Ձեր վստահելի աղբյուրը

Հայաստանի պանրագործների միության նախագահ Արմեն Գիգոյանն այսօր լրագրողների հետ հանդիպման ժամանակ անդրադառնալով Ռուսաստանի նկատմամբ Արևմուտքի պատժամիջոցներին և հայկական պանրի արտահանման համար նոր հնարավորություններին, նշեց, որ, ցավոք սրտի, այսօր մենք պատրաստ չենք դրան, քանի որ պանրի արտադրության ծավալները փոքր են:

«Եթե այսօր ավելացվեն դեպի Ռուսաստան արտահանման ծավալները, ներքին շուկայում դեֆիցիտ կառաջանա: Մեզ անհրաժեշտ է արտադրության ծավալը մեծացնել: 2009 թվականից այսպիսի հնարավորություններ Հայաստանի համար լինում են, սակայն, ցավոք, այսօր մենք դեռ պատրաստ չենք արտահանման»,- ասաց նա:

Նրա խոսքերով` Ռուսաստանը տարեկան օգտագործում է 350-370 հազար տոննա պանիր, որից 80 հազար տոննան ներկրում է այլ երկրներից. « Եթե այդ 80 հազարի 10%-ն անգամ Հայաստանն ապահովի, դա արդեն իսկ մեծ ծավալ է»:

Նա միաժամանակ նշեց, որ Հայաստանում տարեկան արտադրվում է ավելի քան 20 հազար տոննա պանիր և, եթե հայկական արտադրանքն ուղարկվի Ռուսաստան, ապա հունվարին արդեն պանիր չի լինի:

Այդուհանդերձ, Հայաստանի պանրագործների միության նախագահը գտնում է, որ հայ պանրագործների մեծամասնությունը խելամիտ է և ներքին շուկան չի փոխի արտաքին շուկայի հետ. «Եթե գործարարը տեղական շուկայից դուրս գա, ապա հետագայում շատ դժվար կլինի նույն շուկա մտնելը»:

Ա. Գիգոյանը նաև ասաց, որ սխալ է Ռուսաստանը համարել հիմնական շուկա, այն պետք է լինի շուկաներից մեկը:

Ինչ վերաբերում է խնդիրներին, որոնք առաջանում են պանրի արտադրության ոլորտում, Ա.Գիգոյանը նշեց, որ կարևորագույն խնդիրը հումքն է՝ կաթի արտադրության ծավալը: Ըստ նրա` կաթի ծավալները տարեկան հաշվարկով խիստ անկանխատեսելի են, քանի որ սեզոնայնությունից խիստ կախվածություն ունեն: «Կաթի արտադրությունը կանոնակարգելու համար պետք է առանձնացնենք անասնապահ գյուղացուն ֆերմերից: Ֆերմերին պետք է տալ ստատուս, պետք է փոքր–ինչ կոորդինացվի, որպեսզի այդ ինստիտուտը կայանա»,- ասաց նա:

Անդրադառնալով ներքին շուկայում պանրի գներին, Ա.Գիգոյանը չբացառեց, որ առաջիկայում թանկացումներ լինեն, քանի որ տարին չորային էր, և հուլիս-օգոստոսին կաթի արտադրության ծավալը կտրուկ նվազել է: