Ձեր վստահելի աղբյուրը

Այսօր Բաղրամյան պողոտայից բերման ենթարկված քաղաքացիներն ազատ են արձակվել: «Ոչ թալանին» նախաձեռնության անդամ Մաքսիմ Սարգսյանը, ով բերման ենթարկվածների մեջ էր, ասաց, որ ոստիկանության Արաբկիրի բաժնում իր հետ գտնվող քաղաքացիներն ազատ են արձակվել:

Նախաձեռնության անդամ Արտուշ Չիբուխչյանն ասաց, որ իրենց բերման էին ենթարկել ոստիկանների պահանջները՝ չփակել փողոցի երթևեկելի հատվածը, չհատել փողոցը ոչ նախատեսված մասից, չկատարելու համար:

Նախաձեռնության անդամները հայտարարեցին, որ այսօր դադարեցնում են իրենց ակցիան, երթով շարժվում են Հանրապետության հրապարակ, որտեղ ակցիա է անում «Ոտքի Հայաստան» նախաձեռնությունը: Նրանք հայտարարեցին, որ Հանրապետության հրապարակից նույնպես կան բերման ենթարկվածներ:

Մաքսիմ Սարգսյանը տեղեկացրեց, որ իրենք սեպտեմբերի 11-ին Ազատության հրապարակում հանրահավաք են անցկացնելու:

Լրագրողների հետ զրույցում Երևանի փոխոստիկանապետ Վալերի Օսիպյանն ասաց, որ ինքն էլ  դեմ էլեկտրաէներգիայի թանկացմանը, սակայն դա չի նշանակում, որ թանկացման դեմ պետք է պայքարել նման ճանապարհով: Նրա խոսքով, ակտիվիստներն արհեստական բախում են ստեղծում ոստիկանների հետ՝ հանրությանը փողոց հանելու համար:
Երևանի փոխոստիկանապետի խոսքով, ոստիկանները ուժ չեն կիրառել ցուցարարների նկատմամբ, հակառակը՝ հավաքի մասնակիցներն անընդհատ հրահրել են ոստիկաններին. «Մենք երկար ժամանակ ուզում էինք բացատրել, համոզել, բայց իրենք մեզ թիրախ ընտրեցին: Մեզ հայհոյում էին, մեզ հարվածում էին, մեզ վրա ջուր էին լցնում»:

Պատասխանելով հարցին, թե որքա՞ն եք վճարում էլեկտրաէներգիայի դիմաց, Վ. Օսիպյանն ասել է. «Ճիշտն ասած՝ ես տեղյակ չեմ, ես չեմ վճարում, այլ մայրս, բայց դա բավականին գումար է և ինձ համար էլ խնդիր է։ Պատկերացնում եմ՝ որքան դժվար է ավելի ցածր պաշտոն զբաղեցնող անձանց համար, քանի որ իմ աշխատավարձն ավելին է, քան նրանցը»։

«Ոչ թալանին» նախաձեռնությունը հայտարարել էր, որ այսօրվանից վերսկսում է փողոցային պայքարը: Նրանք իրենց բողոքի ակցիան սկսեցին Սիրահարների այգում, այնուհետև ցանկանում էին փակել Բաղրամյան պողոտան՝ Բաղրամյան-Պռոշյան հատվածում: Ոստիկանները թույլ չէին տալիս:

Նախորդող հրապարակումներ՝
Բաղրամյանում սպասում են 8 անց 20-ին (լուսանկարներ)
«Ոչ թալանին». Բաղրամյանից քաղաքացիներ են բերման ենթարկվել
«Ոչ թալանին». Հնարավոր է Բաղրամյանի կրկնությունը