Երևանում այսուհետ կգործի Կովկասում ամենամեծ լոգիստիկ համալիրը
Երևանում այսօր բացվեց «Ուրբան լոգիստիկ Սերվիսիզ» բազմաֆունկցիոնալ համալիրը, որն ամբողջ Կովկասում միջազգային չափանիշներին համապատասխանող միակ լոգիստիկ կենտրոնն է: Կենտրոնի բացման պաշտոնական արարողությանը մասնակցում էր ՀՀ նախագահ Սերժ Սարգսյանը, էկոնոմիկայի նախարար Կարեն Ճշմարիտյանը, պաշտոնատար այլ անձինք:
Ինչպես կենտրոնի բացմանը նշեց «Ուրբան լոգիստիկ Սերվիսիզ» (ULS) կենտրոնի գլխավոր տնօրեն Վահե Պետրոսյանը, նախագծի մեկնարկը Հայաստանի տնտեսության համար խոշոր իրադարձություն է, որը կնպաստի Կովկասում Հայաստանի տարանցիկ դերի բարձրացմանն ու տնտեսության միջազգային ինտեգրմանը:
Շնորհիվ Հայաստանի յուրահատուկ աշխարհագրական դիրքի և նրա անդամակցությանը ԵՏՄ-ին, ըստ Վ.Պետրոսյանի, լոգիստիկ կենտրոնը նոր հնարավորություններ է ընձեռում Ասիայից և Մերձավոր Արևելքի երկրներից դեպի Վրաստան, Ռուսաստան, Բելառուս, ԵՄ երկրներ և հակառակ ուղղությամբ լոգիստիկայի իրականացման համար:
«Այսպիսի ենթակառուցվածքները հնարավորություն են տալիս, որպեսզի տնտեսությունում գործող ցանկացած սուբյեկտ, որը գործ ունի ապրանքանյութական պաշարների հետ, ավելի ռացիոնալ կարողանա կառավարել դրանք: Դա նշանակում է, որ նա կարող է լոգիստիկ կենտրոնի հզորությունները օգտագործելով ունենալ խնայողություններ՝ դրան ուղղելով պահեստային գործառնություններից դեպի արտադրական և առևտրային ենթակառուցվածքներ»,- ասաց Վ.Պետրոսյանը:
ՀՀ էկոնոմիկայի նախարար Կարեն Ճշմարիտյանն էլ նշեց, որ այս նախագծի իրականացումը զգալիորեն կբարձրացնի Հայաստանի տարածաշրջանային դերն ու նշանակությունը. «Ես շնորհավորում եմ բոլորիս հերթական ներդրումային նախաձեռնության և միջազգային չափանիշներով ենթակառուցվածք ունենալու առթիվ: Նման ժամանակակից բարձրակարգ համալիրի կառուցման և գործարկման ծրագիրն այլընտրանք չունի՝ քան հաջողելը և շարունակաբար ընդլայնելը: Նախագիծն ակնհայտորեն դիպուկ է, քանի որ լիարժեք համահունչ է տնտեսական քաղաքականության ընդունված ուղղություններին, տարեցտարի նոր թափ ստացող արտահանման վրա հիմնված արդյունաբերական քաղաքականության իրականացմանը»:
Կ.Ճշմարիտյանի խոսքերով՝ տնտեսական աճի ապահովման ծանրությունն աստիճանաբար տեղափոխվում է արտահանման կողմնորշման, մշակվող արդյունաբերության և գյուղատնտեսական մթերքների արտադրության ճյուղերում: Իրականացվող ոլորտային ռազմավարությունը միտված է այդ ճյուղերում մրցունակության բարձրացմանն ու տնտեսության արտահանելի հատվածի ընդլայնմանը, իսկ զարգացած և անխափան գործող ենթակառուցվածքը, ըստ նրա, դրա առաջնային երաշխիքներից է:
Այսպիսով, կարևորելով լոգիստիկ կենտրոնի առկայությունը, Կ.Ճշմարիտյանն ասաց, որ հայ գործարարներն արտաքին շուկաներ դուրս գալու համար ստիպված են հաղթահարել ավելին, քան նրանց մրցակիցները, փոխադրումների համար հատկացնելով լրացուցիչ ժամանակ և ծախսեր, և այստեղ արտահանման լոգիստիկայի արդյունավետ կառավարման միջոցով է հնարավոր դառնում կրճատել ծախսերն ու ամուր դիրքեր զբաղեցնել արտաքին շուկայում:
