Ձեր վստահելի աղբյուրը

Սևանա լճի ստորջրյա ավազանի գիտահետազոտական արշավ իրականացնող խմբի անդամներն այսօր լրագրողների հետ հանդիպման ժամանակ ներկայացրեցին Սևանա լճի ստորջրյա հինգերորդ ֆրանս-հայկական գիտարշավի նպատակներն ու արդյունքները, ինչպես նաև լճի ստորջրյա մասում նոր բացահայտված տեսարժան վայրերը:

Ստորջրյա հետազոտությունների և սուզումների հայկական կենտրոնի (ՍՀՍՀԿ) սուզորդ Կլոդ Թուլումջանյանը նշեց, որ Սևանա լճի ստորջրյա հատվածում իրականացնում է նոր տեսարժան վայրերի բացահայտում: Ամենատպավորիչ հայտնաբերումը, ըստ ֆրանսահայ սուզորդի, այն էր, որ ջրի տակից՝ ավազի մի հատվածից պղպջակներ էին դուրս ելնում:

Նրա խոսքերով` Սևանա լճի ստորջրյա հատվածը չափազանց մեծ է: Սուզորդները վերջին 5 տարիների ընթացքում կարողացել են շատ քիչ տոկոսը հետազոտել: Այնտեղ նկարահանումներ անելու և գիտական տեսանկյունից նոր բացահայտումներ անելու համար պրոֆեսիոնալ ջրասուզակների մեծ կարիք կա: Դա մի կողմից կնպաստի գիտության և տուրիզմի զարգացմանը, մյուս կողմից էլ կստիպի ավելի մեծ խնամքով վերաբերվել քաղցրահամ ջրի պաշարին:

Կ.Թուլումջյանի խոսքերով` այս տարի հայտնաբերել են մոտ քսան, քսանհինգ մետր խորության վրա ժայռեր, ինչը լճի համար կարելի է ասել հետաքրքիր երևույթ է:

«Այս տարի ուսումնասիրել ենք նաև թերակղզու հետևի մասը, և այնտեղ ևս հետաքրքրություններ կային, մինչև քսանհինգ մետր խորության վրա հետաքրքիր տեսարաններ են բացվում»,- ասաց նա` հավելելով, որ լճի բուսական և կենդանական աշխարհը շատ զարգացած է:

Երկրաբանական գիտությունների դոկտոր, ՀՀ ԳԱԱ գիտնական Արա Ավագյանը անդրադառնալով լճի խնդրիրներին` նշեց, որ շատ խիստ է էկոլոգիական վիճակը:

«Մեր վերաբերմունքը մեր հարստությանը շատ վատ է: Չթվարկենք, թե ինչքան աղբ կար ավազանում: Սա իսկապես ահազանգ է, դա շատ է վնասում էկոլոգիային, ինչպես նաև վտանգում է շարժունակությունը»,- ասաց նա` հավելելով, որ եթե կա ցանկություն, Ստորջրյա հետազոտությունների և սուզումների հայկական կենտրոնը պատրաստ է իր ունեցած ռեսուրսներով նպաստել այս կամ այն գիտական հետազոտություն իրականացնելուն:

Ա.Ավագյանի խոսքերով` իրականում հսկայական աշխատանք կա անելու Սևանի ավազանի ուսումնասիրության առումով:

Կենտրոնի անդամ Մամիկոն Հակոբյանը հայտարարեց, թե ովքեր ցանկություն ունեն սովորել սուզվել, կարող են կապ հաստատել իր հետ, մասնակցել դասընթացներին և ստանալ սերտիֆիկատ: