Այսօր Սբ. Գրիգոր Լուսավորիչ եկեղեցու բակում տեղի ունեցավ մեծ ծառատունկ, որը և խորհրդանշեց Խաղաղության այգու ստեղծումը: Ծառատունկին մասնակցեցին կառավարության, Հայ Առաքելական Եկեղեցու ներկայացուցիչներ, Հանրապետությունում Մեծ Բրիտանիայի դեսպանը, Երևանի քաղաքապետ Գագիկ Բեգլարյանը, «ՎիվաՍել» ընկրության գլխավոր տնօրեն Ռալֆ Յիրիկյանը, Վայրի բնության և մշակութային արժեքների պահպանության հիմնադրամի տնօրեն Ռուբեն Խաչատրյանն ու այլք:

Ռ. Խաչատրյանի խոսքերով, տասը օրերի ընթացում Հանրապետության տարբեր տարածքներում ծառատունկ ու աղբահանություն է իրականացվել: «Հազարավոր ծառեր են տնկվել, բայց կարևորը ոչ միայն տնկելն է, այլև նրանց խնամելը: Հիմանկանում դրանք տնկում ենք դպրոցների բակերում, ու ծառերի խնամքի պարտականությունն աշխակերտներն իրենց վրա են վերցնում»,- ասաց նա: Ըստ հիմնադրամի տնօրենի, Խաղաղության այգու հարակից տարածքում շուրջ 500-ի չափ ծառեր են տնկված: Իսկ այսօր, ծառատունկի համար, հիմնականում, ընտրվել են սոսի, հացենի, լորենի ծառատեսակները: Ընտրությունը, ինչպես նա նշեց, մանագետների խորհրդով է կատարվել:

Իսկ «ՎիվաՍել-ՄՏՍ» ընկերության գլխավոր տնօրեն Ռալֆ Յիրիկյանը, ով ծառատունկի էր եկել իր երեխաների հետ, կարևորեց շրջակա միջավայրի պահպանության խնդիրը: Ըստ նրա, սա դաստիարակչական դեր կխաղա երեխաների համար, ովքեր մասնակցում են ծառատունկին: «Երեխան փոքր տարիքից պետք է հասկանա միջավայրի մաքրության, կանաչապատելու կարևորությունը: Այս մտածելակերպը կմեծանա երեխաների հետ, ու իրենք էլ հետագա սերունդը կդաստիարակեն նույն ոգով»,- ասաց Ռ. Յիրիկյանը:

Չնայած ծառատունկի կազմակերպիչները պետք է հետևեն, որ նորատունկ ծառերը ժամանակին ջրվեն ու խնամվեն, Ռ. Յիրիկյանը նշեց, որ ինքն էլ է հետամուտ լինելու այդ խնդրին: