Ձեր վստահելի աղբյուրը

«Հայկական բանակն ուրիշի հողին տիրելու նպատակ երբեք չի հետապնդել, բայց վճռականորեն այսուհետ ևս կասեցնելու է հակառակորդի ցանկացած ոտնձգության: Հավաստիացնում եմ, որ Հայաստանի Զինված ուժերը, որոնք հայ ժողովրդին նվիրեցին խաղաղության ևս մեկ տարի, այսուհետև ևս վստահորեն կկատարեն իրենց խնդիրը և կապահովեն Հայաստանի և Լեռնային Ղարաբաղի սահմանների անձեռնմխելիությունը»,- Հայոց բանակի կազմավորման 23-րդ տարեդարձին նվիրված տոնական համերգի սկզբում հայտարարեց ՀՀ պաշտպանության նախարար Սեյրան Օհանյանը:

Ալ. Սպենդիարյանի անվան օպերայի և բալետի ազգային ակադեմիական պետական թատրոնում ընթացող տոնական համերգին ներկա էին  ՀՀ նախագահ Սերժ Սարգսյանը, Արցախի նախագահ Բակո Սահակյանը, Ամենայն Հայոց կաթողիկոս Գարեգին Երկրորդը և Մեծի Տանն Կիլիկիո Կաթողիկոս Արամ Առաջինը, պետական, քաղաքական, մշակութային գործիչներ, զինվորականներ:

Նախարարը մանրամասն ներկայացրեց, թե 2014 թվականին երկրի պաշտպանությունն ավելի ամրապնդելու, զինծառայողների մարտունակությունն ավելի բարձրացնելու գործում ինչպիսի աշխատանքներ են կատարվել, ծրագրեր իրագործվել: Ս. Օհանյանի խոսքով, չնայած առաջնագծում տիրող լարվածությանը, 2014 թվականի ողջ ընթացքում տեղի են ունեցել բազմաթիվ զորավարժություններ:

«2014 թվականին կյանքի կոչվեց փոքր ուժերով մեծ խնդիրների լուծման սկզբունքը, ինչի վկայությունը դարձավ ամռանը հայկական բանակի իրականացրած զսպող գործողությունները, որոնք Հայաստանի ու Արցախի սահմաներից հեռու վանեցին մարտական գործողությունների վերսկսման ուրվականը, իսկ նոր մեթոդների և միջոցների կիրառման շնորհիվ ժամանակին հայտնաբերեցին ու խափանեցին դիվերսիոն խմբերի ներթափանցման տասնյակ փորձեր»,- ասաց պաշտպանության նախարարը՝ հավելելով, որ պետք է առնվազն կույր լինել չտեսնելու համար, որ հայկական բանակը ոչ միայն հստակ կատարում է իր պաշտպանական խնիդրները, այլ նաև անհրաժեշտության դեպքում կարող է գործարկել զսպման մեխանիզմներ:

«Դրա վկայությունն է 2014 թվականի ընթացքում տեղի ունեցած դեպքերը, որոնք լուրջ դաս պետք է լինեն իրենց ռազմատենչ նկրտումների պատճառով Հարավային Կովկասի փխրուն խաղաղությունը վտանգել փորձողների համար»,-ասաց նախարարը:

Ս. Օհանյանը վստահ է, որ վտանգի դեպքում այսօրվա հայ երիտասարդները կշարունակեն ավագներից ժառանգած ավանդույթները:

«Ցավոք, հակառակորդը մնում է նույնը և իր զինվորներին անիմաստ մահվան ուղարկելու գործելակերպը շարունակում է նաև 2015 թվականի առաջին իսկ օրերից: Թեև անդառնալի կորուստների գնով, բայց այդ ոտնձգությունների փորձերն արժանի հակահարված են ստանում: Հայաստանի իշխանության ջանքերի շնորհիվ այսօր գլոբալ առումով լայնածավալ պատերազմի վտանգ չկա, բայց լարվածությունը պահանվելու է, որովհետև անզոր վրեժխնդրությամբ առաջնորդվող հակառակորդը փորձելու է հերթական անգամ դիմել արյունալի սադրանի՝ իր ժողովրդի առջև արդարանալու համար: Յուրաքանչյուրս պետք է զգոն լինենք, ուշադիր, ավելի գոտեպնդվենք ու ամրանանք: Հակառակորդը գործում է բարոյական և քաղաքակրթային այլ, մեր արժեհամակարգին անհասանելի տիրույթում, հասկանում է միայն ուժի լեզուն, և ամեն մի հենակետում նրան հայկական բանակի ուժի հստակ ցուցադրումն է հաղթական խաղաղությունը պահպանելու գլխավոր երաշխիքը»,- նշեց նախարարը:

Հաղթողի հպարտություն, հաղթողի վստահություն, հաղթողի հոգեբանություն, արագ համախմբվելու կարողության, սրանք են, նախարարի համոզմամբ, մեր անձնվեր զինվորների ու հրամանատարների մեծագույն նվերը հայ ժողովրդին: