Շոգ օրերին ՋՕԸ-ները կբավարարեն ոռոգման ջրի պահանջվող քանակը
Հուլիսի 30-31-ին և օգոստոսի 1-3-ին հանրապետության տարածքը կգտնվի արևադարձային տաք օդային հոսանքների ազդեցության գոտում, հատկապես հովտային գոտիներում գյուղատնտեսական մշակաբույսերի մոտ կդիտվի ջրազրկում, որից խուսափելու համար անհրաժեշտ է խիստ կերպով վերահսկել ոռոգման ռեժիմը: Սա տարածել է ՏԿԱԻՆ-ը:
Panorama.am-ը մշակաբույսերի ջրազրկումը կանխելու գյուղացիների՝ կատարելիք քայլերի վերաբերյալ մանրամասներ փորձեց ճշտել գյուղատնտեսության նախարարությունից: Պարզվեց, բոլորը մարզերում են, ու առանձնապես ասելիք էլ չկա՝ պետք է ամեն օր ոռոգել: Այսքանը մեզ փոխանցեց ԳՆ տեղեկատվության և հասարակայնության հետ կապերի բաժնի պետ Սոֆի Սիմոնյանը, ասաց՝ համաձայնեցրել է փոխնախարարների հետ:
Ջրային տնտեսության պետական կոմիտեի մամուլի քարտուղար Աննա Մուրադյանը Panorama.am-ի հետ զրույցում հավաստիացրեց, որ ոռոգման համար նախատեսված ջուրը պակասություն չի անի: Սևանից ոչ մի կաթիլ ավել ջուր բաց չի թողնվի: Նրա խոսքով, երկու օր առաջվա տվյալներով, օգտագործվել է ջրամբարներում կուտակած ջրի ընդամենը 50 տոկոսը:
Կոմիտեի պաշտոնական էջում օրերս հրապարակված տեղեկատվության համաձայն, ՋՕԸ-երի կողմից սպասարկվող ոռոգելի հողատարածքների մակերեսը 2015 թ. կազմում է շուրջ 131.000 հա:
Ոռոգման ջրի հայտերը ձևավորվում են ըստ առկա պահանջարկի: 2015թ. հուլիսի 27-ի դրությամբ հողоգտագործողներին և գյուղացիական տնտեսություններին փաստացի մատակարարված ջրտուքը կազմել է 324 մլն խ/մ: Բավարարվել են բոլոր հայտերը: Ավելին՝ բավարավել են նաև լրացուցիչ պահանջված ջրաքանակները:
Ս.թ. հուլիսի 27-ի դրությամբ Սևանա լճի մակարդակը 1900.48 մետր է, Սևանա լճից ոռոգման նպատակով բաց է թողնվել շուրջ 109.1 մլն խորանարդ մետր ջուր, նախորդ տարվա նույն ժամանակաշրջանի շուրջ 193.4 մլն խորանարդ մետրի փոխարեն:
Միաժամանակ, Արփա-Սևան թունելով Սևանա լիճ է տեղափոխվել շուրջ 97.8 մլն խորանարդ մետր ջուր: Սևանա լճի մակարդակը 27.04.2015թ. կազմել է 1900.48 մ: Ներկայիս դրությամբ արձանագրվել է Սևանի մակարդակի դրական դինամիկա: