«Տաթևի թևեր» ճոպանուղին հոկտեմբերի 16-ին կընդունի առաջին հյուրերին

15:08 12/10/2010 » Հասարակություն

«Տաթևի թևեր» ճոպանուղին հոկտեմբերի 16-ին կընդունի առաջին հյուրերին

Հայաստանի ազգային մրցունակության հիմնադրամի գործադիր տնօրեն Բեկոր Փափազյանը և հիմնադրամի խորհրդի անդամներն, ու ծրագրի գործընկերներն այսօր ամփոփեցին «Տաթևի վերածնունդ» ծրագրի արդյունքները:

Հիմնադրամի գործադիր տնօրեն Բեկոր Փափազյանն իր խոսքում նշեց, որ հոկտեմբերի 16-ին կլինի Տաթևի վերածնունդ ծրագրի պաշտոնական մեկնարկը, որը ներառում է 3 հիմնական բաղադրիչներ՝ Տաթևի վանքի վերանորոգումը, համայնքների զարգացումը և զբոսաշրջության ենթակառցվածքների կառուցումը: Բեկոր Փափազյանի կարծիքով, ծրագրի շրջանակներում տեխնիկապես ամենամեծ մարտահրավերը ճոպանուղու կառուցումն էր:

«Այսօր արդեն կարող եմ ասել, որ ունենք 100% անվտանգ կառույց: Ճոպանուղին փորձարկվել է և պատրաստ է ընդունել իր առաջին պաշտոնական ուղևորներին: Հոկտեմբերի 16-ին ճոպանուղու տեխնիկական բացման օրն է, իսկ մեկ շաբաթ անց, ամսի 23-ին կլինի ճոպանուղու շահագործման հանձնումը և դա կլինի հանրային միջոցառում: Ամսի 16-ին ներկա կլինեն միայն հրավիրված անձինք: Մյուսները կարող են միջոցառմանը հետևել հեռուստատեսությամբ, միջոցառումը հեռարձակվելու է ուղիղ եթերով»,- նշեց Բեկոր Փափազյանը:

Ճոպանուղու առաջին ուղևորները լինելու են Տաթևի հարևանությամբ գտնվող 6 համայքներից 6 երեխաներ, ովքեր ուղեկցելու են ՀՀ նախագահ Սերժ Սարգսյանին, և Ամենայն Հայոց կաթողիկոս Գարեգին Բ-ին:

Ի դեպ, Տաթևի ճոպանուղին այսօրվա դրությամբ աշխարհում ամենաերկարն է: Հայաստանի ազգային մրցունակության հիմնադրամն արդեն բանակցում է Գինեսի ռեկորդների գրասենյակի հետ, որպեսզի այդ փաստն ընդունվի պաշտոնապես:

«Ամերիա» ընկերությունների խմբի գործադիր տնօրեն Անդրեյ Մկրտչյանը նշեց, որ ընկերության համար մեծ պատիվ է նման աննախադեպ ծրագրին աջակցելն ու մասնակից լինելը:

«Սա մասնավոր և պետական հատվածների համագործակցության փայլուն օրինակ է»,-նշեց Անդրեյ Մկրտչյանը:

«Վիվասել-ՄՏՍ» ընկերության գլխավոր տնօրեն Ռալֆ Յիրիկյանն էլ խորհուրդ տվեց չմոռանալ, որ Տաթևը որպես վանական համալիր մեզ համար բավականին հարուստ հոգևոր ժառանգություն է, որը պետք է պահել և փոխանցել սերունդներին: Նրա կարծիքով, այս ծրագրի շնորհիվ մեր հայրենիքի անունը միջազգային ասպարեզում կլինի ավելի հայտնի և ճանաչելի:

Նշենք, որ ծրագրի շրջանակներում վերանորոգվել է Սիսիանից մինչև Տաթև տանող ճանապարհը, որի բացումը ևս կլինի հոկտեմբերի 16-ին:

Աղբյուր` Panorama.am

Share |

Տպագրական տարբերակ

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter:

↓ Վերջին նորություններ
Շարունակել

Օրացույց