«Ի վերջո Հայաստանի միջազգային և տարածաշրջանային ինտեգրման խորացմանն ուղղված բոլոր նախաձեռնությունները կառուցված են այն համոզման վրա, որ մեր երկիրը դեռևս չիրացված, բայց լրջագույն ներուժ ունի խոշոր արտահանման շուկաները կամրջելու տեսանկյունից: Մի կողմից՝ Եվրասիական տնտեսական միության անդամակցությամբ խոշոր սպառողական շուկա մուտքը դյուրինացնելով, իսկ մյուս կողմից՝ Եվրամիության, ԱՄՆ-ի և այլ զարգացած երկրների հետ արտոնյալ առևտրային ռեժիմի շնորհիվ, մեր երկիրը իրական հնարավորություն ունի կարևոր հարթակ դառնալու օտարերկրյա ներդրումների, առևտրային հոսքերի և որպես տարանցիկ երկիր Հայաստանի հնարավորություններն ընդլայնելու համար»,- ընդգծեց Կարեն Ճշմարիտյանը:
Այսպիսով, ըստ նախարարի, ժամանակակից միջազգային չափանիշներին համապատասխանող ենթակառուցվածք ունենալը չափազանց կարևորվում է տարածաշրջանային համագործակցության ծրագրերում Հայաստանի ներգրավվածությունը ապահովելու համար: Օրինակ, ինչպես նշեց նախարարը, այդպիսի հեռանկարային և գլոբալ ծրագիր է Մետաքսի ճանապարհին նախագիծը, որը ենթադրում է պատշաճ ենթակառուցվածք և ծառայությունների մատուցման կարողություններ՝ Հայաստանը համընդհանուր առևտրային և ներդրումային հոսքերի արժեշղթայում դիրքավորելու համար:
«Նման նախագծերով մենք գործարար և ներդրումային խիստ ստանդարտներ ենք արմատավորում մեզանում, ինչն առաջավոր մշակույթ է ձևավորում երկրում գործարար փոխհարաբերություններում՝ դրանով իսկ մեծացնելով հայրենական շուկայի գրավչությունը»,- ասաց էկոնոմիկայի նախարարը:
Անդրադառնալով «Ուրբան լոգիստիկ Սերվիսիզ»-ին, Կ.Ճշմարիտյանը նշեց, որ ժամանակակից պահեստային ծառայություններ մատուցող բարձրակարգ լոգիստիկ կենտրոնն իր դռներն է բացում տեղական և օտարեկրյա շուրջ 500 կազմակերպությունների համար: Լոգիստիկ կենտրոնի կողմից առաջարկվող պայմաններն ու ծառայությունների որակն արդեն իսկ գնահատել են 100-ից ավելի հայրենական և միջազգային ընկերություններ:
«Կասկած չի հարուցում, որ համալիրը կարճ ժամանակահատվածում կհասնի նախատեսված հզորությունների լիարժեք գործարկմանը՝ արդեն իսկ ստեղծված 70 աշխատատեղին ավելացնելով ևս 230-ը»,- ասաց Կ.Ճշմարիտյանը:
Նշենք, որ ULS պահեստային համալիրի ընդհանուր մակերեսը շուրջ 7 հա է, բաղկացած է 45000 պալետատեղ հզորությամբ կենտրոնական պահեստից, 5000 քմ ընդհանուր մակերեսով վարձով տրվող թվով 15 պահեստային տարածքներից, 4500 խմ տարողությամբ 9 սառնարանային պահեստներից և 1200 քմ մակերեսով գրասենյակային տարածքից: Բազմաֆունկցիոնալ լոգիստիկ համալիրն առաջարկում է մի շարք ծառայություններ` պահեստային տարածքի տրամադրում, ապրանքների փոխադրում և բեռնաթափում, փոխադրման և առաքման ռեգիստրի կառավարում, փաթեթավորում, ապրանքի առաքում և այլն:
Նախորդող հրապարակում՝
Նախագահը ներկա է գտնվել «Ուրբան լոգիստիսկ սերվիսիզ» կենտրոնի բացման արարողությանը
Լրահոս
Տեսանյութեր
Փաշինյան, «5-րդ շարասյուն», ներսի ցեցեր. Ըստ քաղաքացիների՝ ՀՀ-ի անվտանգության հիմնական սպառնալիքները