Գյումրիում երկրաշարժից հետո անօթևան մնացած ընտանիքների համար այլևս բնակարաններ չեն կառուցվելո՞ւ
Աղետի գոտու հետ կապված, մասնավորապես վարչապետ Հովիկ Աբրահամյանի այցից հետո, լուրջ ուսումնասիրություններ են կատարվել, կա հստակ մոտեցում՝ Գյումրիում դեռևս անօթևան մնացած 430 ընտանիքի համար ոչ թե նոր շենք կառուցել, այլ պետությունը նրանց տա բնակարանների գնման վկայագրեր: Լրագրողների հետ հանդիպման ժամանակ ասաց քաղաքաշինության նախարար Նարեկ Սարգսյանը:
«Որոշեցինք, որ ճիշտ կլինի պետությունը բնակարանների գնման վկայագրերով աշխատի բնակիչների հետ, քան նորից շենքեր կառուցի: Քաղաքում կան վաճառքի ենթակա բազմաթիվ շենքեր: Ավելի ճիշտ է գնել այդ բնակարնները՝ միաժամանակ աշխուժացնելով նաև քաղաքի շուկան»,- ասաց նախարարը՝ հավելելով, որ բնակիչների աջակցության ծրագրի պարամետրերը պատրաստ են, շուտով կսկսվի այդ գործընթացը:
Պատասխանելով այն դիտարկմանը, թե այդ ընտանիքների շրջանում մտավախություն կա, որ բնակարանների գնման վկայագրերի արժեքը չի համապատասխանի շուկայում գործող գներին, Ն. Սարգսյանը նշեց, որ այդպիսի բան չի կարող լինել. «Կադաստրից հարցումներ ենք անելու ճիշտ շուկայական արժեքը, դրան համապատասխան տրվելու են վկայագրերը»:
Ն. Սարգսյանն ասաց, որ վարչապետի հանձնարարությամբ բնակիչների շրջանում հարցում են անցկացրել, որպեսզի իրենք որոշեն՝ ուզում են նոր շենք կառուցվի, թե տրվի բնակարանների գնման վկայագրեր:
«Մեր տվյալներով, բնակիչների ավելի քան երկու երրորդը կողմ է բնակարանների վկայագրերին»,- նշեց նախարարը:
Նա նաև ասաց, որ եթե լինի մարդկանց խումբ, ով կողմնակից է նոր շինարարության, ապա պետությունը շինարարություն սկսելու հնարավորություն էլ ունի, միաժամանակ հավելեց, որ այդ գործընթացը կրկին կձկձգվի. «Երկու տեսակետից ճիշտ են վկայագրերը՝ մի անգամից լուծել խնդիրը, իհարկե, պայմանով, որ դա կհամապատասխանի շուկայական արժեքին, երկրորդ՝ ինչու ավելորդ բնակելի գույք ստեղծել այն դեպքում, երբ քաղաքում կան բազմաթիվ դատարկ տներ»:
Քաղաքաշինության նախարարն իր խոսքի վերջում ընդգծեց, որ Գյումրիի խնդիրները լուծելու համար պետությունն ունի անհարժեշտ գումար:
Լրահոս
Տեսանյութեր
Եթե Տավուշի գյուղերի հանձնման պրոցեսը տեղի ունենա, այդտեղից կսկսվի պետականության վերջնական ավարտը