Ձեր վստահելի աղբյուրը

Հայ հասարակության շրջանում մայիսին չամուսնանալը գալիս է նախահայկյան օրացույցից: Այս մասին ասուլիսում ասաց ՀՀ ԳԱԱ Վիկտոր Համբարձումյանի տուն-թանգարանի տնօրեն, աստղագետ, տոմարագետ Գրիգոր Բրուտյանը:

«Մայիսին չամուսնանալը մեր կրոնի մեջ չէ: Երկար ժամանակ մեզ էլ հայտնի չի եղել, թե որտեղից է եկել այդ սովորությունը: Հայտնի դարձավ, երբ ծանոթացանք հին ժամանակների հայկական օրացույցի հետ, որը եղել է Հայկ նահապետի՝ այստեղ գալուց առաջ: Մենք այն պայմանական անվանում ենք նախահայկյան»,- նշեց նա:

Աստղագետի խոսքով, ծանոթանալով այդ օրացույցին, մայիսին չամուսնանալու սովորույթին կարող են տալ պարզ, աստղագիտական բացատրություն. «Նախահայկյան օրացույցում տարեմուտը եղել է ամառնամուտից մոտ մեկ շաբաթ առաջ: Այդ տոնական իրադարձությանը նախորդել է յոթանասունօրյա արգելքների շրջան՝ կապված հիմնական անդրաշխարհի ու իգական սկզբի գաղափարների հետ: Դա գալիս է օրացույցի աստղագիտական հիմքից: Այդ ընթացքում արգելված են եղել ամուսնական հարաբերությունները, հետևաբար նաև ամուսնանալը: Այդ արգելքի շրջանն ավարտվել է ամանորի տոնով, որը եղել է տոնաշարք՝ մի ամբողջ շաբաթ և այդ տոնաշարքի մեջ առանցքային դեր է ունեցել ծիսական ամուսնությունը»:

Ինչ վերաբերում է այն հարցին, որ բացի արգելված լինելուն նաև դժբախտություն է բերում, Գ. Բրուտյանը տվեց հետևյալ բացատրությունը. «Տվյալ ամսին արգելված է եղել, սակայն նրանք, ովքեր գնում են այդ քայլին, նրանց մեջ վախ է լինում, ինչը մշտապես լինում է նրանց գիտակցության մեջ, որ արգելված բան են արել: Դա սկսում է մարդուն խանգարել, քանի որ օրենք է խախտել: Մտածմունքների մեջ լինելով, կարող են, օրինակ, մարդիկ գնալ ու ընկնել փոսը»: