Գերմանացիների` ադրբեջանցի փախստականներին նվիրած ավտոմեքենաները վաճառվել են
Բաքվում անցկացված «Եվրատեսիլ-2012»-ին հետևելու համար 666 գերմանացիներ Ադրբեջան են այցելել իրենց անձնական 240 ավտոմեքենաներով, որոնք հետո նվիրել են ադրբեջանցի փախստականներին և հարկադիր վերաբնակներին ու հայրենիք վերադարձել ինքնաթիռով: Այդ ակցիայի վերաբերյալ ընդարձակ ռեպորտաժ է հեռարձակել «Խազար» հեռուստաալիքը:
Բարեգործական ակցիան անցկացրած գերմանացիները Allgeau-Orient ռալլիի մասնակիցներն են: Ռալլիին 20 երկրներից 111 թիմ (335 ավտոմեքենա և 666 մասնակից) է միացել: Նրանք Գերմանիայի Օբերշտաուն քաղաքից դեպի Ադրբեջանի մայրաքաղաք Բաքու 9000 կմ երկարությամբ` աշխարհում ամենամեծ ավտոերթն են անցկացրել:
«Ենի Մուսավաթն» այդ կապակցությամբ գրում է, որ Ադրբեջանի փախստականների և հարկադիր վերաբնակների գործերով պետական կոմիտեի մամուլի ծառայության ղեկավար Էլչին Գադիմովն ասել է, որ իրենք նման տեղեկատվություն չունեն: Թերթին հասած նվիրատվությունը ցանկացել են կատարել այդ կոմիտեի միջոցով, սակայն վերջինս հրաժարվել է առաջարկից:
Գերմանացիների նվիրած ավտոմեքենաների ճակատագրի վերաբերյալ տարբեր ասեկոսեներ են շրջանառվում: Թերթի տեղեկություններով` նվիրված ավտոմեքենաների մեծ մասն արդեն վաճառվել է: Բինագադիի շրջանում նրանց կայանատեղիում արդեն 50 ավտոմեքենա է մնացել: Շրջակայքի խանութներից մեկի վաճառողը թերթի թղթակցին ասել է, որ ավտոմեքենաների կեսը մի քանի օր առաջ տարվել է անհայտ ուղղությամբ: Ավտոմեքենաները տեսնողները նրանց վիճակը լավ են գնահատել և ասել, որ իրենք գիտեն, որ գերմանացիները դրանք նվիրել են փախստականներին, սակայն ոչ մի փախստական ավտոմեքենա չի ստացել: «Մեզ ասացին, որ փախստականների կոմիտեն գերմանացիների նվերը չի ընդունել: Ինչպես երևում է` այժմ դրանք հանվել են շուկա վաճառքի», -ասել են շրջակայքում բնակվող քաղաքացիները:
Լրահոս
Տեսանյութեր
Սա քաղաքական գործընթաց է, անթույլատրելի քաղաքական որոշումներ. Թաթոյանը՝ սահմանազատման մասին