շրջանակներում ցուցադրվելու են նաև Համո Բեքնազարյանի «Նամուս», Սերգեյ Փարաջանովի «Սայաթ Նովա» և Հենրիկ Մալյանի «Նահապետ» ֆիլմերը, սակայն, կազմակերպիչների խոսքով, փառատոնի զմրուխտը «Հայաստան՝ մարդասիրության բնօրրան» նորահայտ բացառիկ տեսանյութն է լինելու:
Լրահոս
Տեսանյութեր
Նկարիչների միության շենքը պետականացնելուց հետո կարող է պայման դնեն՝ Արարատը չնկարեք . Փաստաբան