Լոռու մարզի ոստիկանությունից նախօրեին տեղեկություն է ստացվել, որ ավտովթար է տեղի ունեցել մարզի Ամրակից գյուղի մերձակայքում: Դեռևս չպարզված հանգամանքներում «Մերսեդես» մակնիշի ավտոմեքենան դուրս է եկել ճանապարհի երթևեկելի մասից ու հարվածել ծառին, ինչի հետևանքով կար տուժած, և նրան դուրս բերելու համար անհրաժեշտ էր փրկարարների օգնությունը:
Արտակարգ իրավիճակների նախարարության Հայաստանի փրկարար ծառայության տեղեկատվության և հասարակայնության հետ կապերի բաժնի տեղեկատվության համաձայն, դեպքի վայր է մեկնել Լոռու մարզային փրկարարական վարչության փրկարար ջոկատը:
Փրկարարներն ավտոմեքենայից դուրս են բերել վարորդին` 1975 թ. ծնված Ա. Բժոյանին, ով տարբեր աստիճանների մարմնական վնասվածքներով տեղափոխվել է Ստեփանավանի հիվանդանոց: Ա. Բժոյանը հիվանդանոցում մահացել է:
Նույն օրը, աղբյուրի տեղեկացմամբ, ոստիկանությունից ստացված տեղեկության համաձայն` Վաղարշապատ-Արմավիր ավտոճանապարհի 5-րդ կիլոմետրում (հարավսլավացի զոհված փրկարարների հուշարձանի մոտ) տեղի է ունեցել ավտովթար: Դեռևս չպարզված հանգամանքներում` «ԲՄՎ-745» մակնիշի ավտոմեքենան դուրս է եկել ճանապարհի երթևեկելի մասից ու շրջվել: Դեպքի վայր է մեկնել մեկ մարտական հաշվարկ և Արմավիրի մարզային փրկարարական վարչության փրկարար ջոկատը:
Փրկարարները Գ. Տեր-Ադամյանին պատկանող ավտոմեքենայից դուրս են բերել ուղևորներ` 1973 թ. ծնված Ա. Միսկարյանի և 1974 թ. ծնված Գ. Խանդիլյանի դիակները, ինչպես նաև տուժած վարորդին` Երևանի բնակիչ, 1983 թ. ծնված Է. Տեր-Ադամյանին, որը տարբեր աստիճանների մարմնական վնասվածքներով տեղափոխվել է Վաղարշապատի հիվանդանոց: Բժիշկները տուժածի վիճակը ծայրահեղ ծանր են գնահատում:
Նշենք նաև, նույն օրը, հրդեհ է բռնկվել Արարատի մարզի Ոստան գյուղում:
Դեպքի վայր է մեկնել երկու մարտական հաշվարկ: Հրդեհը մեկուսացվել է, այրվել է Ա. Միքայելյանին պատկանող թոնրատունը` 21 քմ մակերեսով: