Իսկական տղամարդը չի ծեծում. Ամուսնու և սկեսրոջ կողմից ծեծված Մարիամը դատախազության առջև էր
«Ինչ պատժի արժանի են, թող պատժեն: Մատղաշ էրեխեքին անբախտացրին, ծեծին ու արունլվա արին». ամուսնու և սկեսրոջ կողմից դաժան ծեծի ենթարկված 20-ամյա Մարիամ Գևորգյանի հայրը` Համազասպ Գևորգյանն ուղղակի ուզում է, որ դստերն «անբախտացնողներն» իրենց արժանի պատիժն ստանան և այսօր այդ պահանջով էլ Մարիամի հետ եկել էր Գլխավոր դատախազություն:
Այս աղջնակի ամուսնական տխուր պատմությունը, որը հրապարակվեց «Հետք»-ում, գրավեց հայաստանյան կանանց իրավունքներով զբաղվող հասարակական կազմակերպությունների ուշադրությունը, և այսօր այդ ՀԿ-ների կոալիցիան փոքրիկ ակցիա էր կազմակերպել Գլխավոր դատախազության շենքի առջև` այդպիսով փորձելով խնդրի վրա հրավիրել նաև իրավապահ մարմինների ուշադրությունը:
Արարատի մարզի գյուղերից մեկում մեծացած Մարիամին երկու տարի առաջ Ռուսաստանում ապրող Հայկանուշ Միքայելյանը Գևորգյաններից խնդրել է իրենց դստերը՝ 20-ամյա Մարիամին, կնության տալ իր ավագ որդուն՝ 26-ամյա Դավիթ Զիրոյանին: Հայկանուշը խոսքի մեջ պատմել է, որ որդին ամուսնալուծված է. հարսը տեսողության հետ խնդիրներ է ունեցել, ինչ-որ բորբոքման պատճառով աջ աչքը կուրացել է, և նա, Դավիթին չդժբախտացնելու պատճառաբանությամբ, որդուն լքել է: Գևորգյանները վստահության խնդիր առհասարակ չեն ունեցել. Հայկանուշը նրանց միջնեկ դստեր սկեսուրի հարազատ քույրն է:
«Ես իրանց ճանաչել եմ, էնպես չի, որ չեմ շփվել, մոր հետ խոսել եմ, տղայի հետ մի ամիս կապ ունեցել եմ», -իր նախկին ամուսնու մասին այսօր ասաց Մարիամը` նշելով, որ երբեք չի պատկերացրել, որ նրանք այդքան դաժան կգտնվեն իր նկատմամբ: Մարիամը, պարզվում է, միակը չէ, որ կտտանքների է ենթարկվել Զիրոյանների ընտանիքում: «Նրա առաջին կինն էլ հո մի շենք էն կողմ է ապրելուց էղել: Հո իրանք էլ գիտեին էդ ընտանիքին, հարց ու փորձ էին արել, ճանաչել էին», -այսօր ասում էր աղջիկը:
Ինչպես գրել էր «Հետք»-ը, այդ տղայի առաջին կինը` Մոնիկան (անունը պայմանական է-թղթ.), Սանկտ-Պետերբուրգում ապրող Դավիթ Զիրոյանի հետ ամուսնացել է 18 տարեկանում: Երեքամյա «ամուսնական» կյանքից հետո աղջիկը հայրական տուն է վերադարձել հաշմանդամ դարձած. նրա մարմնի տարբեր հատվածներում առկա են վնասվածքների հետքերը, իսկ ձախ աչքն այլևս չի տեսնում:
«Սկզբում` մոտ երկու ամիս, ամեն ինչ նորմալ էր, հետո սկեսուրիս գժությունները սկսվեցին: Դավիթն ինձ շատ էր սիրում, իսկ մայրը դրանից վատ էր զգում, խանդում էր: Որդուն տրամադրում էր, որ ինձ ծեծի: Հետո արդեն ինքն էր (Հայկանուշը) ամբողջ օրը ծեծում», - պարբերականին պատմել է Մոնիկան և ասել, որ Դավիթը տարբեր տարողությամբ «զակատ արած բանկաներ» է կոտրել գլխին, իսկ սկեսուրը մազերն այնպես է քաշել, որ փունջ-փունջ պոկվել է:
Մոնիկան այսօր դատախազության առջև կազմակերպված ակցիային չէր եկել: «Ամաչում է», բացատրեցին նրա ընկերները:
«Տղան կանգնում ու ասում է, փող է տվել, պատժից ազատվել է, մորն էլ է ազատելու: Ուղղակի դիմում եմ, մեր ոստիկանապետին, դատախազին` օրենքն ո՞ւր է: Ես իմ և Մոնիկայի անունից պահանջում եմ, որ ոստիկանապետը և դատախազը արժանի, օրենքով նախատեսված պատիժ տան էդ մարդկանց. նրանք երկու կյանք են ոչնչացրել», -պահանջը ներկայացնում էր Մարիամը:
Դեռատի աղջիկն ասաց, որ կարողացել է Արարտի մարզպետի աջակցությամբ վիրահատել քիթը և այժմ ժպտում է: «Կարողացել եմ էսօր ուժ գտնել ու գալ, ամոթ, ամեն ինչ մոռացել եմ», -ասում էր նա:
Մոնիկան և Մարիամը ոստիկանությունում հաղորդում են տվել 2010-ի հոկտեմբերի 25-ին: Հարուցված քրեական գործի շրջանակներում սկեսրոջը` Հայկանուշ Միքայելյանին մեղադրանք է առաջադրվել առանձնակի դաժանությամբ «Դիտավորությամբ ուրիշի առողջությանը միջին ծանրության և ծանր վնաս պատճառելու» հատկանիշներով, նրա նկատմամբ խափանման միջոց է ընտրվել կալանավորումը և հայտարարվել է հետախուզում:
Այնուհետև Դավիթին է մեղադրանք առաջադրվում` ՔՕ «Դիտավորությամբ ուրիշի առողջությանը միջին ծանրության վնաս պատճառելու» (բայց առանց «առանձնակի դաժանության») և «Ծեծ» հոդվածների հատկանիշներով: Ըստ պարբերականի, գործով քննիչ Արթուր Ավետյանը որոշել է քրեական գործի վարույթը կասեցնել` մեղադրյալների «գտնվելու վայրը պարզված չլինելու պատճառով»: Այնինչ տուժողները Զիրոյանների սանկտպետերբուրգյան հասցեն ի սկզբանե հայտնել են, իսկ Հայաստանը ՌԴ-ի հետ նման իրավիճակներում համագործակցելու անհրաժեշտ պայմանագրերը վաղուց ստորագրել է:
Այս տարվա օգոստոսի 20-ին հետախուզման մեջ գտնվող Դավիթ Զիրոյանը Սանկտ-Պետերբուրգ-Երևան չվերթով ժամանել է Հայաստան և մեղայականով ներկայացել ոստիկանության Արտաշատի բաժին: Նրա նկատմամբ ընտրված` «ստորագրություն չհեռանալու մասին» խափանման միջոցը վերացվել է և համաներման հիման վրա Դավիթի նկատմամբ քրեական հետապնդումը դադարեցվել է: Նա անարգել վերադարձել է Ռուսաստան:
Մարիամի հայրն ասաց, որ այսօր առավոտյան տեղեկացել է` Դավիթ Զիրոյանը Հայաստանում է: «Ասել են, որ մորն էլ են բերելու: Արդարությունը դանդաղ է շարժվում, բայց, փառք Աստծո, լավ կլինի, որովհետև իրենք էլ երեխա ունեն», -ակնարկելով արդարադատություն իրականացնողներին, ասաց Համազասպ Գևորգյանը:
Դատախազության առջև հայ կանայք պահել էին պաստառներ` «Կանայք, իմացեք ձեր իրավունքները», «Լռությունը չի պաշտպանի քեզ», «Իսկական տղամարդը չի ծեծում, բռնությունը սեր չէ» լոզունգներով: Դատախազությունից պահանջատեր կանանց մոտեցավ ու նրանց հուզող հարցը լսեց հիմնարկի աշխատակցուհիներից մեկը, վերցրեց անհրաժեշտ տվյալներն ու փաստաթղթերը, հույս տվեց, որ «մեղավորները կպատժվեն» ու հեռացավ: