«Երկրի Օր 2010 Հայաստան». մի շարք միջոցառումներ Երկրի օրվա 40-րդ հոբելյանի առիթվ
«Երտասարդ կենսաբանների ասոցիացիա» ՀԿ, Երևանի էկոլոգիական տեղեկատվության հասարակական «Օրհուս» կենտրոնները և «Էյ Թի Փի» բարեգործական հիմնադրամը (Հայաստան ծառատունկ ծրագիր), հանդիսանալով Earth Day Network-ի պաշտոնական գործընկերները Հայաստանում, կազմակերպում են մի շարք բնապահպանական միջոցառումներ նշելու Երկրի օրվա 40-րդ հոբելյանը: Այս մասին հայտնում են կազմակերպիչները:
Ապրլի 15-22 ընկած ժամանակահատվածում ամբողջ աշխարհում զանազան միջոցառումներ են կազմակերպվում նշելու «Երկրի օրը»: Այդ միջոցառումների իրականացման գործին անմասն չի մնա նաև Հայաստանը: Նախատեսվում է իրականացնել մի շարք միջոցառումներ, որոնք նպատակ են ունենալու ազգաբնակչության ուշադրությունն հրավիրել դեպի կլիմայի փոփոխության և ընդհանրապես բնապահպանության հարցերին և հիմնախնդիրներին: Միջոցառումների ընթացքում տարածվելու են ուսուցողական նյութեր, որոնք կիրազեկեն հասարակությանը բնապահպանության խնդիրների, կանաչ ապրելակերպի և տեխնոլոգիաների վերաբերյալ, ինչպես նաև կընդգծեն մեր երկրի հարուստ կենսաբազմազանության արժևորման և պահպանման անհրաժեշտությունը: «Երկրի Օր 2010 Հայաստան»-ը մի հրաշալի հնարավորություն է բոլորիս միավորվելու` սերունդների համար «կանաչ» ու առողջ ապագա կերտելու նպատակով: «Երկրի օրվա» տոնակատարություններին միացել են ավելի քան մեկ միլիարդ մարդկանց 190 երկրներից:
Հայաստանում Երկրի օրվա 40-րդ հոբելյանի առթիվ կազմակերպվելու է սեմինար «Ինչպես ապրել կանաչ և կանգնեցնել կլիմայի փոփոխությունը», ինչպես նաև Հայաստանում «կանաչ ապրելակերպի» խթանմանը նվիրված ստորագրահավաքի արդյունքների հրապարակում:
«Երկրի Օր 2010 Հայաստան»-ի շրջանակներում տեղի կունենա «Ինչպես ապրել կանաչ և կանգնեցնել կլիմայի փոփոխությունը» սեմինարը, որի ընթացքում իրենց ելույթներով հանդես կգան կլիմայի փոփոխության ոլորտի ակնառու գիտնականներ, Հայաստանում «կանաչ ապրելակերպը» որդեգրած կազմակերպությունների ներկայացուցիչներ, բնապահպաններ: Սեմինարի ավարտին նախատեսվում է կլիմայի փոփոփության հիմնախնդրի վերաբերյալ ֆիլմի ցուցադրում:
Ապրիլի 1-ին սկսել ու մինչև 14-ը շարունակվելու է «Երկրի Օր 2010 Հայաստան»-ի շրջանակներում ստորագրահավաք` ի աջակցություն «կանաչ ապրելակերպ»-ին Հայաստանում: Ստորագրահավաքը նպատակ ունի առաջարկներ ներկայացնել ՀՀ կառավարությանը և խրախուսել մասնավոր սեկտորի կազմակերպություններին` որդեգրել «կանաչ ապրելակերպ»: «Կանաչ ապրելակերպը» խթանող ստորագրահավաքի արդյունքներ կհրապարակվեն սեմինարի սկզբին:
Երկրի օրվա 40րդ հոբելյանի շրջանակներում «Էյ Թի Փի» բարեգործական հիմնադրամը, «Երիտասարդ կենսաբանների ասոցիացիա» ՀԿ և Էկոլոգիական տեղեկատվության հասարակական «Օրհուս» կենտրոնները կազմակերպում են ծառատունկ Նոր Նորքի Սբ. Սարգիս եկեղեցու շրջակայքում: Ծառատունկը տեղի կունենա ապրիլի 16-ին: Վերոհիշյալ կազմակերպությունները, ինչպես նաև ներկայացուցիչներ այլ միջազգային և պետական կառույցներից և դեսպանատներից ներկա կգտնվեն միջոցառմանը և կտնկեն 200 տնկի` ցույց տալով իրենց նվիրվածությունը շրջակա միջավայրի պահպանության գործում, մասնակիցը դառնալով համայն աշխարհում տեղի ունեցող «Երկրի օրվա» տոնակատարություններին:
Հայ մշակույթի և սպորտի ներկայացուցիչները նույնպես ներկա կգտնվեն մեր “կանաչ” նախաձեռնությանը:
Միջոցառումների շրջանակներում կկազմակերպվի «Ժամանակն է խոսելու» քննարկումը` նվիրված կլիմայի փոփոխության հիմնախնդրին:
Ապրիլի 22-ին, ժամը 16:00-ին «Երկրի օր 2010 Հայաստան» միջոցառումների շրջանակներում Երևանի մանկական այգում (նախկին Կիրովի այգին) տեղի կունենա մի ուրախ տոնակատարություն նվիրված «րկրի օրվա» 40-րդ հոբելյանին: Միջոցառման ընթացքում նախատեսվում է կազմակերպել «Ապրի´ր կանաչ» խորագրով նկարչական մրցույթ: Մրցույթի մասնակից կարող են դառնալ մինչև 12 տարեկան երեխաները: Այն մասնակիցները, որոնք կցուցաբերեն անհատական մոտեցում և հետաքրքիր գաղափարներ կպատկերեն, կարժանանան մրցանակների: Տոնակատարության ընթացքում կկազմակերպվեն մրցույթներ, խաղեր, զվարճալի և հետաքրքրաշարժ բեմադրություններ, ինչպես նաև Հայաստանի բնաշխարհը պատկերող ցուցահանդես:
Լրահոս
Տեսանյութեր
Սա քաղաքական գործընթաց է, անթույլատրելի քաղաքական որոշումներ. Թաթոյանը՝ սահմանազատման մասին