Այս պահին իշխանափոխության գնալու ռեսուրս ընդդիմությունը չունի. Լեռնիկ Ալեքսանյան
ՀՀ Ազգային ժողովի ՀՀԿ խմբակցության պատգամավոր Լեռնիկ Ալեքսանյանն այսօր լրագրողների հետ հանդիպման ժամանակ անդրադառնալով այն կարծիքներին, թե երկրում հնարավոր է իշխանափոխություն լինի` նշեց, որ քաղաքական դաշտում աշնանը միշտ էլ թեժ է լինում, սակայն ընդդիմության մոտ չի տեսնում իշխանափոխություն իրականացնելու ռեսուրս:
«Իհարկե կլինի ակտիվություն, քանի որ բազմաթիվ խնդիրներ կան: Այսինքն` ընդդիմության մոտ ակտիվանալու հիմքերը կան, սակայն այդ ամենին հասնելու համար ընդդիմությունը նախ պետք է խնդիրները ճիշտ ձևակերպի: Միայն հանրահավաքներով հարցերը չեն լուծվում: Հարկավոր է մշտապես լուրջ կազմակերպչական և գաղափարական աշխատանք իրականացնել: Մինչդեռ այս պահին իշխանափոխության գնալու ընդդիմության ռեսուրսը չեմ տեսնում, բացի գաղափարականից»,- ասաց Լ.Ալեքսանյանը` հավելելով, որ ամռան ընթացքում ինքը չի տեսել որևէ ընդդիմադիր կուսակցության մարզային գրասենյակ, որն աշխատի:
Նրա խոսքերով` զուտ հրապարակային հայտարարություններով հնարավոր չէ արդյունքի հասնել: Պետք է գնալ մարդկանց մեջ, որպեսզի նրանց դժգոհությունները ճիշտ հասկանաս:
«Ընդդիմությունն ինքն էլ չգիտի, թե որքան ռեսուրս ունի, ինքն իր հույսը դրել է դժգոհող մասսայի ակտիվության վրա»,- ասաց պատգամավորը:
Ասուլիսի մեկ այլ բանախոս, ԲՀԿ-ական նախկին պատգամավոր Վարդան Բոստանջյանն էլ հակադարձելով իշխանության ներկայացուցչին ասաց, որ մեր իշխանությունը մտածում է` ընդդիմության կազմակերպած միտինգներին 50 հազար մարդ չի մասնակցի, բայց, ըստ Բոստանջյանի` ի՞նչ կապ ունի, թե ինչքան մարդ կմասնակցի:
«Առաջին հերթին իշխանությունը թող իր գործն անի, լավ կառավարի երկիրը: Դուք Ձեր գործը արեք, Ձեր քաղաքացուն արժանավայել պահեք, ինչ հնարավոր է` մաքսիմալ արեք մեր երկրի կառավարման համար: Ի՞նչ կապ ունի փողոց դուրս կգան, թե դուրս չեն գա: Եթե դու էդ ամենն անես ու հասարակությունը հակված կլինի փողոց դուրս գալու` կասենք էս ինչ անշնորհակալ հասարակություն է: Տա Աստված, որ դուրս չգան, մեր երիտասարդները վտանգի չենթարկվեն, բայց դրա համար հարկավոր է աշխատել»,- ասաց Վ.Բոստանջյանը:
«Այո, եթե ընդդիմությունն իր խնդիրները ձևակերպի ոնց որ դուք եք ասում` լավ աշխատեք, իշխանության մեջ կան մարդիկ, որ չեն աշխատում, լավ պաշտոնյա չեն և այլն: Բայց եթե խնդիրը միայն և ամեն գնով իշխանափոխությունն է, դա այդպես չէ»,- նրան էլ հակադարձեց Լ. Ալեքսանյանը:
ՀՀԿ-ական պատգամավորը նաև նշեց, որ իր համար շատ անսպասելի էր հասարակության արձագանքը սահմանային դեպքերին. «Հասարակությունը շատ ավելի ճիշտ արձագանքեց վերջին սահմանային դեպքերին, քան քաղաքական ուժերը, նույնիսկ իշխանական: Բոլորը գնացին հասարակության ետևից, իհարկե կային ազնիվ մղումներով սահման գնացողներ, ինչպես նաև այնպիսի մարդիկ, որոնք շոու էին անում: Այդպիսի մարդիկ կային թե իշխանության, թե ընդդիմադիր ուժերի մեջ: Այսինքն` եթե ընդդիմությունը ճիշտ ձևակերպի իր խնդիրները` կարողանա հասարակությանը տանել իր ետևից»:
Վ.Բոստանջյանը անդրադառնալով երկրի սոցիալական խնդիրներին, նշեց, որ այսօր մեր երկրում կան բազմաթիվ չլուծված, կնճռոտ հարցեր, որոնց ճնշող մեծամասնությունը սոցիալական բնույթի են. «Իհարկե, լինելով փոքր երկիր ամեն ինչ չէ, որ մեզանից է կախված: Մենք ավելի շատ հետևողների դերում ենք, բայց կան կենցաղային բնույթ կրող բազմաթիվ խնդիրներ, որոնք ակնհայտորեն կարող են լուծվել: Այդ առումով ունենք խոցելիություն»:
Ինչ վերաբերում է քառյակի ներկայացրած 12 կետերին, տնտեսագետը նշեց, որ դա ծրագիր չէ, դրանք այն բոլոր խոցելի տեղերն են մեր իրականության, որ իշխանությանն ասում են մի արեք:
«Ոնց որ ծնողը երեխային ասի` անկարգություն մի արա, գողություն, թալան մի արա: Ես մտածում եմ, որ մենք այս պահին ըստ էության նման մի վիճակում ենք գտնվում»,- նշեց Վ.Բոստանջյանը: