Ձեր վստահելի աղբյուրը

Մինչև Մաքսային Միությանը Հայաստանի միանալու պայմանագրի ստորագրումը, նախատեսվում է, որ Հայաստանի և Ռուսաստանի միջև կստորագրվի երկու պայմանագիր, որոնք Ռուսաստանում բնակվող հայ միգրանտների համար կստեղծեն բարենպաստ պայմաններ:

Այս մասին այսօր լրագրողների հետ հանդիպման ժամանակ հայտնեց ՀՀ արտաքին գործերի փոխնախարար Շավարշ Քոչարյանը` հավելելով, որ միգրացիոն ռեժիմի հարցը քննարկվել է նաև Սոչիում` Հայաստանի և Ռուսաստանի վարչապետների հանդիպման ժամանակ:

Շ.Քոչարյանի խոսքերով` Ռուսաստանը կարգուկանոն է հաստատում միգրացիոն ոլորտում` անօրինական բնակությունից և աշխատանքային գործունեությունից իր տարածքը պաշտպանելու համար, ինչպես դա անում է Եվրամիությունը: Մինչդեռ, ըստ նրա, ՄՄ անդամ պետությունների միջև գործում են այլ ռեժիմներ, որոնք ավելի դյուրին կլինեն ՀՀ քաղաքացիների համար:

Փոխնախարարի փոխանցմամբ` «Ճանապարհային քարտեզը» նախատեսում է, որ ՄՄ-ն միանալուց հետո Հայաստանը պետք է ստորագրի երկու պայմանագիր: Մի պայմանագիրը երկկողմ փաստաթուղթ է, որը կանոնակարգում է ժամանակավոր բնակությունը այս կամ այն երկրում, տվյալ դեպքում` Ռուսաստանում: Երկրորդ պայմանագիրը բոլոր անդամ պետությունների պայմանագիրն է աշխատանքային միգրացիայի վերաբերյալ: «Ո՞րն է մեր առաջարկությունը, որն ըմբռնումով է ընդունել ռուսական կողմը: Առաջարկությունը հետևյալն է` եկեք այդ պայմանագրերի վրա սկսենք աշխատել ոչ թե ՄՄ-ը միանալուց հետո, այլ հիմա»,- ասաց Շ.Քոչարյանը:

Ըստ նրա` մոտավորապես սա է այն սխեման, որը ենթադրում է` եթե Հայաստանը ստորագրում է այդ երկու պայմանագրերը Ռուսաստանի հետ, ապա հայտնվում է նույն արտոնյալ վիճակում, որում այսօր գտնվում են ՄՄ անդամ պետությունները, իսկ հետագայում` Եվրասիական միության անդամ երկրները:

Շ.Քոչարյանի խոսքերով` միգրացիոն օրենքների հետ կապված նաև այլ հարցեր կան, որոնք ևս քննարկվել են Ռուսաստանի հետ, քանի որ այդ օրենքը իր մեջ պարունակում է այնպիսի դրույթներ, որոնք ամեն ինչ մինչև վերջ հաշվի չեն առել: «Օրինակ` երբ ամուսիններից մեկը ՀՀ քաղաքացի է, մյուսը` Ռուսաստանի, բնակվում են Ռուսաստանում և ընտանիքի անդամ ՀՀ քաղաքացին ինչ-որ ժամանակ խախատում է կատարել, ապա իրեն թույլ չեն տալիս բնակվել այդ երկրում, այսինքն` բաժանում են ընտանիքը, որը հասկանալի է որևէ տրամաբանության մեջ չի տեղավորվում»,- նշեց փոխնախարարը:

Այս և այլ խնդիրները ևս քննարկվել են և, Շ.Քոչարյանը հույս հայտնեց, որ դրանք իրենց լուծումները կգտնեն: «Համենայնդեպս, վարչապետները հանձնարարական տվել են և երկու կողմն էլ այդ ուղղությամբ սկսել են աշխատանքները»,- ընդգծեց փոխնախարարը:

Հիշեցնենք, որ 2014թ. հունվարի 1-ից սկսած` ՌԴ առանց վիզա մուտքի իրավունք ունեցող պետությունների (այդ թվում` Հայաստանի Հանրապետության) քաղաքացիները կարող են ՌԴ տարածքում մնալ 90 օր` յուրաքանչյուր 180 օրվա ընթացքում: Դա նշանակում է, որ այդ պետությունների քաղաքացիները Ռուսաստանում 90 օր գտնվելուց հետո այլևս չեն կարող հատել Ռուսաստանի սահմանը և անմիջապես հետ վերադառնալ: