Ազատ արտահայտման պաշտպանության « Article 19» միջազգային կազմակերպությունն ադրբեջանական իշխանություններին կոչ է արել ազատ արձակել բլոգերներ Էմին Միլլին և Ադնան Գաջիզադեին: Այս մասին գրում է «Թուրան» լրատվական գործակալությունը:

Կազմակերպության տարածած հայտարարության մեջ ասվում է, որ Ադրբեջանի վճռաբեկ դատարանը` երիտասարդ ակտիվիստների գործի քննության ժամանակ, պետք է անկողմնակալ վերաբերմունք դրսևորի: Նշվում է, որ բլոգերների ձերբակալությունն ու նրանց ազատազրկման ենթարկելու փաստը հստակ քաղաքական դրդապատճառներ ունեն:

«Ադրբեջանին, ազատ արտահայտման նկատմամբ նվիրվածություն ցուցաբերելու համար, անհրաժեշտ է վերանայել Էմին Միլլի և Ադնան Գաջիզադեի նկատմամբ կայացված դատավճիռը»,- հայտարարել է «Article 19» կազմակերպության ղեկավար Անես Քալամարը:

««Article 19» կազմակերպությունն անհանգստությամբ նշում է, որ լրագրողներն ու ԶԼՄ-ի ներկայացուցիչներն իրենց պրոֆեսիոնալ գործունեության համար ահաբեկումների, հարձակումների և հետապնդումների են ենթարկվում: Միաժամանակ, ընդդիմադիրներին և անկախ լրագրողներին պատժելու համար, երկրում գործածվում է զրպարտանքի մեղադրանքը»,- նշվում է փաստաթղթում:

Հիշեցնենք, որ Բաքվի վճռաբեկ դատարանը բլոգերների հարցով քննությունը սկսելու է հունվարի 8-ին: Մինչ այդ, նոյեմբերի 12-ին, նրանք դատապարտվել էին համապատասխանաբար 2 և 2.5 տարվա ազատազրկման: