Ինչպե՞ս անել, որ ՀՀ նախագահի դրամաշնորհի գումաները չվատնվեն. դասընթաց՝ ՀԿ-ների համար
90 հասարակական կազմակերպությունների ներկայացուցիչներ առաջիկա երեք օրերին Ծաղկաձորում կազմակերպված հատուկ դասընթացի ընթացքում կծանոթանան ՀՀ նախագահի աշխատակազմի կողմից հատկացվող դրամաշնորհային մրցույթին, դիմելու մանրամասներին, ինչպես նաև մրցույթի շրջանակներում հայտարարված անվանակարգերին։
«ՀԿ կենտրոն» քաղաքացիական հասարակության զարգացման ՀԿ-ի համակարգող Արփինե Հակոբյանը դասընթացի մեկնարկին նշել է, որ դասընթացին հիմնականում տրվում են գործնական գիտելիքներ այն մասին, թե ինչպես գրել ծրագրի առաջարկ և ինչպես այն իրականցնել ու պարզաբանել է. «ՀԿ կենտրոնն ընդգրկված է դրամաշնորհային մրցութային հանձնաժողովում, ուստի անընդհատ ականատես էինք լինում, թե ինչ ծրագրեր էին ստացվում, և այն փաստը, որ տարվա վերջում դրամաշնորհի համար հատկացված գումարի մոտ կեսը չշնորհվեց, վկայում էր այն մասին, որ ՀԿ-ները ունեն թույլ կետերի զարգացման խնդիր»:
Ա. Հակոբյանը, մատնանշելով մասնակցող 90 ՀԿ-ներին ասել է, որ նման դասընթացների նկատմամբ հետաքրքրությունն աճել է:
ՀԿ-ների ներկայացուցիչներին հմտություններ են փոխանցելու նախարարությունների մասնագետները և յուրաքանչյուր անվանակարգի ոլորտին առնչվող փորձագետներ, որպեսզի դրամաշնորհ ստացող ծրագրերն ուղղված լինեն երկրի զարգացման առաջնահերթություններին:
ՀԵՀ հոգաբարձուների խորհրդի համակարգող Կարեն Ավագյանն իր խոսքում անդրադարձել է այն երաշխիքներին, որոնք բացառում են, որ ՀՀ նախագահի դրամաշնորհի գումարները «վատնվեն». «Մեր նպատակն այն է, որ հասարակական կազմակերպությունները ոչ թե գումարներն ինքնանպատակ ծախսեն ու աշխատավարձի վրա վատնեն, այլ ծրագրերը լինեն նպատակային: Մյուս առանձնահատկությունն այն է, որ ՀԿ-ներն այս կարճ ժամանակահատվածում սկսել են վստահել ՀԵՀ-ին, քանի որ չափորոշիչները հստակ ու տեսանելի են. մրցութային հանձնաժողովում ընդգրկված են մարդիկ, որոնք տեղյակ են ոլորտին և իրականացնում են այս կամ այն ոլորտում պետական քաղաքականություն»:
Panorama.am-ի հետ զրույցում «Գեղարեգ» կրթամշակութային ՀԿ-ի ղեկավար Գրիգոր Դաշտոյանը, պատասխանելով հարցին, թե արդյոք համամիտ է հնչած այն կարծիքի հետ, որ ՀԿ-ներն ունեն խնդիրներ նպատակային ծրագիր գրելու հետ կապված ասաց. «Իհարկե խնդիրներ կան: Հասարակական կազմակերպություններն առաջին հերթին պիտի շահագրգռված լինեն իրենց ծրագիրն իրականացնելու հարցում, այլ ոչ թե մտածեն միայն աշխատավարձի մասին: Բայց ինձ թվում է, որ նման դասընթացներից հետո շատ նոր ՀԿ-ներ մուտք կգործեն ոլորտ»:
Տեղեկացնենք, որ այս տարի նախագահի աշխատակազմի կողմից դրամաշնորհի մրցույթի համար հատկացված է 200.000 դրամ. արդեն հայտարարված է դրամաշնորհային երրորդ մրցույթը, որի հայտերի ընդունման վերջնաժամկետն է սեպտեմբերի 30-ը:
Նշենք նաև, որ սեմինարը կազմակերպել է Հայաստանի երիտասարդական հիմնադրամը (ՀԵՀ)՝ որպես ՀՀ նախագահի կողմից ընտրված գործընկեր կազմակերպություն, անցկացվում է «ՀԿ Կենտրոն» քաղաքացիական հասարակության զարգացման կազմակերպության կողմից։