Ձեր վստահելի աղբյուրը

«Փայլուն պատկերացնում եմ, որ և՛ կպիտակավորեն, և՛ կվիրավորեն, և՛ կհայհոյեն», -այսօր Ազգային ժողովում Սահամանդրության նախագծի քվեարկությունից հետո լրագրողների հետ զրույցում հայտարարեց ԱԺ «Ժառանգություն» խմբակցության անդամ Թևան Պողոսյանը` պատասխանելով հարցին, թե պատրա՞ստ է, որ Նախագծին կողմ քվեարկելուց հետո արժանանալ ընդդիմության կողմից «հաճախորդ» պիտակավորմանը:

Նրա խոսքով, ինքն իր քվեարկությամբ հետևել է նախընտրական ծրագրերին, որոնք Սահամանդրության փոփոխությամբ, ըստ էության կյանքի են կոչվում:

«Մի բան պետք է հաշվի առնեն բոլորը` եթե 2012 թվականին ընտրական ծրագրերը իրականում արժեք են ներկայացրել, այլ ոչ թե ժողովրդի աչքին թոզ փչելու համար են ներկայացվել, ապա պետք է յուրաքանչյուր քաղաքական ուժ առաջնորդվի իր ծրագրերով, ինչի համար քվե է ստացել` անկախ այն բանից, թե քանի տոկոս է ստացած քվեն», -նկատեց պատգամավորը:

Բացի այդ, նա 15 տարվա պայքարի արդյունք է համարում Սահամանդրությամբ բարձրացվող քաղաքացիական հասարակության գործունեության պայմանների բարելավման հարցը:

«Ամեն մարդ իր աշխատելու ոճն ունի: Պատրաստ եմ, վստահ եմ, գիտակցում եմ, բայց նաև գիտակցում եմ, որ ժամանակի ընթացքում աշխատանքը ու դրա արդյունքն է լինելու ճիշտ գնահատականը», -հավելեց Պողոսյանը:

Մեր հարցին, թե շարունակելո՞ւ է աշխատել «Ժառանգություն» խմբակցության կազմում Պողոսյանը պատասխանեց, որ եկել է խորհրդարան իրականացնելու ծրագրերը, որոնց կողմ է եղել ժամանակին:

«Իմ աշխատանքը կատարելու եմ այնքան, որքան հնարավոր է: Բոլորդ գիտեք, որ խմբակցությունում հիմա յուրահատուկ իրավիճակ է ստեղծվել, որտեղ «Ժառանգություն» կուսակցությունից միայն Զարուհի Փոստանջյանն է: Բայց հուսով եմ, որ կձևավորվի մի տարբերակ, որտեղ աշխատանքները հնարավորինս կշարունակվեն»,-ասաց պատգամավորը:

Նշենք, որ Սահմանադրության փոփոխությունների նախագծին «Ժառանգություն» խմբակցությունից դեմ էր միայն Զարուհի Փոստանջյանը: Այդ խմբակցության կազմում խորհրդարանական մանդատ ստացած Ռուբիկ Հակոբյանը, Թևան Պողոսյանը, Ալեքսանդր Արզումանյանը կողմ էին քվեարկել Նախագծին:

Հարակից հրապարակում`
Ովքեր են դեմ քվեարկել Սահմանադրության փոփոխությունների նախագծին