Ձեր վստահելի աղբյուրը

Մեղրասարի ոսկու հանքավայրն առաջին օրվանից շահագործվում է ապօրինի: Այս մասին այսօր լրագրողների հետ հանդիպման ժամանակ ասաց Հայաստանի կանաչների միության նախագահ Հակոբ Սանասարյանը` անդրադառնալով «Ատ-Մետալս» ՍՊԸ-ի կողմից Մեղրասարի ոսկու հանքավայրի շահագործմանը:

Հ.Սանասարյանի խոսքերով` դեռ 2012թ-ին ծրագիրն իրականացնող ընկերությունը հայտարարել էր, թե հանրային լսումներ են տեղի ունեցել հենց Տաշտունում, իսկ եզրակացության մեջ գրել, թե ստացել է հանքը շահագործելու և գործարան կառուցելու համաձայնությունը: Սակայն, ըստ նրա, այդ ժամանակ որևէ հանրային լսում տեղի չի ունեցել և որևէ մեկը հանքի շահագործման համար իր համաձայնությունը չի տվել:

«Հավատացնում եմ, որ նրանք այդ ժամանակ չեն ունեցել որևէ փաստաթուղթ, նախագիծ, այլ միանգամից սկսել են
սարի կատարի ոչնչացումը, ինչը Մեղրու լեռնաշղթայի ջրագոյացման համակարգն է»,- ասաց նա:

Կանաչների միության նախագահն ասաց, որ հանքի շահագործումը կստեղծի բազմաթիվ էկոլոգիական խնդիրներ: Ըստ նրա` շահագործողները հանքավայրի բնապահպանական մասը առանձին են ներկայացրել, պոչամբարի մասով՝ առանձին, ֆաբրիկայի կառուցումն՝ առանձին ու հավատացնում են, թե պոչամբար չունեն և անթափոն արտադրություն է: Մինչդեռ, ինչպես նշեց Հ.Սանասարյանը, մինչև օրս չի տեսել մի նախագիծ, որտեղ հանքի շահագործումից հետո թափոններն այդքան մեծ ծավալով լինեն:

«Ծրագրով նախատեսվում է սկզբնական շրջանում արդյունահանել 347 հազար տոննա հանքաքար, ինչի արդյունքում դատարկ ապարները կկազմեն 64-66 մլն տոննա: Այսինքն` յուրաքանչյուր 1 տոննա հանքաքար հանելուց առաջանում է 190 տոննա դատարկ ապար, իսկ թթվածնի և խոնավության պայմաններում դրանք վերածվում են ծանր մետաղների ու տարածվում շրջակա միջավայր»,- ասաց Հ.Սանասարյանը:

Նա նշեց նաև, որ այդ հանքաքարում կա մոտ 1,5 տոննա ոսկի, 4 տոննա` արծաթ: Հ.Սանասարյանի հաշվարկներով` երկուսը միասին կազմում են մոտ 64 մլն դոլար, բայց այն դեպքում, եթե 100 տոկոսով կորզում կատարեն, ինչը, բնապահպանն անհնար է համարում:

Բնապահպանի խոսքերով, եթե հանքարդյունահանողները վճարեին դատարկ ապարների համար, ապա պետական գանձարան պետք է մտներ 812 մլն դոլար։

«Նրանք նախագծում գրում են, թե դատարկ ապարները վտանգավոր թափոններ չեն, իսկ «Բնապահպանական վճարների դրույքաչափի մասին» օրենքում էլ գրված է, որ հանքարդյունաբերության ոչ վտանգավոր թափոնների յուրաքանչյուր 1 տոննան զրո դրամ է: Ստացվում է Կառավարությունը Ազգային ժողովի հետ մեկտեղ ստեղծել են պետությունը կողոպտելու օրենքներ»,- ասաց Հ.Սանասարյանը` հավելելով, որ հանքարդյունահանողներին հարկերից ազատել են և «երկիրը քանդում են բառի բուն իմաստով»:

Նա նաև հայտնեց, որ Հայաստանն ունի չորս ուրանային գոտիներ: Գլխավոր ուրանային գոտին համարվում է Սյունիքը` սկսած Ագարակից մինչև Դաստակերտ:

«Սյունիքում ցրված ուրան կա, այդ դատարկ ապարները, որ ասում են, թե դրանց մեջ չնչին քանակությամբ ուրան կա, ցանկության դեպքում չեն կարող որսալ, իսկ ուրանը սփռվում է ու դառնում անկառավարելի: Բոլոլրն էլ գիտեն, որ ուրանը համարվում է ամենավտանգավոր ծանր մետաղը»,- ասաց Հ.Սանասարյանը:

Ասուլիսի մեկ այլ բանախոս, Համահայկական բնապահպանական ճակատի (ՀԲՃ) համակարգող խորհրդի անդամ Աննա Աղլամազյանն էլ նշեց, որ Մեղրասարի ոսկու հանքավայրի տարածքում կան բնության հատուկ պահպանության տարածքներ, այդ թվում` «Արևիկ» ազգային պարկը։

«Սյունիքի մարզն ընդամենը 4500 քմ է, որտեղ կան՝ 22 մետաղական հանքավայր, 11 մեռյալ պոչամբար, 28 մետաղական հանքավայր էլ սպասում է շահագործման։ Այսքանը գումարեք, հաշվեք և տեսեք Սյունիքի մարզում մենք 10 տարի հետո ապրելու տեղ ունենալո՞ւ ենք, թե՞ ոչ»,- ասաց Ա.Աղլամազյանը: