«Կարևոր էր, որ գլխավոր դատախազը եկել էր ու պատրաստ էր հանրության առաջ պատասխանել հարցերին». ՀՀԿ-ական
«Ես միտումնավոր չանդրադարձա այդ դեպքերին, քանի որ այդ հարցը քաղաքականացվում է: Լսումները տևել են մոտ երկու ժամ, տրվել են բազմաթիվ հարցեր: Իսկ թե որն էր լսումների նպատակը: Ես ինքս իրավաբան եմ, և գիտեմ՝ նախաքննության ընթացքում որևէ բան հրապարակել չի կարելի»,- հայտարարեց ԱԺ պետաիրավական հարցերով հանձնաժողովի ղեկավար Հովհաննես Սահակյանը լրագրողներին տված ասուլիսի ժամանակ՝ անդրադառնալով Գյումրիի սպանդի հարցով հրավիրված խորհրդարանական լսումներին:
«Երբ քննարկում էինք՝ անել, թե չանել լսումներ, մենք հանդիպեցինք նաև ընդդիմության հետ ու որոշեցինք անել: Հասկանալով գործի կարևորությունը և հասրակական հնչեղությունը՝ չէր կարելի երեք հանձնաժողովներ, երեք գերատեսչությունների ղեկավարներ գային լսումների»,- պարզաբանեց Սահակյանը:
«Կարևոր էր, որ գլխավոր դատախազը եկել էր ու պատրաստ էր հանրության առաջ պատասխանի հարցերին»,- նշեց պետաիրավական հարցերով հանձնաժողովի ղեկավարը:
Ըստ նրա՝ լսումները տեղի ունեցան, որպեսզի ցույց տային, որ հարցը ԱԺ ուշադրության կենտրոնում է:
«Շատ դժվար է լսումներ կազմակերպել, երբ կա սպանված ամբողջ մի ընտանիք, ռիսկերը մեծ են: Բոլորը ցանկանում են իմանալ՝ ինչպես և ինչու է եղել դեպքը»,-ասաց Սահակյանը:
«Այն հուզումնալից վիճակը, որ ունեին մեր ռուս գործընկերները, ես ոչ մի տեղ չեմ տեսել: Ես հասկանում եմ մեր փաստաբանին, որ հրաժարվեց Պերմյակովին պաշտպանելուց»,- կարծիք հայտնեց ՀՀԿ պատգամավորը:
Նրա խոսքերով՝ քրեական գործով հանցագործությունը սկսվել է մի տեղ և ավարտվել մեկ այլ տեղ: Պետք է պարզվեն բոլոր մանրամասները. «Օրենքը խախտել են սահմանի հատման մասով, բայց գործը դեռ քննության մեջ է: Նախաքննության փուլում է գործի ողջ ընթացքը՝ սկսած բազան լքելուց մինչև սահմանապահների մոտ հայտնվելը»:
«Տպավորություն է, որ ես և Գևորգ Կոստանյանն ենք խնդրել, որպեսզի լսումներ լինեն, որպեսզի մենք գանք այնտեղ նստենք, իսկ մյուսներից ոմանք փորձեն քաղաքական դիվիդենտներ շահեն, մեզ քարկոծեն: Սրանով մենք ուզում էինք ցույց տալ, որ հարցը մեր ուշադրության կենտրոնում է»,- ընգծեց Հանրապետական խմբակցության պատգամավորը:
«Այս մեծ հանցագործության մեջ չես կարող առանձնացնել մի հատված, մեր քննիչները մասնակցում են, երկուստեք քննություն է իրականացվում: Ինձ համար ավելի շատ հետաքրքիր է իմ երկրի համապատասխան մարմինները տեղյակ լինեն: Եթե մեր քննիչները քննչական գործողություններ են կատարում, մենք բոլորս կիմանանք ի վերջո, թե ինչ է տեղի ունեցել»,- վստահություն հայտնեց Սահակյանը:
«Գոնե այս հարցում մի տարանջատեք՝ ընդդիմություն-դիմություն: Մենք էլ ենք հայ մարդ: Գյումրեցիների հետ ենք, կողքին ենք, սգում ենք, ես նույնպես ցանկանում եմ, որ հանցագործությունը բացահայտվի, որպեսզի իմ երեխան ևս ապահով լինի»,- ասաց Սահակյանը:
Անդրադառնալով Պուտինի խոսնակի այն հայտարարությանը, թե Պերմյակովին ՌԴ օրենսդրությամբ են դատելու, Հովհաննես Սահակյանն ասաց. «Պետդումայի պատգամավոր Լեբեդևն էլ այստեղ լրիվ այլ բան հայտարարեց: Մենք տեսնում ենք, որ անգամ այնտեղ՝ ՌԴ-ում, այնքան շփոթված են, որ չկարողացան հասկանալ՝ ինչպես պատահեց: Մենք պետք է մի փոքր զսպվածություն ունենանք»,- եզրափակեց նա: