«Սուրբ Սարգսի պաշտամունքը հնում վերաբերել է բոլորին»
Մ. Մաշտոցի անվան Մատենադարանից վաղը Առաջնորդանիստ սուրբ Սարգիս եկեղեցի կբերվի 17-րդ դարում Ավետիս երեցի կողմից ս. Սարգիս եկեղեցում ընդօրինակված Ավետարանը, որը Սրբի մասունքի հետ սուրբ պատարագի ընթացքում կդրվի սուրբ Սեղանին, և հավատավոր ժողովուրդը կկարողանա հաղորդ լինել սրբի մասունքներին ու սուրբ Ավետարանին: Ն. Ս. Օ. Տ. Տ. Գարեգին Բ Ամենայն Հայոց Հայրապետի արտոնմամբ Մայր Աթոռ Սուրբ Էջմիածնից առաջնորդանիստ սուրբ Սարգիս եկեղեցի կբերվի սուրբ Սարգիս զորավարի մասունքակիր աջը: Լրագրողների հետ հանդիպման ժամանակ Սուրբ Սարգիս տոնի առիթով կազմակերպվող միջոցառումները ներկայացրեց Արարատյան հայրապետական թեմի «Ծիրանավոր» երիտասարդաց միության ատենապետ Հասմիկ Միրզոյանը:
Նա նշեց, որ արդեն տասը տարի է շարունակվում է այս տոնը վերածվել մեծ տոնախմբության, կազմակերպվում են միջոցառումներ նաև զորամասերում, հիվանդանոցներում, դպրոցներում:
«Քանի որ Սուրբ Սարգիսը զորավար է եղել, այդ իսկ պատճառով միջոցառումներ ենք կազմակերպում հենց զորամասերում»,- ասաց Հ. Միրզոյանը:
Երիտասարդների և սիրո բարեխոս Սուրբ Սարգիս զորավարի հիշատակության օրը նշվելու է հունվարի 31-ին:
Ասոլիսին ներկա «Տոնացույց» ժողովրդական թատրոնի գեղարվեստական ղեկավար Հասմիկ Բաղրամյանն ասաց, որ իրենք ԳԱԱ Ազգագրության և հնագիտության ինստիտուտի հետ ուսումնասիրում են Սուրբ Սարգսի տոնի արմատները՝ փորձելով ներկայացնել այնպես, ինչպես եղել է հնուց ի վեր: Ըստ նրա, Սուրբ Սարգսի պաշտամունքը եղել է նաև նախաքրիստոնեական շրջանում, կապված էր բնության պաշտամունքի հետ՝ ձմեռվա բուքն ու սառնամանիքը քշելու, տանելու հզոր ուժի հետ: Սուրբ Սարգսի պաշտամունքը, ըստ Հ. Բաղրամյանի, կապված է նաև հեքիմության, բժշկության հետ, միայն 20-րդ դարի վերջում են սկսել կապել նաև սիրո պաշտամունքի հետ:
«Երբ որ սկսեցին նշել Վալենտինը՝ որպես երիտասարդների, սիրահարների տոն, մեր եկեղեցին այդ ժամանակ ներկայացրեց իր սրբին՝ Սուրբ Սարգսին: Սուրբ Սարգսի պաշտամունքը հնում վերաբերել է բոլորին՝ որպես արագահաս փրկիչ»,- նշեց նա:
Հասմիկ Միրզոյանն իր խոսքը հղելով հայ երիտասարդներին՝ նշեց. «Հավատրիմ մնալ Հայ Առաքելական եկեղեցուն, քանի որ եկեղեցին է ավանդույթները պահպանողը»:
Հասմիկ Բաղրամյանն էլ ասաց. «Պահպանել հազարամյակներով եկած մեր ընտանեկան, սրբազան արարողությունները:
Խորհուրդ կտայի խորությամբ հավատալ Աստծուն, լինել հայ քրիստոնյա, հեռու չգնալ արմատներից: Հզոր մշակույթ, արմատներ, հավատք ունենք, որը մեզ պահել է հազարամյակներ շարունակ: Չպետք է զոհ գնանք այսօր աշխարհում տեղի ունեցող ալեկոծությանը, գլոբալիզացիային»: