«Եթե լայն կոնսոլիդացիա չլինի, ֆորս մաժորներ հնարավոր չեն». Վարդան Բոստանջյանը` եռյակի մասին
«Ես մի բան գիտեմ, հայ հասարակությունը դժգոհ է երկրում առկա իրավիճակից. դժգոհության պատճառն, անշուշտ, իշխանությունների գործելաոճն է»,- այս մասին այսօր լրագրողների հետ հանդիպման ժամանակ ասաց ԲՀԿ խմբակցության նախկին պատգամավոր Վարդան Բոստանջյանը` հավելելով, որ դժգոհ չեն նրանք, ովքեր ԱԺ-ում են նստած, ու դա միշտ իշխանության դեմ է ուղղվում:
Անդրադառնալով հոկտեմբերի 24-ին կայանալիք Եռյակի հանրահավաքին՝ Վ.Բոստանջյանը նկատեց, որ իրենց այս քայլով քաղաքական 3 ուժերը փորձում են իշխանություններին ասել այն, ինչ որ ժողովուրդը պետք է ասեր. «Կստացվի`լավ, չի ստացվի` ժամանակը ցույց կտա»:
Ասուլիսի մյուս բանախոս, ՀՀԿ-ական պատգամավոր Մկրտիչ Մինասյանն էլ իր հերթին նկատեց` հանրապետությունում չի կարող լինել իրավիճակ, որ բոլորը գոհ լինեն. «Համաձայն չեմ, որ բոլորն են դժգոհ, բացի նրանցից, ովքեր ԱԺ-ում են: Անցած նստաշրջանին դուք գոհերի՞, թե՞ դժգոհների շարքում էիք: Իհարկե, կան խնդիրներ, մենք դրանք չենք ժխտում, պետք է աշխատենք, որ շտկենք իրավիճակը»:
Հարցին, թե հնարավո՞ր է եռյակը ֆորս մաժորային իրավիճակ ստեղծի, Վ. Բոստանջյանը նշեց, որ նման իրավիճակները միայն հասարակությունը կարող է առաջացնել. «Եթե լայն կոնսոլիդացիա չլինի, ֆորս մաժորներ հնարավոր չեն»:
Պատասխանելով հարցին, թե արդյոք եռյակն այն ուժն է, որը կարող է առկա իրավիճակի մեջ փոփոխություններ մտցնել, բանախոսները միաբերան արձագանքեցին. «Կյանքը ցույց կտա»:
Ինչ վերաբերում է եռյակի հնարավորություններին, Մ.Մինասյանի բնորոշմամբ, հոկտեմբերի 10-ի հանրահավաքը ցույց տվեց, որ անկազմակերպ հավաք էր, որտեղ յուրաքանչյուր քաղաքական ուժ փորձում էր վերմակն իր վրա քաշել. «Ես չեմ կարծում, որ մի քանի օրում այդ ամենը կազմակերպված տեսք ստանա»:
Անդրադառնալով Սահմանադրական բարեփոխումների նոր հայեցակարգին՝ պատգամավորն առաջարկեց այն չդիտարկել որպես «Սերժ Սարգսյանի վերարտադրության նախապայման» և զարմանք հայտնեց, որ համակարգային փոփոխությունը կարելի է մեկ անձով պայմանավորել: Մ. Մինասյանը հիշեցրեց նաև, որ նախագահն ասել է` երրորդ անգամ չի առաջադրվելու և եթե դառնանք խորհրդարանական, ինքը վարչապետ չի դառնալու:
Լրահոս
Տեսանյութեր
Ամեն սարի գլխին, փեշին, անտառներում հայկական հետքեր են. Քաշաթաղի հուշարձանները՝ մեկ գրքում