Մարտի 11-ին ԱՄՆ Պետդեպարտամենտը հրապարակել է աշխարհում մարդու իրավունքների պահպանման վերաբերյալ ամենամյա զեկույցը: Ադրբեջանին նվիրված հատվածում մանրամասն անդրադարձ է կատարվել այդ ոլորտին: Զեկույցում մասնավորապես ասված է, որ Ադրբեջանում լրջորեն խախտվում են մարդու իրավունքները բոլոր ոլորտներում:

Ըստ զեկույցի, Իլհամ Ալիևը 2008 թվականի հոկտեմբերին վերընտրվել է, և ընտրությունները չեն համապատասխանել ժողովրդավարական չափանիշներին: Ընտրությունների ժամանակ խախտումները դրսևորվել են ոստիկանական ուժերի և ԶԼՄ-նրի գործունեության սահմանափակումներով, դիտորդների վրա գործադրած ճնշումներով, ձայների սխալ հաշվարկով և ընտրությունների արդյունքներով:

Զեկույցում հատուկ անդրադարձ է կատարվել իրավապահ համակարգում իրականացվող խոշտանգումներին: Նշվում է 2009 թ. ոստիկանական բաժանմունքներում, ազատազրկման վայրերում մահվան 4 դեպքերի մասին` Վագիֆ Սուլեյմանով, Թոգլուր Մամեդզադե, Ռուստամ Ալիև, Ագա Թուրաբով: Մասնավոր աղբյուրների փոխանցմամբ` կալանավայրերում խոշտանգումների ու կտտանքների ենթարկվածների թիվը 81-ից աճել է` հասնելով 131-ի:

Կալանավայրերում պայմանները դեռ շարունակում են ծանր մնալ` չնայած բանտային համակարգի բարելավման գործընթացներին: Կալանավայրերի գերբեռնվածությունը, սննդի անբավարարությունը հանգեցնում են կալանավայրերում վարակիչ հիվանդությունների տարածմանը: Դա առաջին հերթին վերաբերում է Գոբուստանի խիստ ռեժիմի գաղութին, որտեղ կալանավորները ենթարկվում են ֆիզիկական և սեռական բռնությունների:

Զեկույցում ասվում է, որ 889 կալանավորներ վարակված են թոքախտով, իսկ անցած տարվա ընթացքում 18 կալանավոր մահացել է այդ հիվանդության պատճառով: