7000 եվրո`Գյումրիում հաշմանդամություն ունեցող երեխաների խաղահրապարակի կառուցման համար
Նախօրեին Վիեննայի միջազգային կազմակերպություններում ՀՀ մշտական ներկայացուցչությունը «Հայաստան» կենտրոնում կազմակերպել էր միջոցառում ՄԱԿ-ի Վիեննայի գրասենյակի Կանանց խորհրդի անդամների համար: Այս մասին հայտնում են ԱԳՆ մամուլի, տեղեկատվության և հասարակայնության հետ կապերի բաժնից:
Միջոցառմանը ներկա են եղել Կանանց խորհրդի գործադիր մարմնի ներկայացուցիչները, ՄԱԿ-ի միջազգային գործակալություններում աշխատող հայ կանայք, կին դիվանագետներ և դիվանագետների կանայք:
Ողջույնի խոսքով հանդես է եկել ՀՀ մշտական ներկայացուցիչ, դեսպան Արման Կիրակոսյանը, ով իր խոսքում բարձր է գնահատել ՄԱԿ-ի Վիեննայի գրասենյակի Կանանց խորհրդի կողմից իրականացվող բարեգործական գործունեությունը և վերահաստատեց ՀՀ մշտական ներկայացուցչության աջակցությունն իրականացվող միջոցառումներին:
Կանանց խորհրդի փոխնախագահը շնորհակալություն է հայտնել ՀՀ մշտական ներկայացուցչությանը` խորհրդի կողմից կազմակերպվող ամենամյա բարեգործական տոնավաճառներին ակտիվ և արդյունավետ մասնակցության համար, և տեղեկացրել է, որ խորհուրդն ընտրել է մշտական ներկայացուցչության կողմից ներկայացված Գյումրիում հաշմանդամություն ունեցող երեխաների համար հատուկ խաղահրապարակի կառուցման ծրագիրը, որն իրականացվելու է «Ագաթ» հատուկ կարիքներով կանանց հասարակական կենտրոնի կողմից:
Ծրագրի իրականացման համար Կանանց խորհրդի կողմից հատկացվել է 7000 եվրո գումար:
Միջոցառման մասնակիցներն առիթ են ունեցել ծանոթանալու «Հայաստան» կենտրոնում գործող ժամանակակից հայ նկարիչների ցուցահանդեսին և մասնակցեցին հյուրասիրությանը:
Տեղեկանք: ՄԱԿ-ի Վիեննայի գրասենյակի Կանանց խորհուրդը հիմնադրվել է 1967թ. և ներկայումս ունի շուրջ 500 անդամ մոտ 100 տարբեր երկրներից: Կազմակերպության հիմնական առաքելությունն է կարիքավոր երեխաների և կանանց համար բարեգործական ծրագրերի իրականացումը: Խորհրդի աջակցությամբ Հայաստանում իրականացվել են տասնյակից ավելին բարեգործական ծրագրեր, որոնք հիմնականում միտված են եղել աջակցելու երկրաշարժից տուժած տարածաշրջանի փոքրիկներին և մանկատներում ապրող կարիքավոր երեխաներին:
Լրահոս
Տեսանյութեր
Անահիտ աստվածուհու արձանը կցուցադրվի Հայաստանի պատմության թանգարանում պահվող բացառիկ նմուշների հետ