Ձեր վստահելի աղբյուրը

Այսօր ՀՀ պաշտպանության նախարար Սեյրան Օհանյանը հյուրընկալվել էր Հայաստանի պետական տնտեսագիտական համալսարանում (ՀՊՏՀ)։ Այս մասին տեղեկացնում է Հայաստանի երիտասարդական հիմնադրամի հասարակայնության հետ կապերի ծառայությունը:

Պաշտպանության նախարար Սեյրան Օհանյանը ողջունել է տնտեսագիտական համալսարանի ուսանողների կողմից անցկացվող ռազմահայրենասիրական միջոցառումները։ Նախարարն ընդգծել է, որ հպարտությամբ է ներկայացնում մի կառույց, որն անցել է հաղթական փառավոր ուղի. «Ինձ համար մեծ պատիվ է ներկայացնել ՀՀ զինված ուժերը, մի կառույց, որն այսօր ապահովում է հայ ժողովրդի խաղաղ արարումը, ունեցել է փառավոր ճանապարհ, որը կարողացել է հիմք դառնալ, որպեսզի այսօր բանակն արագ տեմպերով իր զարգացումն ապահովի, մրցունակ լինի ոչ միայն տարածաշրջանում, այլև համեմատվի գերտերությունների հզոր բանակերների հետ»։

Նախարարն ընդգծել է, որ Արցախյան գոյապայքարում մեր հաջողությունները շարունակական են այսօրվա ոչ պատերազմ-ոչ խաղաղություն իրողության մեջ։

«Եթե Արցախյան գոյապայքարի ժամանակ բանակը ժողովրդի հետ կարողացել է գերազանց հանձնել իրեն տրված քննությունը, այսօր էլ բանակն իր զինծառայողներով, հատկապես ժամկետային, գերազանց հանձնում է այն, ու մեզ պարտադրված ոտնձգություններին կարողանում ենք արժանի հակահարված տալ՝ ապահովելով մեր սահմանների անառիկությունը»,- ասել է Սեյրան Օհանյանը։

Նախարարը նշել է, որ մենք հակամարտության լուծման մեր տարբերակն ունենք, որը բացառապես խաղաղ կարգավորումն է։ Արցախի ժողովրդի` իր պատմական տարածքում ինքնորոշման իրավունքն անառարկելի իրողություն է և այլընտրանք չունի։

Խոսելով օգոստոսյան վերջին դեպքերի մասին՝ Սեյրան Օհանյանը նշել է. «Մեր զինծառայողների հերոսության ու անձնազոհության շնորհիվ մենք կարողացանք ոչ միայն հետ շպրտել հակառակորդի դիվերսիոն-հետախուզական խմբերը, այլև նրանց տարածքներում միջդիրքային շրջաններում կարողացանք կանխարգելիչ-հակազդիչ միջոցառումներ իրականացնել: Դա հայ հրամանատարի և զինվորի խելացի գործողությունների շնորհիվ է։ Դա օգնեց, որ ՀՀ նախագահը եռակողմ հանդիպման ժամանակ ավելի հաստատուն, ավելի խրոխտ, անհրաժեշտության դեպքում ձեռքը սեղանին խփելով արտահայտի իր տեսակետն Արցախի հարցի վերաբերյալ»:

Պաշտպանության նախարարը նկատում է՝ բանակի հզորությունը քանակական առավելության ու սպառազինության մեջ չէ: «1992-94թթ. էլ Ադրբեջանը և′ քանակապես էր մեզանից շատ, և′ ավելի շատ զենք ուներ: Հիմա էլ է նույն իրավիճակը: Բայց առանց 3-րդ ուժի միջնորդության (երկրագնդի վրա չկա հակամարտության որևէ գոտի, որտեղ չլինի 3-րդ ուժ) մեր զինված ուժերն արժանի հակահարված են տալիս` մեր զինվորի մարտական ոգու, նվիրումի շնորհիվ»,- նշել է Սեյրան Օհանյանը։

Նա նաև տեղեկացրել է, որ սահմանում իրավիճակը հանդարտ է. կրակոցներ կան, բայց քիչ են: ՀՀ սահմաններում այն հասել է գրեթե նվազագույնի, ԼՂՀ սահմաններում կրակոցների թիվը մեկ օրվա ընթացքում 30-40-ի է հասնում։

Նախարարն ուսանողների ու դասախոսների հետ ծաղիկներ է դրել ՀՊՏՀ բակում տեղադրված «Զոհերի հիշատակին» նվիրված հուշաքարի մոտ, մասնակցել է ուսանող-ազատամարտիկների անվան լսարանի բացման արարողությանը, որին, բարձրաստիճան պաշտոնյաներից բացի, ներկա էին նաև զոհված ուսանող-ազատամարտիկների ընտանիքների անդամները, հարազատներն ու մարտական ընկերները: Ուսանող-ազատամարտիկների լսարանը նվիրված է ՀՊՏՀ այն 13 քաջորդիներին, ովքեր Արցախյան պատերազմի տարիներին կիսատ են թողել ուսումը և մեկնել ռազմաճակատ, որտեղից, ցավոք, չեն վերադարձել:

Կայացել է «1-ը դարձնենք 100» խորագիրը կրող ծրագրի շնորհանդեսը, որը նվիրված է հայալեզու Վիքիպեդիան Արցախյան պատերազմի մասին պատմող նյութերով հարստացնելուն: Արձագանքելով «1 հայ` 1 հոդված» կոչին՝ ՀՊՏՀ մի խումբ ուսանողներ համալրել են հայալեզու Վիքիպեդիան Արցախյան պատերազմի մասին պատմող 100-ից ավելի հոդվածներով: Սա պիլոտային ծրագիր է, և նախատեսվում է հետագայում շարունակել հոդվածների ավելացումը: