«Այնքան ասեցին չկա հանցագործի ազգություն, Մինվոդիի դեպքը եղավ...». Ազգագրագետ
«Գյումրիի դեպքը ցնցել է բոլորին: Կան տարբեր տեսակետներ, ահաբեկված է բնակչությունը, բայց կարծում եմ առաջնայինն այն է, որ դա հակամարդկային քայլ էր, ուղղված էր մարդու դեմ: Ինչքան էլ ժամանակ անցնի, ցավը չի վերանա, գուցե բթանա, բայց հաստատ չվերանա»,- ազգագրագետ Հրանուշ Խառատյանի հետ տված համատեղ ասուլիսի ժամանակ ասաց Հանրապետական խմբակցության պատգամավոր Արտակ Դավթյանը:
Ըստ նրա՝ իրավական առումով գործի քննությունը հնարավորինս պետք է հրապարակային արվի. «Մի կողմ պետք է թողնենք ՌԴ պաշտպան լինելը, կամ արևմուտքի պաշտպան լինելը, նրանցից ոչ մեկը պաշտպանի կարիք չունեն, առավելապես մեր երկրի պաշտպանությունը պետք է լինի հոգածության թեմա»:
«Ես մեր իրավապահների կողմից ՌԴ օրենսդրության հրապարակ բերելը դժվար եմ հասկանում: Մեր իրավապահների առաջին քայլը կարծես ինչ-որ մեկին հանրային ճնշումից պաշտպանելն էր: Մի քաղաքականացրեք, հակառուսական դիրքորոշում մի դրսևորեք, և այլն: Ո՞րն էր այս հայտարարությունների պատճառը: Տպավորություն է, որ մեր ԱԺ-ն ավելի շատ ռուս իրավապահների՚ն է վստահում»,- հայտարարեց ազգագրագետը:
Ըստ նրա, Գյումրիի դեպքերի շուրջ արհեստականորեն կարծես ՀՀն բաժանվեց ընդվզողների և սաստողների միջև:
«Ինձ համար շատ տարօրինակ էր Լովրովի հայտարարությունը, սիրուն ձևակերպումներից հետո խոսվում է, որ կան մեր վատը ուզողները, որոնք ուզում են սեպ խրել մեր դարավոր բարեկամության միջև»,- ասաց Խառատյանը:
Նրա կարծիքով՝ ամեն ինչ արվեց, որ հանրությանը վերագրվի գործի քաղաքականացման փորձերը: «Այնքան ասեցին չկա ազգություն հանցագործի, Մինվոդիի դեպքը եղավ, եկավ ապացուցելու, որ հանցագործությունը ազգություն ունի: Մենք պետք է մինիմիզացնենք ազգային հողի վրա հանցանքները: Սակայն սրանով իհարկե նկատի չունեմ, թե Գյումրիի դեպքը ազգային հողի վրա էր»,-պարզաբանեց Հրանուշ Խառատյանը:
«Գործի հրապարակայնությունն ինքնանպատակ չպիտի լինի, մեր միջոցով հանրությունը պետք է իրազեկված լինի: Այն իրավական հարցերը, որ ներկայացնում եք, ճիշտ են: Մենք պետք է պարբերաբար իմանանք դրանց պատասխանները: Մենք պետք է հետամուտ լինենք, որպեսզի մեր հանրությունը ստանա պատասխանները: Ռուս պատգամավորների այցը՝ իրենց խոսքով, Ավետիսյաններին հարգանքի տուրք մատուցելն էր: Ոչինչ բացառել չի կարելի, մեզ համար կարևոր է հարցը, բայց ոչ պակաս կարևոր է ոճրագործության հանգամանքների բացահայտումը»,- ընդգծեց պատգամավոր Արտակ Դավթյանը:
Ի պատասխան Դավթյանի հավաստիացումների՝ ազգագրագետը առաջարկեց. «Քանի որ ԱԺ պատգամավորները հանրությանը երես չեն տալիս տեղեկատվության տրամադրությամբ, եկեք պարբերաբար պարոն Դավթյանին հիշեցնենք այս մասին»:
Հանրապետական պատգամավորը, սակայն, չհամաձայնեց Խառատյանի հնչեցրած տեսակետին՝ ասելով.«Մենք հպարտանում ենք մեր գործընկերոջ՝ Մարտուն Գրիգորյանի գործելակերպով: Նա ցույցերի ժամանակ եղավ ցուցարարների կողքին և եղավ վերջին մարդը, որ լքեց ցույցերի անցկացման վայրը»: