Ձեր վստահելի աղբյուրը

Ազգային Ժողովում ընթացքող «Ճանապարհային երթևեկության կանոնների խախտումների համար վարչական պատասխանատվությունը, ճանապարհային անվտանգության ապահովման միջոցների կիրառումը և ավտոկայանատեղերի գործունեության կազմակերպումը» խորագրով խորհրդարանական լսումների ժամանակ ունեցած ելույթում ՀՀ ոստիկանապետի տեղակալ Արթուր Օսիկյանը անդրադարձավ այն հարցերին, որոնք նախապես հրավիրված քննարկումների ժամանակ բարձրացրել են ԱԺ չորս ոչ իշխանական խմբակցությունները:

Մասնավորապես, անդրադառնալով ԲՀԿ խմբակցության հարցին, թե որքանով են համաչափ տուգանված անձանց եկամուտները տուգանքի սահմանված չափի հետ, Ա.Օսիկյանն ասաց, որ նման պրակտիկա մեր երկրում չկա` դիտարկել քաղաքացու անցած տարի ստացած եկամուտի ճափը: Իսկ ինչ վերաբերում է ընդհանուր հարցին, թե արդյո՞ք համաչափ է ՀՀ քաղաքացու ստացած եկամուտն ու սահմանված տուգանքները, ապա, նշեց Օսիկյանը, դրանք հիմնականում համաչափ են: Բացատրեց` եթե տուգանքները լինեն 500 կամ 1000 դրամ, ապա դա չի հանդիսանա զսպող, որպեսզի հաջորդ անգամ ևս խախտում կատարած վարորդն, օրինակ, չգերազանցի արագությունը:

«Մենք ուսումնասիրել ենք նաև Շվեյցարիայի փորձը, որտեղ տուգանքը սահմանվում է ըստ նախորդ տարի ստացված եկամուտի, սակայն մեր մոտեցումն այլ է»,- նշեց նա:

Անդրադառնալով մյուս հարցին, թե որքանով է արդարացված նկարահանող սարքերի ու արագաչափերի տեղադրումը, Ա.Օսիկյանը մեջբերեց պաշտոնական վիճակագրությունը և օրինակ բերելով մասնավորապես Լենինգրադյան փողոցում տեղադրված արագաչափ սարքը նշեց, որ երկու տարվա ընթացքում խախտումները 86 տոկոսով նվազել են:

«Սա ցույց է տալիս, որ մեր քաղաքացիները հետևում են երթևեկությանը և գոնե արագաչափերը զսպում են նրանց: Ավելին ասեմ` 2012թ-ի համեմատ Երևանում 30 տոկոսով նվազել է մահվան ելքով վթարների թիվը: Այնպես, որ ես կարող եմ ասել, որ արագաչափ սարքերի տեղադրումը արդարացված է» ,- նշեց փոխոստիկանապետը:

Օսիկյանը տեղեկացրեց նաև, որ ներկայումս Երևանի խաչմերուկներում տեղադրված է 391 տեսախցիկ:

Հիշեցնենք, հենց քառյակի նախաձեռնությամբ է, որ անցկացվում են այս թեմային նվիրված լսումներ, իսկ իրենց առաջարկություններն ու հարցերը ներկայացրել են այդ նպատակով ստեղծված աշխատանքային խմբի քննարկումների ժամանակ, որոնց էլ անդրադառնում են հիմնական զեկուցողները:

Նախորդիվ`

Լսումներ առանց ավելորդ հարցերի. Ի՞նչ խնդիրներ ունենք ճանապարհներին