«Այսօրվա մեր առաջադրանքը Հայաստանը և Ղարաբաղը պահելն է». Կոմանդոս
«Այն, որ մենք հիմա յուրօրինակ հնարավորություն ունենք, մենք միշտ ունեցել ենք մեծ երկիր, և հաճախ ենք կորցրել մեր հողերը: Մենք անընդհատ կորցնում էինք, և հետագայում այդպես չէինք կարող շարունակել: Հիմա մենք հասկանում ենք, երբ նշելու ենք ցեղասպանության հարյուրամյակը, այսօր էլ նրանք ցեղասպանություն են ուզում: Ապրելու համար մենք պիտի պայքարեինք: Մենք գիտենք Թուրքիայի՝ մինչև Չինաստան ձգվող մեծ Թուրան ստեղծելու նպատակները, և մենք պիտի պայքարեինք: Նշեմ, որ մեզ խորհրդային ուժերը չեն օգնել: Մեր ժողովուրդը հերոսաբար պաշտպանեց իրեն: Մենք պատրաստ էինք մահանալ, մարդկանց ստիպել պետք չէր, որ կռվեին: Նրանք կամ պիտի կռվեին, կամ պիտի մահանային»,- լրագրողների հետ հանդիպման ժամանակ ասաց արցախյան հերոսամարտի հերոս, գեներալ-մայոր Արկադի Տեր-Թադևոսյանը՝ շնորհավորելով ՀՀ բանակի քսաներեքամյակի կապակցությամբ:
Ըստ Կոմանդոսի՝ այսօրվա մեր առաջադրանքը՝ Հայաստանը և Ղարաբաղը պահելն է, իսկ դրան խանգարում է Ադրբեջանը. «Ադրբեջանն անընդհատ խախտում է նորմերը: Այս պայմաններում, երբ Ադրբեջանը շարունակում է լարվածություն մտցնել, մենք չպետք է թուլանանք: Ի տարբերություն Ադրբեջանի՝ մենք միասնական երկիր ենք և պահում ենք մեր երկիրը: Այսօր Ադրբեջանում ութ միլիոն մարդ է ապրում, բայց այդ ութ միլիոնն էլ ադրբեջանցի չեն: Օրինակ՝ թալիշները, լեզգիները, ավարները: Միջազգային վերլուծական կենտրոնում տասը-տասնհինգ տարի հետո կայանալիք իրադարձությունների մասին են կանխատեսում: Հայաստանի մասին եղել է կանխատեսում, որ այն դանդաղ զարգացում կապրի, քանի որ մոնոլիտ երկիր է: Իսկ Ադրբեջանում մոնոլիտության խնդիր կա: Մենք խոսքի ազատության կողմից ենք, իսկ դուք գիտե՞ք, թե Ադրբեջանում ինչ վիճակում են ԶԼՄ-ները»:
«Բանակի առաջին հրամանը եղավ դեկտեմբերի չորսին՝ հրամանատար նշանակելով Վազգեն Սարգսյանին, մենք այդ ժամանակ կառուցվածքային խնդիրներ ունեինք դեռ՝ սկսած նստելու վայրից»,- նշեց «Արծիվ մահապարտների միություն» ՀԿ-ի նախագահ, գեներալ-մայոր Աստվածատուր Պետրոսյանը՝ ներկայացնելով հայկական զինված ուժերի կազմավորման պատմությունը:
Ըստ Պետրոսյանի՝ ՀՀ անկախության հռչակագրի ընդունումից հետո միայն հոկտեմբեր ամսին կարելի է ասել, որ պաշտոնապես ստեղծվեց ՀՀ պաշտպանության նախարարությունը՝ ունեցած գնդերի հիմքի վրա: Ազատամարտիկը նկատեց, որ այսօր հայկական զինված ուժերն ունեն հիանալի միասնական համակարգ, որն ընդունակ է կանգնեցնել հակառակորդին:
«Ադրբեջանն ունի ծրագիր: Մենք այս տարի ցեղասպանության հարյուրամյակն ենք նշում: Թուրքիան փորձում է իբր այն խաղաղ նշի, մեր նախագահին է հրավիրել: Այն լարվածությունը, որը կա Ադրբեջանի կողմից, ընդհանուր ծրագիր է, լարվածության ստեղծումն այս շրջանում դրված է Բաքվի վրա: Այդպես փորձում են խանգարել հարյուրամյակի միջոցառումներին: Նաև կապված է նրա հետ, որ ադրբեջանական հասարակությունը չի ցանկանում պատերազմել: Սահմանին հատուկ խմբավորումներ են գործում այդ նպատակով»,- ընդգծեց Արկադի Տեր-Թադևոսյանը:
«Ռազմավարական առումով մեր բանակը պատրաստ է, մենք ոչ-ոքից օգնություն չենք խնդրում: Մենք ունենք պահուստային հատուկ պատրաստվածության ուժեր, որոնք այսօր չենք օգտագործում, որովհետև այս պահին դրանք օգտագործելը ճիշտ չէ: Սեյրան Օհանյանը ելույթում ասեց, որ մենք թեժ կետեր ենք ստեղծել, իսկ իրենք այդ թեժ կետերը չեն ուզում, իրենք ուզում են լարվածության մեջ պահեն: Ստրատեգիական առումով մեր բանակը պատրաստ է»,- հայտարարեց Աստվածատուր Պետրոսյանը:
Լրահոս
Տեսանյութեր
Ամեն սարի գլխին, փեշին, անտառներում հայկական հետքեր են. Քաշաթաղի հուշարձանները՝ մեկ գրքում