Դիջիթեք Էքսպո 2014-ը մասնագիտական կողմնորոշման լավագույն հնարավորություններից է
Հոկտեմբերի 3-5-ը Երևանում կայանալիք Դիջիթեք Էքսպո 2014 10-րդ տեխնոլոգիական միջազգային ցուցահանդեսը ավանդաբար հանդիսանում է մասնագիտական կողմնորոշման լավագույն հարթակներից մեկը, որտեղ կներկայացվեն տեխնոլոգիական կրթության ոլորտի ամենաարդիական լուծումները և մեթոդները։ Դիջիթեք Էքսպոն հնարավորություն է տալիս Հայաստանի սպառողներին և պրոֆեսիոնալ համայնքին հաղորդակից դառնալ համաշխարհային տեխնոլոգիական զարգացումներին, որոնցից շատերն անմիջականորեն առնչվում են կրթությանը: Այս մասին հայտնում էն «Դիջիթեք»-ից:
Հայաստանում ներդրված են մի շարք արդիական կրթական ծրագրեր, որոնք ի զորու են պատրաստել բարձրակարգ և մրցունակ մասնագետներ Հայաստանի և աշխարհի տեխնոլոգիական ոլորտի համար:
Ձեռնարկությունների Ինկուբատոր հիմնադրամը ցուցահանդեսին ներկայացնում է Հայ-հնդկական ՏՀՏ գերազանցության կենտրոնը, Ազգային ճարտարագիտական լաբորատորիան (ANEL), Մայքրոսոֆթ ինովացիոն կենտրոնը, Հարավային Կովկասի եւ Կենտրոնական Ասիայի Մոբայլ լուծումների տարածաշրջանային լաբորատորիան (mLab ECA),Գյումրու տեխնոլոգիական կենտրոնը (GTC) և այլն:
«Հայաստանյան ՏՏ ընկերությունները կարող են առաջարկել միջազգային ստանդարտներին համապատասխան արտադրանք ու ծառայություններ, հայկական կազմակերպություններից շատերն աշխատում են գլոբալ շուկաներում: Կարևոր մարտահրավերներից մեկը որակյալ մասնագետների շարունակական մուտքը դեպի ոլորտ ապահովելն է, որը լուրջ խթան կլինի ոլորտի հետագա զարգացման համար»,- ասել է Ձեռնարկությունների Ինկուբատոր հիմնադրամի տնօրեն Բագրատ Ենգիբարյանը:
«Ուսուցման հանդեպ նոր մոտեցումները փոխում են կրթության շրջանակն ամեն տեղ, ուր տեխնոլոգիաները հասանելի են մարդկանց: Թումոյի առաքելությունն այդ նոր մոտեցումների կիրառումն է ի նպաստ երիտասարդների՝ քաջալերելով նրանց բացահայտելու սեփական ողջ ներուժը»,- ասել է Թումո ստեղծարար տեխնոլոգիաների կենտրոնի տնօրեն Մարի Լու Փափազյանը:
Ինստիգեյթ ընկերությունը Դիջիթեք էքսպո 2014-ում կազմակերպելու է կրթական նոր մոտեցումների լուսաբանում, դրանց վրա հիմնված սեփական ծրագրերի (լաբորատորիաների), գործիքների ցուցադրումներ, ինչպես նաև դասախոսություններ։
«Նաիրի ՏՏ համընկերության կողմից մշակված կրթական ծրագրերը նպատակ ունեն դպրոցականներին ուղղորդել տեխնիկական ոլորտներ։ Ուսումնառության գործընթացը կազմակերպվում է գործնական խնդիրների լուծման շուրջ, խթանելով ստեղծագործ մտածելակերպ, անհատականություն, քաջալերում է նախաձեռնությունը, թիմային աշխատանքն ու համագործակցությունը»,- նշել է Ինստիգեյթ ընկերության տնօրեն Արման Պողոսյանը:
«Դիջիթեք Էքսպո 2014 10-րդ տեխնոլոգիական միջազգային ցուցահանդեսի յուրաքանչյուր այցելու վստահությամբ է համակվելու Հայաստանի տեխնոլոգիական ապագայի նկատմամբ, երիտասարդները՝ իրենց մասնագիտական ընտրության, գործարարներն՝ իրենց բիզնեսում տեխնոլոգիաների լայն կիրառման համար հստակ որոշում կայացրած»,- ասել է Ինֆորմացիոն տեխնոլոգիաների ձեռնարկությունների միության գործ. տնօրեն Կարեն Վարդանյանը:
Դիջիթեք Էքսպո 2014 10-րդ տեխնոլոգիական միջազգային ցուցահանդեսի կազմակերպիչն է Ինֆորմացիոն տեխնոլոգիաների ձեռնարկությունների միությունը:
Լրահոս
Տեսանյութեր
Ամեն սարի գլխին, փեշին, անտառներում հայկական հետքեր են. Քաշաթաղի հուշարձանները՝ մեկ գրքում