«Արևորդի» փառատոն` բեմահարթակ բնապահպանական խնդիրների քննարկման համար
Արդեն միջազգային «Արևորդի» 2-րդ բնապահպանական փառատոնը կմեկնարկի հոկտեմբերի 25-ին: Այս մասին այսօր լրագրողների հետ հանդիպման ժամանակ ասաց Վայրի բնության և մշակութային արժեքների պահպանության հիմնադրամի ղեկավար Ռուբեն Խաչատրյանը: Նրա խոսքով, փառատոնի նպատակը մեկն է թե տարածաշրջանում, թե «աշխարհի քարտեզում» մի բեմահարթակ ունենալ, որտեղ լուրջ հարթության վրա կքննարկվեն բնապահպանական խնդիրները:
«Ինչպես գիտենք, ամբողջ աշխարհում բնապահպանական կրթությունն առաջին տեղում է, թե հասարակության մեջ, թե պետական կառույցներում, ինչպես նաև բիզնես դաշտում»,-ասաց Ռ. Խաչատրյանը:
Նրա խոսքով, փառատոնի ընթացքում սպասվելիք միջոցառումների ծավալը շատ բզամաշերտ է: Ներկայացվելու է 85 ֆիլմ 30 երկրներից, որոնցից 16-ը ընդգրկված են մրցութային, իսկ 35-ը` տեղեկատվական ծրագրում:
Ինչպես նշեց Ռ. Խաչատրյանը, ուշադրության կենտրոնում ունենալով երեխաներին ու երիտասարդներին` փառատոնը ֆիլմային ծրագիր է նախատեսել նաև նրանց համար: Իսկ փառատոնի ընթացքում կազմակերպված բոլոր ցուցահանդեսներն ազատ մուտք կունենան:
«Բիզնես դաշտի համար կարևոր մի նորություն ունենք, առաջին անգամ փորձելու ենք կորպորատիվ սոցիալական պատասխանատվության սեմինար կազմակերպել, դրա համար էլ միջազգային դաշտում շատ կարևոր հյուրեր ենք հրավիրել»,-ասաց Ռ. Խաչատրյանը:
Փառատոնի գործընկեր` «ՎիվաՍել» ընկերության գլխավոր տնօրեն Ռալֆ Յիրիկյանը, կարևորելով փառատոնն ու անդրադառնալով փառատոնի ընթացքում անցկացվող կորպորատիվ սոցիալական պատասխանատվությանը նվիրված սեմինարներին, նշեց, որ կորպորատիվ քաղաքացիները պետք է զգան այդ պատասխանատվությունը և հասկանան, թե ինչպես պետք է գործունեություն ծավալեն և շահույթի հետևից գնան, այնպես էլ պետք է պատասխանատու լինեն աշխատակազմի, հասարակության, տնտեսության ու երկրի հանդեպ:
Բացի այդ, Ռ. Յիրիկյանը նշեց, որ շատ կարևոր է հասկանալ, թե ինչպե՞ս պետք է պահպանել բնությունը, ինչպե՞ս պետք է շրջակա միջավայրը մաքուր պահել:
«Շատ կարևոր է, որ մենք սովորեցնենք ու դաստիարակենք երեխաներին, որ մի քիչ ավելի լայն հորիզոններով մտածեն, մի քիչ հեռու նայեն և հասկանան, թե ինչքան է կարևոր, որ ոչ միայն պետք է մաքուր պահպանել իրենց տունը, այլ` իրենց փողոցը, գյուղը, քաղաքը, շրջանը կամ երկիրը»,-ասաց Ռ. Յիրիկյանը:
Ընկերության տնօրենի խոսքով, բնությունը կամ բնապահպանությունը չի սահմանափակվում միայն յուրաքանչյուրիս տան սահմաններից ներս, նա նկատեց, որ պետք է հոգալ հայրենիքի, երկրի մաքրության մասին: շ
«Մենք մեր բնությունը պահպանելով` կկարողանանք ստեղծել ավելի առողջ միջավայր, որն իր առողջ հետևանքները կունենա այսօրվա և վաղվա սերնդի վրա», - ընդգծեց Ռ. Յիրիկյանը:
Նշենք, որ «Արևորդի» 2-րդ միջազգային փառատոնի մեկնարկը կազդարարեն երեխաներն ու երիտասարդները` հանրապետությունում առաջին անգամ կազմակերպվող կենդանիների դիմակահանդես-քայլերթով:
Նախորդող նորություն` Երևանում կմեկնարկի «Արևորդի» 2-րդ միջազգային բնապահպանական փառատոնը
Բնապահպանական դիմակահանդես-երթ` ի պաշտպանություն կենդանիների