Երևանում կազմակերպվել է ցուցահանդես՝ նվիրված ռուս ֆոտոլրագրող Անդրեյ Ստենինին. «Նրանք համարձակ մարդիկ են» (տեսանյութ)
Հայաստանում «Ռոսիա սեգոդնյա» միջազգային լրատվական գործակալության մասնաճյուղը Երևանի Մոսկվայի տանը կազմակերպել է լուսանկարչական ցուցահանդես՝ պահանջելով ազատ արձակել «Ռոսիա սեգոդնյա» ՄԼԳ-ի ֆոտոլրագրող Անդրեյ Ստենինին:
Նշենք, որ 2014թ.-ի օգոստոսի 7-ին «Ռոսիա սեգոդնյա» ՄԼԳ-ն տեղեկացրել է, որ Ուկրաինայի արևելքում գտնվող հատուկ ֆոտոլրագրող Անդրեյ Ստենինը կապի դուրս չի եկել: Ֆոտոտեղեկատվության տնօրինությունը նրանից վերջին անգամ նյութ է ստացել օգոստոսի 5-ին:
«Այս պահին որևէ հավաստի տեղեկատվություն չկա, թե որտեղ է Անդրեյը: Անընդհատ հակասական տեղեկատվություն են հաղորդում: Կարծում եմ՝ անհրաժեշտ է կրկնապատկել, եռապատկել ուժերը, նաև համախմբել միջազգային հանրության ուժերը, որպեսզի իմանանք՝ որտեղ է գտնվում նա ու վերադարձնենք հայրենիք»,- լրագրողներին ասաց ցուցահանդես այցելած ՀՀ-ում ՌԴ արտակարգ և լիազոր դեսպան Իվան Վոլինկինը:
Միաժամանակ դեսպանը նշեց, որ իրեն անհանգստացնում է այն փաստը, որ լրագրողներին հակամարտության գոտիներում շարունակում են հետապնդել: Նրա խոսքով, ընթացիկ տարում, կապված ուկրաինական դեպքերի հետ, արդեն վեց լրագրող է մահացել՝ իրենց մասնագիտական պարտականությունը կատարելու ընթացքում:
«Նման իրավիճակն անընդունելի է ժամանակակից աշխարհում: Չպետք է թույլ տալ, որ նման դեպքերը կրկնվեն: Պետք է միջազգային հանրությունն արձագանքի Անդրեի հետ կատարվածին և առհասարակ Ուկրաինայում լրագրողների նկատմամբ կատարվող բռնություններին»,- ասաց Ի. Վոլինկինը՝ հավելելով, որ նման ցուցահանդեսներն ու այս դեպքի հետ կապված մյուս ակցիաները հասարակության, լրագրողների կոչն է ուկրաինական իշխանություններին՝ դադարեցնել բռնությունները լրագրողների նկատմամբ, զանգվածային լրատվամիջոցների նկատմամբ ճիշտ, ադեկվակ քաղաքականություն վարել:
Դեսպանի խոսքով, ՌԴ-ն պնդում է՝ արագորեն ձեռնարկել անհրաժեշտ բոլոր գործողությունները Անդրեյ Ստենինին փնտրելու և ազատելու համար, ինչպես նաև ապահովել ռուս, արտասահմանցի լրագրողների անվտանգ աշխատանքն Ուկրաինայում. «Աշխարհի որևէ թեժ կետում լրագրողների հետ կապված նման դեպքեր չպետք է լինեն: Այլ բան է, երբ մարդը կրակոցների զոհ է դառնում պատահաբար, այլ բան, երբ նպատակաուղղված լրագրողի են կրակում»:
Ի. Վոլինկինն ասաց, որ հարգանքով է վերաբերում բոլոր լրագրողներին, ովքեր, ինչպես Անդրեյ Ստենինը, չնայած կյանքին սպառնացող վտանգներին, գնում են հակամարտության գոտիներ, որպեսզի աշխարհին ներկայացնեն իրականությունը, ճշմարտությունը, նրանք համարձակ մարդիկ են:
«Հույս ունենք, որ Անդրեի պատմությունը լավ ավարտ կունենա և մոտ ժամանակներս կվերադառնա հայրենիք, իր հարազատների մոտ»,- նշեց ՀՀ-ում ՌԴ դեսպանը:
Ցուցահանդեսում ներկայացված են մոտ չորս տասնյակ լուսանկարներ, որոնք արված են Անդրեյ Ստենինի կողմից ինչպես Ուկրաինայում, այնպես էլ այլ երկրներում:
Նշենք, որ տարբեր աղբյուրների համաձայն, Անդրեյ Ստենինին կարող էին ձերբակալել ուկրաինացի ուժայինները, սակայն Կիևը դա չի հաստատում: Ուկրաինայի ՆԳՆ-ն օգոստոսի 11-ին դիմում է ընդունել լրագրողի անհետացման մասին: Հաջորդ օրը Ուկրաինայի իշխանություններն առաջին անգամ հայտարարեցին, որ իրենց հայտնի է Ստենինի ճակատագիրը: Ուկրաինայի ՆԳՆ-ի խորհրդական Անտոն Գերաշչենկոն լատվիական Baltkom ռադիոկայանի հետ հարցազրույցում հայտնել էր, որ ֆոտոլրագրողին ձերբակալել են ուկրաինական հատուկ ծառայությունները և կասկածում են նրան «ահաբեկիչներին սատարելու մեջ»։ Ավելի ուշ Գերաշչենկոն նշել էր, որ իրեն «սխալ են մեկնաբանել»` նա միայն ենթադրել է, թե Ստենինը ձերբակալված է, բայց հստակ տեղեկություն այդ մասին չունի։ Baltkom–ը հայտարարել էր, որ ունի հարցազրույցի ձայնագրությունը և տրամադրել էր այն ԶԼՄ–ներին։
Ենթադրվում է, որ նրան ձերբակալել է Ուկրաինայի անվտանգության ծառայությունը: ՌԴ քննչական կոմիտեն քրեական գործ է հարուցել Ստենինի առևանգման փաստով:
Լրահոս
Տեսանյութեր
«Ազատություն քաղբանտարկյալներին». ակցիա՝ Հայաստանում ԵՄ պատվիրակության գրասենյակի դիմաց
