ԲՀԿ-ական պատգամավոր. Հայաստանին այսօր օդ ու ջրի պես անհրաժեշտ են ազատ շուկայական հարաբերություններ
«Օրենքները պետք է բխեն մարդկանց շահերից, հեշտացնեն մարդկանց կյանքը, բիզնեսին տան հնարավորություններ, մինչդեռ կառավարությունը վերևներում նոտած ծրագրեր է մշակում, որոնք առաջացնում է մարդկանց դժգոհությունը»,- լրագրողների հետ հանդիպման ժամանակ նման դիտարկում արեց ԱԺ ԲՀԿ խմբակցության անդամ Վահան Բաբայանը՝ խոսելով «Շրջանառության հարկի մասին օրենքի» փոփոխություններից, որը դժգոհություններ է առաջացրել առևտրականների շրջանում, ովքեր արդեն մի քանի օր է բողոքի ակցիաներ են անում:
«Շրջանառության հարկի մասին» օրենքն ուժի մեջ է մտնելու փետրվարի 1-ից:
Ըստ նրա, Հայաստանին այսօր օդ ու ջրի պես անհրաժեշտ են ազատ շուկայական հարաբերություններ, հարկերի իջեցում, լուրջ քայլեր, որոնք կարող են առաջ մղել բիզնեսը:
Վ. Բաբայանի համոզմամբ, եթե հասարակությանը պայքարի, կհասնի հաջողության: Նա հայտնեց, որ երկուշաբթի ոչ իշխանական ուժերը ԱԺ-ում ստորագրահավաք են սկսելու՝ այդ խնդրով արտահերթ նիստ հրավիրելու համար:
«Փոքր և միջին ձեռներեցները եթե սառեցնեն իրենց գործունեությունը, մեր երկրին լուրջ տնտեսական կոլապս է սպասվում»,- ասաց ԲՀԿ-ական պատգամավորը:
Ըստ նրա, խնդրի լուծման երկու տարբերակ կա՝ օրենքի կասեցում և նոր օրենքի ընդունում, որտեղ կլինի շեմի բարձրացում կամ կամավորության սկզբունքը, ինչը նաև հենց բողոքող քաղաքացիների պահանջներն են:
«Կարծում եմ, եթե կառավարությունը որոշակի կոնստրուկտիվություն ցուցաբերի, որը ես տեսնում եմ և նույն ձևով որոշակի ականջալուր լինի ցուցարարների կոչերին, ոչ իշխանական ուժերի առաջարկած օրինագծին, համատեղ ուժերով կարելի է այս խնդիրը հեշտորեն լուծել: Ամեն ինչ կախված է մեր հասարակության պայքարից, որը երկուշաբթի կերևա թե ինչքանով են պատրաստ՝ փափուկ բարձի կամ խելոք խոսքերի հետևից գնալու, թե կոնկրետ գործեր անելու: Երկուշաբթի այդ բոլոր հարցերի պատասխանները մենք կտեսնենք»,- ասաց Վ. Բաբայանը:
Նա չբացառեց, որ կառավարությունը որոշակի զիջումների գնալով՝ կրկին փափուկ բարձ կդնի բողոքողների գլխի տակ ու կպահպանի այս օրենքն այնպես, ինչպես իրենք են ցանկանում:
Հիշեցնենք, որ տոնավաճառի աշխատակիցների դժգոհություններից հետո նոյեմբերին ԱԺ նիստում կառավարության ներկայացրած «Շրջանառության հարկի մասին» ՀՀ օրենքում փոփոխություններ և լրացումներ կատարելու մասին օրենքի կիրառության անցումային դրույթների գործողության ժամկետը հետաձգվեց մինչև փետրվարի 1-ը: Նոր օրենքով առաջարկվում է փոքր և միջին բիզնեսի ներկայացուցիչների համար շրջանառության հարկի դրույքաչափը 3,5 տոկոսից նվազեցնել 1 տոկոս, միաժամանակ, տնտեսվարողները պարտավորվելու են գործունեություն ծավալել հստակ փաստաթղթաշրջանառությամբ: Բացի այդ, նոր օրենքով՝ փաստաթուղթը չներկայացնելու դեպքում անհատ ձեռներեցներն առաջին ագամ կտուգանվեն 20 հազար դրամով, այնուհետև` շրջանառության հարկի հինգ տոկոս չափով: Տոնավաճառի աշխատակցիները պահանջում են, որպեսզի աշխատեն այնպես, ինչպես մինչ օրս, այսինքն՝ ոչ թե վճարեն եկամտի 1%-ը, այլ լինի հաստատագրված վճար։ Վարչապետ Հովիկ Աբրահամյանը նախօրեին ընդունել է բողոքող քաղաքացիներին, նշել է, որ բոլոր առաջարկները մանրամասն կքննարկվեն կառավարությունում և առաջիկայում կներկայացվեն հանրությանը:
Նախորդող հրապարակումներ՝
ՕԵԿ-ը ստորագրահավաք կանցկացնի՝ արտահերթ նիստ հրավիրելու համար
Վարչապետը առևտրականներին վստահեցրել է, որ կքննարկեն նրանց առաջարկները
Նախագահական նստավայրի մոտ է Երևանի ոստիկանապետը. «Իրավիճակը վերահսկվում է»
Ակցիայի մասնակիցները, նախքան նախագահական հասնելը, դիմեցին պատգամավորներին
Ակցիա՝ կառավարության մոտ. «Լինելու են մարդիկ, որ թողնելու, չլուդ գնալու են Հայաստանից»