Հովիկ Աբրահամյանի վարչապետության անդրանիկ նիստը`ապրիլի 17-ին
ՀՀ կառավարության ապրիլի 17-ի նիստը կլինի Հովիկ Աբրահամյանի՝ որպես վարչապետ, անդրանիկ նիստը:
Նիստի օրակարգում այս պահին ընդգրկված է 21 հարց: Դրանցից մեկն առնչվում է զբաղվածության խնդրին: Մասնավորապես, կառավարության հաստատմանն է ներկայացվել «Զբաղվածության մասին» ՀՀ օրենքի կիրարկումն ապահովող մի շարք իրավական ակտեր:
Այսպես, սույն կարգով կարգավորվում են աշխատանք փնտրող անձի կարիքների գնահատման, աշխատանք փնտրող անձի կարիքների գնահատման մասին ամփոփ եզրակացությունում ներառվելիք տեղեկությունների ցանկի հետ կապված հարաբերությունները, սահմանվում են աշխատանք փնտրող անձի կարիքների գնահատման համար անհրաժեշտ հիմքերը:
Սահմանվում է նաև, որ աշխատանք փնտրող անձի գնահատումն իրականացնում է Հայաստանի Հանրապետությունում նրա փաստացի բնակության վայրը սպասարկող` աշխատանքի և սոցիալական հարցերի նախարարության աշխատակազմի Զբաղվածության պետական գործակալության տարածքային կենտրոնը:
«Աշխատանքային կարիքների գնահատման նպատակն աշխատանք փնտրող անձին «Զբաղվածության մասին» Հայաստանի Հանրապետության օրենքի 6-րդ հոդվածով սահմանված հարմար աշխատանքի տեղավորվմանը նպաստելն է և այդ ճանապարհով կայուն զբաղվածության ապահովումը»,- նշված է նախագծում:
Հիմնավորման մեջ նշվում է նաև, որ զբաղվածության ռազմավարության գերակա նպատակների իրականացման շրջանակներում զբաղվածության պետական կարգավորման բնագավառում մեկնարկել են համալիր բարեփոխումներ` զբաղվածության ակտիվ քաղաքականության անցման օբյեկտիվ անհրաժեշտությամբ պայմանավորված: Մասնավորապես, արդեն իսկ Օրենքն ամրագրում է զբաղվածության ակտիվ քաղաքականության իրավական հիմքերը: Օրենքով նախատեսված է, որ զբաղվածության պետական կարգավորումը պետք է ունենա բացառապես ակտիվ բնույթ, այսինքն` գործող և նոր ներդրվող պետական ծրագրերը պետք է նպատակաուղվեն գործազուրկների, այդ թվում առավելապես` աշխատաշուկայում անմրցունակ անձանց մշտական աշխատանքով կամ ինքնազբաղվածության ապահովմանը:
2014թ. պետական բյուջում զբաղվածության կարգավորման ամենամյա պետական ծրագրի իրականացման համար նախատեսված է շուրջ 2,338 մլրդ ՀՀ դրամ, որից շուրջ 718 մլն ՀՀ դրամը նախատեսված է մինչև Օրենքն ուժի մեջ մտնելը նշանակված գործազրկության նպաստների վճարումը շարունակելու և ավարտելու համար, իսկ հիմնական մասը` շուրջ 1,620 մլրդ ՀՀ դրամ, ուղղվելու է հետևյալ ակտիվ ծրագրերի իրականացմանը` մասնագիտական ուսուցման կազմակերպում, այլ վայր աշխատանքի տեղավորման աջակցություն, ինքնազբաղվածության խթանման նպատակով փոքր ձեռնարկատիրության աջակցություն, աշխատավարձի մասնակի փոխհատուցում գործատուին, - ժամանակավոր զբաղվածության խթանման միջոցով գյուղացիական տնտեսության աջակցություն, աշխատանքի տոնավաճառի կազմակերպում, մասնագիտական աշխատանքային փորձ չունեցող անձանց աշխատանքային պրակտիկայի կազմակերպում, աշխատաշուկայում անմրցունակ անձին աշխատանքի տեղավորման համար միանվագ փոխհատուցում գործատուին, որը ներառում է` այդ անձի աշխատատեղի հարմարեցման և/կամ աշխատանքային որոշակի կարողություններ և ունակություններ ձեռք բերելու աջակցությունը, աջակցություն աշխատանքի տեղավորման ոչ պետական կազմա¬կեր¬պության ծառայություններից օգտվելու համար, հարմար աշխատանքի տեղավորման նպատակով գործատուներին այցելության ծախսերի փոխհատուցում: